ఇటీవల జరిగిన మున్సిపల్ ఎన్నికల ఫలితాలపై కాంగ్రెస్ అధిష్టానం తీవ్రంగా స్పందించినట్లు సమాచారం. ముఖ్యంగా కరీంనగర్ మున్సిపల్ కార్పొరేషన్ లో పార్టీ ఓటమిని సీరియస్గా తీసుకున్నట్లు తెలుస్తోంది. రాష్ట్రంలో అధికారంలో ఉన్నప్పటికీ అక్కడ విజయం సాధించలేకపోవడంపై ఢిల్లీలో కీలక సమీక్ష సమావేశం జరిగింది.
ఈ సమీక్షను ఆల్ ఇండియా కాంగ్రెస్ కమిటీ నిర్వహించింది. సమావేశానికి మల్లికార్జున ఖర్గే, రాహుల్ గాంధీ, కే సి వేణుగోపాల్ తదితరులు హాజరయ్యారు. రాష్ట్రం నుంచి రేవంత్ రెడ్డి సహా పార్టీ ముఖ్య నాయకులు పాల్గొన్నారు.
సమావేశంలో ముఖ్యంగా కరీంనగర్లో పార్టీ ఎందుకు ఓడిపోయిందనే అంశంపై విస్తృతంగా చర్చించినట్లు పార్టీ వర్గాలు చెబుతున్నాయి. స్థానిక స్థాయిలో బలంగా ఎదుర్కొనే వ్యూహం ఎందుకు అమలు కాలేదని, ప్రతిపక్షంపై సమర్థవంతమైన రాజకీయ ప్రతిస్పందన ఎందుకు కనిపించలేదని నాయకత్వం ప్రశ్నించినట్లు సమాచారం.
మున్సిపల్ ఎన్నికల్లో కాంగ్రెస్ అనేక మున్సిపాలిటీలు, కార్పొరేషన్లు గెలిచినా, ఉత్తర తెలంగాణలో కీలకంగా భావించే కరీంనగర్ కార్పొరేషన్లో మాత్రం భారతీయ జనతా పార్టీ ఆధిక్యం సాధించి మేయర్ పదవిని దక్కించుకోవడం పార్టీకి పెద్ద షాక్గా మారింది.
ఈ నేపథ్యంలో భవిష్యత్ ఎన్నికల వ్యూహాలపై స్పష్టమైన దిశానిర్దేశం ఇవ్వాలని నాయకత్వం సూచించినట్లు తెలుస్తోంది. ముఖ్యంగా భారత రాష్ట్ర సమితి మరియు బీజేపీ మధ్య రాజకీయ సమీకరణలపై ప్రజల్లో స్పష్టమైన ప్రచారం చేయాలని కూడా సూచించినట్లు సమాచారం.
ఇక త్వరలో తెలంగాణ పర్యటనకు రాహుల్ గాంధీ రానున్న నేపథ్యంలో రాష్ట్ర రాజకీయ పరిస్థితులు, పార్టీ బలోపేతం, సామాజిక వర్గాల అంశాలు వంటి విషయాలపై ప్రత్యేక కార్యాచరణ రూపొందించాలనే చర్చ కూడా జరిగినట్లు తెలుస్తోంది.
మొత్తంగా మున్సిపల్ ఎన్నికల ఫలితాలు పార్టీ భవిష్యత్ వ్యూహాలకు హెచ్చరికగా భావిస్తూ, స్థానిక స్థాయి బలపరిచే చర్యలు తీసుకోవాలని కాంగ్రెస్ అధిష్టానం నిర్ణయించినట్లు రాజకీయ వర్గాలు చెబుతున్నాయి.
