తెలంగాణ కాంగ్రెస్ పార్టీలో అంతర్గత కలహాలు మరోసారి బహిరంగ చర్చకు వచ్చాయి. ఇటీవల జరిగిన ప్రెస్ మీట్లో బయటపడ్డ అంశాలు పార్టీని తీవ్ర అసౌకర్యంలోకి నెట్టాయి. మంత్రులను కలవడానికి వెళ్తే అవహేళనగా మాట్లాడుతున్నారని, గంటల తరబడి వేచిచూసేలా చేస్తున్నారని, నియోజకవర్గ సమస్యలపై స్పందన లేదని సొంత పార్టీ ఎమ్మెల్యేలు తీవ్ర అసంతృప్తి వ్యక్తం చేస్తున్నారు. ఇది విపక్షాల విమర్శ కంటే కూడా ప్రమాదకరమైన పరిణామంగా రాజకీయ వర్గాలు భావిస్తున్నాయి.
సాధారణంగా ప్రతిపక్ష ఎమ్మెల్యేలు మంత్రులపై అసహనం వ్యక్తం చేయడం సహజమే. కానీ అధికార పార్టీకి చెందిన ఎమ్మెల్యేలే కొందరు మంత్రుల పనితీరుపై గుర్రుగా ఉండడం ఇప్పుడు హాట్ టాపిక్గా మారింది. ఈ నేపథ్యంలో కొందరు ఎమ్మెల్యేలు సీఎం రేవంత్ రెడ్డికి, అలాగే కాంగ్రెస్ అధిష్టానానికి లిఖితపూర్వక ఫిర్యాదులు చేసినట్లు సమాచారం. త్వరలో మంత్రివర్గ విస్తరణ లేదా ప్రక్షాళన ఉంటుందన్న ప్రచారం నడుస్తుండటంతో ఈ ఫిర్యాదులకు మరింత ప్రాధాన్యం ఏర్పడింది.
ఉమ్మడి వరంగల్ జిల్లా సహా దక్షిణ తెలంగాణకు చెందిన పలువురు ఎమ్మెల్యేలు తమ అనుభవాలను బహిరంగంగా వెల్లడించారు. మంత్రుల నివాసాలకు వెళ్తే వెంటనే కలవకుండా గంటలకొద్దీ కూర్చోబెడుతున్నారని, చివరకు కలిసినప్పుడు పొడి పొడిగా మాట్లాడుతూ అవహేళన మాటలు చేస్తున్నారని ఆవేదన వ్యక్తం చేస్తున్నారు. ఈ పరిస్థితి ఒక్కరిదే కాదని, కొత్తగా ఎన్నికైన మెజారిటీ ఎమ్మెల్యేలు ఇదే సమస్యను ఎదుర్కొంటున్నారని చెబుతున్నారు.
ఇక పీసీసీ చీఫ్ మహేష్ కుమార్ గౌడ్ చేసిన వ్యాఖ్యలు కూడా పార్టీలో గందరగోళాన్ని సృష్టించాయి. మంత్రివర్గం, ఐఏఎస్ అధికారుల పనితీరుపై ఆయన బహిరంగంగా వ్యాఖ్యానించడం సరికాదని సీనియర్ నేతలు అభిప్రాయపడుతున్నారు. ప్రభుత్వ వ్యవహారాలపై పార్టీ అధ్యక్షుడు ఇలా మాట్లాడడం వల్ల ప్రతిపక్షాలకు ఆయుధాలు అందినట్లవుతుందని వారు హెచ్చరిస్తున్నారు. క్యాబినెట్ ప్రక్షాళన పూర్తిగా సీఎం పరిధిలోని అంశమని, అధిష్టానంతో సంప్రదించి రేవంత్ రెడ్డి తుది నిర్ణయం తీసుకుంటారని సీనియర్లు స్పష్టం చేస్తున్నారు.
మరోవైపు, కొందరు మంత్రుల అహంకార వైఖరి పార్టీకి చెడ్డ పేరు తెస్తోందన్న ఆరోపణలు తీవ్రంగా వినిపిస్తున్నాయి. ఫోన్ లిఫ్ట్ చేయరని, సీనియర్ లీడర్లను కూడా పట్టించుకోవడం లేదని, తమకు మంత్రి పదవులు ఉంటే చాలని పార్టీ అవసరం లేదన్న ధోరణితో వ్యవహరిస్తున్నారని విమర్శలు వస్తున్నాయి. ఈ మంత్రులను ఆయా శాఖల నుంచి తప్పించి కొత్తవారికి అవకాశం ఇవ్వాలని కొందరు నేతలు డిమాండ్ చేస్తున్నారు.
ఈ పరిణామాలన్నీ సీఎం రేవంత్ రెడ్డికి పెద్ద తలనొప్పిగా మారాయి. మంత్రులను గట్టిగా ప్రశ్నిస్తే వారు నేరుగా ఢిల్లీ అధిష్టానాన్ని ఆశ్రయించే అవకాశం ఉందన్న భయం కూడా పార్టీలో చర్చకు వస్తోంది. మంత్రివర్గ ప్రక్షాళన నిజంగా జరిగితే ఎవరిపై వేటు పడుతుంది? ఎవరి శాఖలు మారతాయి? అన్న అంశాలు ఇప్పుడు తెలంగాణ రాజకీయాల్లో ఆసక్తికర చర్చగా మారాయి. కాంగ్రెస్ ప్రభుత్వం ఈ అంతర్గత సంక్షోభాన్ని ఎలా ఎదుర్కొంటుందన్నదే రాబోయే రోజుల్లో కీలకంగా మారనుంది.
