తెలంగాణలో నిరుద్యోగుల అంశం మరోసారి రాజకీయ వేడెక్కుతోంది. రెండు రోజులుగా రాష్ట్రవ్యాప్తంగా నిరుద్యోగులు రోడ్లెక్కి ఆందోళనలు చేపడుతుండగా, పోలీసులు అరెస్టులు చేస్తూ కట్టడి చేయడం తీవ్ర చర్చనీయాంశంగా మారింది. ఈ నేపథ్యంలో ఓకే టీవీకి ఇచ్చిన ఇంటర్వ్యూలో కాంగ్రెస్ నేత చరణ్ కౌశిక్ కీలక వ్యాఖ్యలు చేశారు.
ప్రజాస్వామ్యంలో నిరసన వ్యక్తం చేయడం ప్రతి ఒక్కరి హక్కేనని, అయితే ప్రభుత్వ లేదా ప్రైవేట్ కార్యక్రమాల్లో శాంతిభద్రతలకు విఘాతం కలిగించే పరిస్థితి ఏర్పడితే అరెస్టులు జరగడం సహజ ప్రక్రియేనని ఆయన స్పష్టం చేశారు. ఇందిరా పార్క్ వంటి నిరసన వేదికలు అందుబాటులో ఉన్నాయని, ప్రజాస్వామ్యబద్ధంగా ఆందోళనలు నిర్వహించాలని కాంగ్రెస్ ప్రభుత్వం ఎప్పుడూ ప్రోత్సహిస్తుందని చెప్పారు.
కాంగ్రెస్ ప్రభుత్వం అధికారంలోకి వచ్చిన తర్వాత నిరుద్యోగుల సమస్యపై సీరియస్గా పనిచేస్తోందని చరణ్ కౌశిక్ తెలిపారు. గ్రూప్–1, గ్రూప్–2, గ్రూప్–3, గ్రూప్–4, డీఎస్సీ, టెట్ పరీక్షలను పారదర్శకంగా నిర్వహించామని, ఎలాంటి పేపర్ లీకులు లేకుండా ఉద్యోగ నియామకాలు పూర్తయ్యాయని పేర్కొన్నారు. గత బీఆర్ఎస్ పాలనలో పలు పేపర్ లీకులు జరిగాయని, అయినా బాధ్యత వహించలేదని విమర్శించారు.
ఉద్యోగాల నోటిఫికేషన్లు ఇకపై రావని ప్రచారం జరుగుతోందని, అయితే ఇది పూర్తిగా అవాస్తవమని ఆయన కొట్టిపారేశారు. త్వరలోనే 40 వేల ఉద్యోగాలకు సంబంధించిన ప్రక్రియ మొదలవుతుందని, జాబ్ క్యాలెండర్ అమలు దిశగా ప్రభుత్వం ముందుకు వెళ్తోందని స్పష్టం చేశారు. యూనివర్సిటీల్లో కాంట్రాక్ట్ ఉద్యోగులు, కోర్టు వివాదాలు వంటి సాంకేతిక సమస్యలను పరిష్కరించిన తర్వాతే కొత్త నియామకాలు చేపడతామని తెలిపారు.
ప్రభుత్వం కేవలం ప్రభుత్వ రంగానికే కాకుండా ప్రైవేట్ రంగంలోనూ ఉద్యోగాలు సృష్టించే దిశగా అడుగులు వేస్తోందని చెప్పారు. స్కిల్ యూనివర్సిటీ ఏర్పాటు చేసి యువతకు ఉపాధి అవకాశాలు పెంచే ప్రయత్నం జరుగుతోందని వివరించారు.
అరెస్టులు కుట్రపూరితంగా జరుగుతున్నాయన్న ఆరోపణలను ఆయన ఖండించారు. ముఖ్యమంత్రి ప్రైవేట్ కార్యక్రమానికి హాజరయ్యే సమయంలో భద్రతా కారణాల వల్ల ముందస్తు చర్యలు తీసుకోవడం సాధారణమని అన్నారు. ఎవరినీ అక్రమంగా అరెస్ట్ చేయాలనే ఉద్దేశం కాంగ్రెస్ ప్రభుత్వానికి లేదని స్పష్టం చేశారు.
ఫోన్ ట్యాపింగ్, కాళేశ్వరం, అవినీతి ఆరోపణల విషయంలో చట్టబద్ధంగానే విచారణ జరుగుతోందని, తప్పు చేసిన వారిపై మాత్రమే చర్యలు ఉంటాయని చరణ్ కౌశిక్ తెలిపారు. తెలంగాణ అభివృద్ధి విషయంలో కాంగ్రెస్కు స్పష్టమైన విజన్ ఉందని, హైదరాబాద్ భవిష్యత్ను దృష్టిలో పెట్టుకొని పలు కీలక నిర్ణయాలు తీసుకుంటున్నామని చెప్పారు.
మొత్తంగా నిరుద్యోగుల అంశాన్ని రాజకీయంగా మలుపు తిప్పే ప్రయత్నాలు జరుగుతున్నాయని, కాంగ్రెస్ ప్రభుత్వం మాత్రం హామీల అమలు, పారదర్శక పాలన దిశగా ముందుకు సాగుతోందని ఆయన వ్యాఖ్యానించారు.
