గత కొన్ని రోజులుగా దేశంలో బంగారం, వెండి ధరలు ఆకాశాన్ని తాకుతున్నాయి. తాజాగా వెండి ధర కిలోకు రూ.4 లక్షలకు చేరిందంటే పరిస్థితి ఎంత తీవ్రమైందో అర్థం చేసుకోవచ్చు. కేవలం 28 రోజుల్లోనే వెండి ధర దాదాపు రూ.1.44 లక్షలు పెరగడం మార్కెట్ను షాక్కు గురి చేసింది. మరోవైపు బంగారం కూడా ఒక్కరోజులోనే రూ.13,000కుపైగా పెరిగి తులానికి రూ.67,000 మార్క్ను దాటింది.
ఈ ధరల పెరుగుదలతో బంగారం కాయిన్లు, బిస్కెట్లు మార్కెట్లో అందుబాటులో లేకుండా పోతున్నాయి. డిమాండ్ ఎక్కువగా ఉండటం, సరఫరా తగ్గిపోవడం వల్ల చాలా చోట్ల స్టాక్ లేదన్న పరిస్థితి ఏర్పడింది. పెళ్లిళ్లు, శుభకార్యాల కోసం బంగారం కొనాలనుకునే సామాన్యులు, మధ్యతరగతి ప్రజలు ఇప్పుడు వెనక్కి తగ్గాల్సిన పరిస్థితి వచ్చింది.
ఇప్పటికే బంగారం కొనడం సామాన్యుడికి కష్టంగా మారగా, ఇప్పుడు వెండి కూడా బంగారాన్ని మించిపోయే స్థాయికి చేరింది. ఒకప్పుడు వెండి అనేది మధ్యతరగతి వారికి అందుబాటులో ఉండే లోహం. కానీ నేడు వెండి కిలో ధర రూ.4 లక్షలు అంటే, సాధారణ ఆదాయం ఉన్న వ్యక్తి కనీసం కొనాలని ఊహించడానికే భయపడే పరిస్థితి నెలకొంది.
ఈ పరిస్థితికి ప్రధాన కారణాలు అనేకం. అంతర్జాతీయ మార్కెట్లలో ధరల పెరుగుదల, డాలర్ మారకం విలువల్లో మార్పులు, భౌగోళిక రాజకీయ ఉద్రిక్తతలు, పెట్టుబడిదారులు బంగారం–వెండిని సేఫ్ ఇన్వెస్ట్మెంట్గా చూడటం వంటి అంశాలు ధరలను పైకి నెట్టుతున్నాయి. మరోవైపు స్టాక్ మార్కెట్లు కూడా భారీ లాభాల్లో ముగుస్తున్నాయి. సెన్సెక్స్ 82,000 మార్క్ దాటడం పెట్టుబడి ప్రవాహాన్ని మరింత పెంచుతోంది.
మొత్తానికి చూస్తే, బంగారం–వెండి ధరలు సామాన్యుడి పరిధిని దాటి పోయాయి. మోస్తరు సంపాదన ఉన్నవారికే ఇవి భారంగా మారుతున్నాయి. ఇక మధ్యతరగతి, బిలో మిడిల్ క్లాస్ కుటుంబాలు బంగారం, వెండి కొనాలన్న ఆలోచననే వదిలేసుకునే పరిస్థితి కనిపిస్తోంది. రాబోయే రోజుల్లో ధరలు మరింత పెరుగుతాయా? లేక తగ్గుతాయా? అన్నది వేచి చూడాల్సిన అంశంగా మారింది.
