హైదరాబాద్లోని జియాగూడ మార్కెట్ బంద్ నిర్ణయం తీవ్ర వివాదానికి దారి తీసింది. ఈ నిర్ణయానికి వ్యతిరేకంగా మార్కెట్ వ్యాపారులు, కార్మికులు, కూలీలు పెద్ద ఎత్తున నిరసన వ్యక్తం చేస్తున్నారు. రోజువారీ కూలీలకు పని లేకపోతే జీవనం సాగదని, ఈ మార్కెట్పై ఆధారపడి వేలాది కుటుంబాలు బతుకుతున్నాయని వారు ఆవేదన వ్యక్తం చేస్తున్నారు.
ప్రతిరోజూ కష్టపడి సంపాదించే కార్మికులు “రోజు పని లేకపోతే ఇల్లు నడవదు” అని చెబుతూ తమ పరిస్థితిని వివరించారు. జియాగూడ మార్కెట్ మూసివేతతో వారు ఆర్థికంగా పూర్తిగా దెబ్బతిన్నారని అన్నారు.
మార్కెట్కు వందల సంవత్సరాల చరిత్ర ఉందని, నిజాం కాలం నుంచే ఇది కొనసాగుతుందని వ్యాపారులు గుర్తుచేశారు. హైదరాబాద్లో మాంసం సరఫరాలో ఈ మార్కెట్ కీలక పాత్ర పోషిస్తోందని, దీనిని అకస్మాత్తుగా మూసివేయడం వల్ల నగర ప్రజలపై కూడా ప్రభావం పడుతుందని పేర్కొన్నారు.
మార్కెట్ మూసివేతకు కారణంగా కాలుష్యం చూపుతున్న అధికారులపై వ్యాపారులు తీవ్ర విమర్శలు గుప్పించారు. “మార్కెట్ బంద్ చేస్తే సమస్యలు పరిష్కారమవుతాయా?” అని ప్రశ్నించారు. ప్రభుత్వం సరైన ప్రత్యామ్నాయం చూపకుండా ఈ నిర్ణయం తీసుకుందని వారు ఆరోపించారు.
కొత్త మార్కెట్ నిర్మాణం చేపట్టాలని, లేదా సరైన సదుపాయాలతో ప్రత్యామ్నాయం కల్పించాలని వ్యాపారులు డిమాండ్ చేస్తున్నారు. లేనిపక్షంలో తమ నిరసనలను మరింత తీవ్రతరం చేస్తామని హెచ్చరించారు.
జియాగూడ మార్కెట్ బంద్ వల్ల రైతులు, పశువుల వ్యాపారులు, కార్మికులు అందరూ నష్టపోతున్నారని, ఇది కేవలం ఒక మార్కెట్ సమస్య కాకుండా మొత్తం వ్యవస్థపై ప్రభావం చూపే అంశమని వారు పేర్కొన్నారు.
ప్రభుత్వం తక్షణమే స్పందించి మార్కెట్ను తిరిగి ప్రారంభించాలని, లేకపోతే పెద్ద ఎత్తున ఆందోళనలు కొనసాగుతాయని హెచ్చరికలు వినిపిస్తున్నాయి.
