వికారాబాద్ జిల్లాలో బీజేపీ బలం రోజు రోజుకు పెరుగుతోందని ఆ పార్టీ నేతలు స్పష్టం చేశారు. ఇటీవల జరిగిన గ్రామపంచాయతీ ఎన్నికల్లో గెలిచిన సర్పంచులు, ఉపసర్పంచులు, వార్డు సభ్యులకు గౌరవ చేవేల పార్లమెంట్ సభ్యులు వికారాబాద్ జిల్లాలో సన్మాన కార్యక్రమం నిర్వహించిన విషయం తెలిసిందే. ఈ కార్యక్రమం అనంతరం బీజేపీ నాయకులు మీడియాతో మాట్లాడుతూ రాజకీయ పరిణామాలపై తీవ్ర వ్యాఖ్యలు చేశారు.
గతంలో తాము బిఆర్ఎస్ పార్టీలో ఉన్నప్పుడు ఉద్యమ కాలం నుంచి గ్రామస్థాయిలో కష్టపడి సర్పంచులను గెలిపించామని, కానీ ఆ శ్రమ ఫలితాలను కొందరు జిల్లా నాయకులు తమ ఖాతాలో వేసుకున్నారని ఆరోపించారు. ముఖ్యంగా బిఆర్ఎస్ జిల్లా అధ్యక్షుడు తన సొంత గ్రామంలో ఒక్క వార్డు సభ్యుడినీ గెలిపించుకోలేకపోయారని విమర్శించారు. పార్టీ కోసం పనిచేసిన కార్యకర్తలను కేసుల్లో ఇరికించి, ఆర్థికంగా ఎలాంటి సహాయం చేయలేదని, ఉద్యమకారుల త్యాగాలను విస్మరించారని ఆరోపణలు గుప్పించారు.
ఈ పరిణామాల నేపథ్యంలో బీజేపీలో చేరిన తర్వాతే వికారాబాద్ నియోజకవర్గంలో పార్టీకి ప్రజాదరణ పెరిగిందని, తాజా ఎన్నికల్లో బీజేపీ రెండో స్థానంలో నిలిచిందని చెప్పారు. కాంగ్రెస్, బీజేపీల మధ్యే అసలు పోటీ జరిగిందని, బిఆర్ఎస్ మూడో స్థానానికే పరిమితమైందని పేర్కొన్నారు.
రాబోయే ఎమ్మెల్యే ఎన్నికల్లో వికారాబాద్ నియోజకవర్గం నుంచి బీజేపీ ఎమ్మెల్యేను గెలిపించుకోవడం ఖాయమని ధీమా వ్యక్తం చేశారు. అలాగే ఎంపీటీసీ, జెడ్పీటీసీ ఎన్నికల్లోనూ బీజేపీ జిల్లా పరిషత్ చైర్మన్ పదవిని కైవసం చేసుకుంటామని ప్రకటించారు. గ్రామస్థాయి నుంచి బలమైన అభ్యర్థులను నిలబెట్టి అధికార పార్టీ కుట్రలను ఎదుర్కొంటామని చెప్పారు.
బిఆర్ఎస్ పార్టీ ఉద్యమకారులను నిర్లక్ష్యం చేయడం వల్లే ఆ పార్టీకి ప్రజల్లో ఆదరణ తగ్గిందని, సర్పంచులకు నిధులు, నీళ్లు, బిల్లులు ఇవ్వకపోవడం వల్ల గ్రామీణ ప్రజలు బిఆర్ఎస్కు తగిన గుణపాఠం చెప్పారని బీజేపీ నేతలు వ్యాఖ్యానించారు. భవిష్యత్తులో వికారాబాద్ జిల్లాలో స్థానిక సంస్థలన్నింటిపై బీజేపీ జెండా ఎగరవేస్తామని వారు స్పష్టం చేశారు.
