ఇయర్ ఎండ్లో శుభం కార్డ్ వేస్తాయా?
2025 తెలుగు సినిమా పరిశ్రమకు మొత్తంగా చూస్తే ఇది ఒక బ్యాడ్ ఇయర్ అనే చెప్పాలి. ఈ ఏడాది విడుదలైన భారీ సినిమాల్లో చాలా వరకు బాక్సాఫీస్ వద్ద డిజాస్టర్లుగా మారి, నిర్మాతలకు కోట్లలో నష్టాలను మిగిల్చాయి. భారీ అంచనాలతో వచ్చిన సినిమాలు కూడా ఆశించిన స్థాయిలో వసూళ్లు రాబట్టలేకపోయాయి.
ఈ ఏడాది తొలి త్రైమాసికంలో పవర్ స్టార్ పవన్ కళ్యాణ్ నటించిన ‘ఓజీ’ సినిమా విడుదలై పరిశ్రమకు కొంత ఊరటనిచ్చింది. అయితే ఆ తర్వాత వచ్చిన సినిమాలేవీ బాక్సాఫీస్ వద్ద ప్రభావం చూపలేకపోయాయి. భారీ బడ్జెట్తో తెరకెక్కిన ‘అఖండ 2’ పరిస్థితి గురించి ప్రత్యేకంగా చెప్పాల్సిన అవసరం లేదు. భారీగా పెట్టుబడి పెట్టినా, ఆ బడ్జెట్ను కూడా రికవర్ చేయలేకపోవడం ఈ ఏడాది పరిస్థితి ఎంత దారుణంగా ఉందో చెబుతోంది.
ఇయర్ ఎండ్పై ఆశలు…
ఇలాంటి పరిస్థితుల్లో ఇయర్ ఎండ్లో అయినా శుభం కార్డ్ పడుతుందా అనే ఆసక్తి అందరిలోనూ నెలకొంది. క్రిస్మస్ సందర్భంగా డబ్బింగ్ సినిమాలతో కలిసి మొత్తం ఎనిమిది చిత్రాలు థియేటర్లలోకి రాబోతున్నాయి. ఇందులో డబ్బింగ్ సినిమాలు ‘వృషభ’, ‘మార్క్’ కాగా… తెలుగు సినిమాలు మొత్తం ఆరు రిలీజ్ అవుతున్నాయి. ఇవి బాక్సాఫీస్ వద్ద మంచి ఫలితాలు అందించి 2025కి పాజిటివ్ ఎండ్ ఇస్తాయా అనే దానిపై సినీ వర్గాల్లో చర్చ జరుగుతోంది.
రోషన్ ‘ఛాంపియన్’పై భారీ అంచనాలు
ఇయర్ ఎండ్ రిలీజుల్లో ముందు వరుసలో ఉన్న సినిమా ‘ఛాంపియన్’. ఆనంది ఆర్ట్ క్రియేషన్స్, కాన్సెప్ట్ ఫిల్మ్స్తో కలిసి స్వప్న సినిమాస్ ఈ చిత్రాన్ని నిర్మించింది. తెలంగాణలోని బైరాన్ పల్లి నేపథ్యంగా, యుద్ధంతో ముడిపడిన అందమైన ప్రేమకథగా ఈ సినిమాను తెరకెక్కించారు. ప్రదీప్ అద్వైతం దర్శకత్వం వహించిన ఈ మూవీపై ఇప్పటికే మంచి పాజిటివ్ బజ్ క్రియేట్ అయింది. డిసెంబర్ 25న విడుదలవుతున్న ఈ సినిమాతో హీరో రోషన్ బ్లాక్బస్టర్ హిట్ కొట్టి తన సత్తా చాటాలని ఉవ్విళ్లూరుతున్నాడు.
ఆది ‘శంబాల’తో కమ్బ్యాక్ ఆశలు
దీని తర్వాత ఎక్కువ క్రేజ్ ఉన్న సినిమా ‘శంబాల’. ఇప్పటికే విడుదలైన ప్రచార చిత్రాలు సినిమాపై అంచనాలను భారీగా పెంచేశాయి. హీరో ఆది ఈ సినిమాతో మళ్లీ ట్రాక్లోకి రావాలనే పట్టుదలతో ఉన్నాడు. కంటెంట్పై నమ్మకంతో ఈ చిత్రాన్ని మైత్రీ మూవీ మేకర్స్ రిలీజ్ చేయడం విశేషం.
చిన్న సినిమాల బజ్
ఈ రెండింటితో పాటు చిన్న సినిమాలుగా వస్తున్న ‘దండోరా’, ‘ఈషా’, ‘పతంగా’ కూడా బజ్ క్రియేట్ చేయగలిగాయి. కంటెంట్ ఆధారంగా ఈ సినిమాలపై కూడా మంచి అంచనాలే ఉన్నాయి. దీంతో ఇయర్ ఎండ్ ఈ సినిమాల ఫలితాలతో శుభంగా ముగుస్తుందనే ఆశలు ట్రేడ్ వర్గాల్లో వ్యక్తమవుతున్నాయి.
డబ్బింగ్ సినిమాల ప్రభావం
ఇవే కాకుండా మోహన్ లాల్ నటించిన పాన్ ఇండియా మూవీ ‘వృషభ’ కూడా విడుదలవుతోంది. ఇప్పటికే రిలీజ్ అయిన ట్రైలర్ సినిమాపై అంచనాలను పెంచేసింది. గీతా ఆర్ట్స్ ఈ సినిమాను రిలీజ్ చేయడం కూడా ప్లస్గా మారింది. మరోవైపు కన్నడ స్టార్ కిచ్చా సుదీప్ నటించిన క్రైమ్ యాక్షన్ డ్రామా ‘మార్క్’ కూడా డిసెంబర్ 25న థియేటర్లలోకి వస్తోంది. పవర్ఫుల్ పోలీస్ స్టోరీగా రూపొందిన ఈ చిత్రంపై కూడా పాజిటివ్ బజ్ ఉంది.
మొత్తానికి…
ఈ సినిమాల్లో మెజారిటీ హిట్ అనిపించుకుంటే మాత్రం 2025కి ఒక పాజిటివ్ నోట్తో శుభం కార్డ్ పడినట్టే అని ట్రేడ్ వర్గాలు అభిప్రాయపడుతున్నాయి. మరి ఇయర్ ఎండ్లో తెలుగు సినిమా గడ్డ పైన ఎవరు గెలుస్తారో చూడాలి.
