బీహార్ ఎగ్జిట్ పోల్ ఫలితాలు: ఎన్డీఏ స్పష్టమైన ఆధిక్యంలో – కాంగ్రెస్, ఆర్జేడీ వెనుకబడిన సూచనలు

2025 బీహార్ అసెంబ్లీ ఎన్నికల ఎగ్జిట్ పోల్స్ ప్రకారం, ఈసారి కూడా ఎన్డీఏ కూటమి (బీజేపీ ఆధ్వర్యంలో) స్పష్టమైన ఆధిక్యంలో ఉన్నట్లు సూచనలు వెలువడుతున్నాయి. మొత్తం 243 అసెంబ్లీ సీట్లకు ఎన్నికలు జరిగిన బీహార్‌లో, ప్రజాభిప్రాయ సర్వేలు ప్రకారం ఎన్డీఏ కూటమి 130 నుండి 138 సీట్లు గెలుచుకునే అవకాశం ఉన్నట్లు తెలుస్తోంది. ఇది గత కొన్నేళ్లలో బీజేపీకి బీహార్‌లో లభించిన అత్యధిక స్థాయి మద్దతుగా భావిస్తున్నారు.

మరోవైపు, మహాగఠబంధన్ (ఎంజీబీ) 100 నుండి 108 సీట్ల వరకు గెలుచుకునే అవకాశం ఉందని అంచనాలు చెబుతున్నాయి. జనతా దల్ యూనియన్ (జేడీయూ) 101 సీట్లలో పోటీ చేస్తే, వాటిలో 52 నుండి 57 సీట్లు గెలుచుకునే అవకాశం ఉన్నట్లు సర్వేలు చెబుతున్నాయి. లోజ్ జనశక్తి పార్టీ (ఎల్జేపీ) 28 సీట్లలో పోటీ చేసి, 14 నుండి 19 సీట్ల వరకు గెలిచే అవకాశముందని అంచనాలు సూచిస్తున్నాయి.

కాంగ్రెస్ పార్టీ, 61 సీట్లలో పోటీ చేసినప్పటికీ, కేవలం 17 నుండి 23 సీట్లు మాత్రమే గెలుచుకునే అవకాశం ఉందని ఎగ్జిట్ పోల్స్ వెల్లడించాయి.
ఆర్జేడీ మాత్రం 143 నియోజకవర్గాల్లో పోటీ చేసి 75 నుండి 80 సీట్లు గెలుచుకునే అవకాశం ఉన్నట్లు సమాచారం.

ప్రముఖ రాజకీయ విశ్లేషకులు పేర్కొంటూ, “బీహార్‌లో ఎన్డీఏ మరోసారి ప్రజాభిమానాన్ని సంపాదించడం, అభివృద్ధి మరియు సామాజిక సమతుల్యత ఆధారంగా ప్రజలు తీర్పు ఇచ్చినట్లుగా కనిపిస్తోంది” అన్నారు.

ప్రశాంత్ కిషోర్ ఈసారి స్వతంత్రంగా రాజకీయ రంగప్రవేశం చేయగా, ఆయన ప్రభావం ఏ మేరకు ఉందో ఫలితాలు వెలువడిన తర్వాతే స్పష్టమవుతుంది.

ఇక తెలంగాణ సీఎం రేవంత్ రెడ్డి, బీహార్ కాంగ్రెస్ ప్రచారంలో పాల్గొని మహిళా రిజర్వేషన్లు, సంక్షేమ పథకాలు, గ్యారంటీలు వంటి అంశాలను ప్రస్తావించినప్పటికీ, బీహార్ ప్రజలు ఆ హామీలను ఎంతవరకు నమ్మారో ఫలితాలపై ఆధారపడి ఉంటుంది.

ప్రస్తుతం ఎగ్జిట్ పోల్స్ ప్రకారం ఎన్డీఏ స్పష్టమైన ఆధిక్యంలో ఉన్నా, తుది ఫలితాల వరకు నిర్ధారించలేము. అయితే బీహార్ రాజకీయ వాతావరణంలో బీజేపీ మరలా అధికారాన్ని కైవసం చేసుకునే సూచనలు స్పష్టంగా కనబడుతున్నాయి.