ప్రపంచ వ్యాప్తంగా సాంకేతిక రంగాన్ని కుదిపేస్తున్న లే ఆఫ్స్ తుఫాన్ మరోసారి అమెజాన్ను తాకింది. ప్రముఖ ఈ-కామర్స్ దిగ్గజం అమెజాన్ సుమారు 14,000 మంది ఉద్యోగులను తొలగించింది. ఈ నిర్ణయానికి ప్రధాన కారణం — ఆర్టిఫిషియల్ ఇంటెలిజెన్స్ (AI) టెక్నాలజీని మరింత ప్రాధాన్యంగా తీసుకోవడమే అని సంస్థ సీనియర్ వైస్ ప్రెసిడెంట్ బేత్ గాలేటి వెల్లడించారు.
సంస్థలో అంతర్గతంగా పంపిన మెమోలో “భవిష్యత్తులో మన పని విధానం పూర్తిగా మారబోతోంది. ఏఐ ఆధారిత పద్ధతులు వేగంగా విస్తరిస్తున్నాయి, అందువల్ల కొంత మానవ శక్తి అవసరం తగ్గిపోతోంది” అని పేర్కొన్నారు.
ఈ పరిణామం సాఫ్ట్వేర్ రంగంలో భారీ ఆందోళన కలిగిస్తోంది. ఎందుకంటే ఒక ఏఐ టూల్ ఇప్పుడు నలుగురు చేసే పనిని నిమిషాల్లో పూర్తి చేయగలగడం వల్ల ఉద్యోగ అవసరం తగ్గిపోతోంది.
టెక్ నిపుణుల అభిప్రాయం ప్రకారం, ఈ ప్రక్రియ ఒకవేళ భారతదేశంలో కూడా అమలవుతే లక్షలాది సాఫ్ట్వేర్ ఉద్యోగాలు ప్రమాదంలో పడే అవకాశం ఉంది. ప్రస్తుతం టెక్నాలజీ వేగంగా ముందుకు వెళ్తున్నప్పటికీ, దానితో పాటు ఉద్యోగ భద్రతపై ఆందోళనలు కూడా పెరుగుతున్నాయి.
ఉద్యోగాల్లో ఉన్న వారు తమ నైపుణ్యాలను అప్డేట్ చేసుకోవడం, కొత్త టెక్నాలజీలను నేర్చుకోవడం తప్పనిసరి అని నిపుణులు సూచిస్తున్నారు. లేకపోతే ఏఐ ఆధిపత్యం ముందు మానవ శ్రమ ప్రాధాన్యం తగ్గిపోవచ్చని హెచ్చరిస్తున్నారు.
ఇది కేవలం అమెజాన్కే పరిమితం కాకుండా, ఇతర సాఫ్ట్వేర్ కంపెనీలు కూడా ఈ దిశగా కదిలే అవకాశముందని మార్కెట్ విశ్లేషకులు చెబుతున్నారు.
ఇప్పుడే ఏఐను స్వీకరించాలా లేక భవిష్యత్తు భయం పట్టుకోవాలా? — ఇదే ప్రశ్న ఇప్పుడు ప్రపంచ వ్యాప్తంగా ఐటీ ఉద్యోగుల మనసులో మెదులుతోంది.
