ఓకే టీవీతో ప్రత్యేక ఇంటర్వ్యూలో బీజేపీ సీనియర్ నేత బూర నరసయ్య గౌడ్ తెలంగాణలో బీసీ రిజర్వేషన్ వివాదంపై తీవ్ర వ్యాఖ్యలు చేశారు. 42% బీసీ రిజర్వేషన్ విషయంలో కాంగ్రెస్ ప్రభుత్వం ప్రజలను తప్పుదారి పట్టిస్తోందని ఆయన ఆరోపించారు.
“అంబేద్కర్ గారు రాజీనామా చేయాల్సినంత దారుణం కాంగ్రెస్ వల్లే జరిగింది. అప్పటి నుంచి కాంగ్రెస్ పార్టీ బీసీల పట్ల అసహనం చూపుతోంది,” అని బూర నరసయ్య గౌడ్ అన్నారు.
ఆయన మాట్లాడుతూ, “కాంగ్రెస్ పాలనలో ఇప్పటి వరకు ఎప్పుడూ బీసీ వ్యక్తి సీఎం గానో, డిప్యూటీ సీఎంగా గానో లేరు. రేవంత్ రెడ్డి వ్యాఖ్యలు కూడా కాంగ్రెస్ అసలు స్వభావాన్ని బయటపెడుతున్నాయి” అని మండిపడ్డారు.
మండల్ కమిషన్ కాలంలో బీజేపీనే బీసీల హక్కుల కోసం నిలబడ్డదని ఆయన గుర్తు చేశారు. “మోడీ ప్రభుత్వం నిజమైన సామాజిక న్యాయం కోసం పనిచేస్తోంది. బీసీల కోసం రాజ్యాంగ హక్కులను బలపరచింది” అని పేర్కొన్నారు.
ఫేక్ ఓటర్ ఐడీల అంశంపై మాట్లాడుతూ — “కాంగ్రెస్ తప్పుడు ఓటర్లను సృష్టించి ఎన్నికలను వక్రీకరించే ప్రయత్నం చేస్తోంది. ఎన్నికల సంఘం వెంటనే చర్యలు తీసుకోవాలి” అని డిమాండ్ చేశారు.
ముస్లింల రిజర్వేషన్ అంశంపై ఆయన స్పష్టంచేస్తూ — “బీజేపీ ముస్లింలకు వ్యతిరేకం కాదు. కానీ మతం ఆధారంగా రిజర్వేషన్ ఇవ్వడం రాజ్యాంగ విరుద్ధం. ముస్లింలు ఇప్పటికే EWS, BC కోటాలో లబ్ధి పొందుతున్నారు” అన్నారు.
చివరగా ఆయన మాట్లాడుతూ — “కాంగ్రెస్ హిందువులను కులాలవారీగా విభజించి, ముస్లింలను ఓటు బ్యాంక్ కోసం ఏకం చేస్తోంది. కానీ మోడీ ప్రభుత్వం అందరి అభివృద్ధి కోసం – సబ్కా సాథ్, సబ్కా వికాస్ కోసం కట్టుబడి ఉంది” అన్నారు.
