జూబ్లీ హిల్స్ నియోజకవర్గం బై ఎలక్షన్ రాజకీయంగా మరింత వేడెక్కుతోంది. కాంగ్రెస్ పార్టీ నుండి టికెట్ ఎవరికిస్తారన్న ఆసక్తి మధ్య ఎన్నో కాంట్రవర్సీలు చెలరేగాయి. చివరికి రేవంత్ రెడ్డి నిర్ణయంతో నవీన్ యాదవ్ కు టికెట్ ఇవ్వడం, ఆ నిర్ణయం చుట్టూ నడుస్తున్న పరిణామాలు ఇప్పుడు తెలంగాణ రాజకీయాల్లో హాట్ టాపిక్గా మారాయి.
టికెట్ కోసం కాంగ్రెస్లో బొంతు రామ్మోహన్, కల్చర్ల విజయలక్ష్మి, మైనంపల్లి హనుమంతరావు వంటి నేతలు పోటీ పడగా, నవీన్ యాదవ్ మాత్రమే “టికెట్ నాకే వస్తుంది” అన్న నమ్మకంతో ముందుకు సాగారు. విశ్వసనీయ వర్గాల సమాచారం ప్రకారం, రేవంత్ రెడ్డి రెండు నెలల కిందటే నవీన్ యాదవ్కి “గ్రౌండ్లో పని చెయ్యి, టికెట్ నీదే” అని హామీ ఇచ్చినట్టు తెలుస్తోంది.
హైకమాండ్ నిర్ణయానికి ముందే ఈ డీల్ కుదిరిందని, డబ్బు లాబీయింగ్, స్థానిక ఒత్తిడులు కూడా ఉన్నాయని పార్టీ వర్గాలు చెబుతున్నాయి. ఇక బీసీ రిజర్వేషన్ చర్చల మధ్య ఒక బీసీ అభ్యర్థిని ఇవ్వాలని భావించి కూడా కాంగ్రెస్ ఈ నిర్ణయం తీసుకుందనే అభిప్రాయం వినిపిస్తోంది.
నవీన్ యాదవ్ గతంలో ఎంఐఎంతో మంచి సంబంధాలు కలిగి ఉండడం, జూబ్లీ హిల్స్లో ఉన్న మైనారిటీ ఓట్లు (దాదాపు 30 వేల వరకు) కూడా కాంగ్రెస్కు లాభకరంగా ఉండొచ్చని విశ్లేషకులు అంటున్నారు.
అయితే టికెట్ రాకముందే వివాదాలు చెలరేగాయి. నవీన్ యాదవ్ కుటుంబం సంబంధిత వ్యక్తిగత వివాదాలు, ఆయన వదిన మీనాక్షి నటరాజన్ లేఖ వంటి అంశాలు రాజకీయంగా పెద్ద చర్చకు దారితీశాయి. ఆమె లేఖలో నవీన్ యాదవ్ మరియు చిన్న శ్రీశైలం యాదవ్ కుటుంబంపై తీవ్రమైన ఆరోపణలు చేసినా, కాంగ్రెస్ పార్టీ ఈ విషయాన్ని పెద్దగా పట్టించుకోకుండా టికెట్ను కట్టబెట్టింది.
అంతేకాదు, ఆ లేఖ ఎన్నికల సమయంలోనే బయటకు రావడం వెనుక బిఆర్ఎస్ వ్యూహం ఉందని కాంగ్రెస్ నేతలు ఆరోపిస్తున్నారు. “ఇది కోర్టులో మూడు సంవత్సరాలుగా నడుస్తున్న కేసు. ఎలక్షన్ టైంలోనే బయటకు తీయడం రాజకీయ కుట్ర” అని నవీన్ యాదవ్ శ్రేణులు వ్యాఖ్యానిస్తున్నారు.
మరోవైపు, బిఆర్ఎస్ శిబిరంలో కూడా అంతర్గత అసంతృప్తి కొనసాగుతోంది. మాగంటి గోపీనాథ్ గారు మరణంతో ఆయన సతీమణి సునీతకు టికెట్ ఇచ్చినా, ఆయన తమ్ముడు వజ్రనాథ్ సపోర్ట్ చేయడం లేదని సమాచారం. దీంతో బిఆర్ఎస్ అంతర్గత విభేదాలు కాంగ్రెస్కు ప్లస్ అవుతున్నాయనే అభిప్రాయం బలపడుతోంది.
తలసాని శ్రీనివాస్ యాదవ్ పరోక్షంగా నవీన్ యాదవ్కు మద్దతు ప్రకటించడమూ గమనార్హం. అటు ముస్లిం ఓట్లు, ఇటు స్థానిక యాదవ కమ్యూనిటీ మద్దతుతో నవీన్ యాదవ్ గట్టి పోటీ ఇవ్వగలడని కాంగ్రెస్ శిబిరం విశ్వసిస్తోంది.
మొత్తం మీద, ఈ బై ఎలక్షన్ వ్యక్తిగత ఆరోపణలు, కాంట్రవర్సీలు, కుటుంబ తగాదాలు, అంతర్గత వ్యూహాలు అన్నీ కలిసిన ఒక బహుళ కోణాల పోరాటంగా మారింది. ఒకవైపు బిఆర్ఎస్ సానుభూతి తరంగం ఆశిస్తుండగా, మరోవైపు కాంగ్రెస్ వ్యూహాత్మక లెక్కలు వేసుకుంటోంది. చివరికి ఎవరి ప్లాన్ వర్కవుట్ అవుతుందనేది జూబ్లీ హిల్స్ ప్రజలు తేల్చనున్నారు.
