ఈరోజు తెలంగాణలో జరుగుతున్న పరిణామాలు పూర్తిగా రాజకీయ ప్రేరేపితమైనవని బిఆర్ఎస్ నాయకులు తీవ్రంగా విమర్శించారు. వేలాది మంది పోలీసులను రోడ్లపైకి దించి, హైదరాబాద్ ప్రజలను, బిఆర్ఎస్ కార్యకర్తలను అనవసరంగా ఇబ్బందులకు గురి చేయడం క్రిమినల్ నెగ్లిజెన్స్తో పాటు క్రిమినల్ వేస్ట్ ఆఫ్ పబ్లిక్ రిసోర్సెస్ అని వారు ఆరోపించారు.
తప్పు చేయని వాళ్లు భయపడాల్సిన అవసరం లేదని, ఈ కేసులన్నీ పూర్తిగా రాజకీయ కోణంలో రూపొందించిన కుట్రలేనని స్పష్టం చేశారు. ముఖ్యంగా రేవంత్ రెడ్డి ప్రభుత్వం ఉద్దేశపూర్వకంగా బిఆర్ఎస్ నాయకులను వేధించడానికే ఈ వ్యవహారాన్ని ముందుకు తీసుకెళ్తోందని విమర్శించారు. అందుకే కేటీఆర్ ఈరోజు ధైర్యంగా విచారణకు వెళ్లారని, అక్కడ ప్రశ్నలు అడిగే స్థితిలో బిఆర్ఎస్ ఉందని తెలిపారు.
గతంలో మహిళలపై తప్పుడు ప్రచారం చేసి, టీవీలు–పత్రికల్లో నిరాధార వార్తలు రాయించినప్పుడు కేసులు ఎందుకు పెట్టలేదని ప్రశ్నించారు. అదే ప్రమాణంతో రేవంత్ రెడ్డి మీద కూడా విచారణ జరగాలని డిమాండ్ చేశారు. కావాలని రిటైర్మెంట్కు దగ్గరగా ఉన్న అధికారులను సిట్లో పెట్టి, వారిని ఉపయోగించి బిఆర్ఎస్ మీద తప్పుడు లీకులు ఇప్పిస్తున్నారని ఆరోపించారు.
బిఆర్ఎస్ నేతలు పోలీస్ అధికారులకు గట్టి హెచ్చరిక చేశారు. అన్యాయంగా, అక్రమంగా వ్యవహరిస్తే, రిటైర్ అయిన తర్వాత కూడా ఎక్కడ దాక్కున్నా విచారిస్తామని స్పష్టం చేశారు. చట్టాన్ని అతిక్రమించిన, ఉద్దేశపూర్వకంగా తప్పుడు ప్రచారం చేసిన అధికారులను వదిలిపెట్టే ప్రశ్నే లేదని అన్నారు.
రేవంత్ రెడ్డి దావోస్లో ఉన్నా, ఎక్కడి నుంచైనా తప్పుడు ఆదేశాలు వస్తే వాటిని పాటించవద్దని, చట్టప్రకారం మాత్రమే పనిచేయాలని పోలీసులకు సూచించారు. చట్టాన్ని ఉల్లంఘిస్తే దానికి పూర్తి బాధ్యత అధికారులదే అవుతుందని, భవిష్యత్తులో వచ్చే బిఆర్ఎస్ ప్రభుత్వం కూడా అలాంటి వారిని కాపాడదని హెచ్చరిస్తూ ఈ ప్రకటన ముగించారు.
