బోరబండ ఒంటరి మహిళ ఆవేదన.. “ఇల్లు ఇస్తామన్నారు.. ఇప్పటికీ అద్దె బతుకే”

హైదరాబాద్‌లోని బోరబండ బస్తీలో నివసిస్తున్న ఓ ఒంటరి మహిళ తన కుటుంబం ఎదుర్కొంటున్న సమస్యలను మీడియా ముందు వివరించారు. చిన్నప్పటి నుంచి బోరబండలోనే పెరిగానని, ప్రస్తుతం అద్దె ఇంట్లో చిన్న కుమార్తెతో జీవనం సాగిస్తున్నానని ఆమె చెప్పారు. ప్రభుత్వం ఎన్నికల సమయంలో ఇచ్చిన హామీలు ఇప్పటికీ అమలు కాలేదని ఆవేదన వ్యక్తం చేశారు.

ఆమె మాట్లాడుతూ, “మాకు ఇల్లు ఇస్తామని, ఒంటరి మహిళలకు పెన్షన్ ఇస్తామని చెప్పారు. కానీ ఇప్పటి వరకు ఏదీ అందలేదు. నెలకు ₹15 వేల జీతం వస్తే అందులోనే ₹4,000 నుంచి ₹4,500 వరకు ఇంటి అద్దె, కరెంట్ బిల్లు, ఇతర ఖర్చులు పోతున్నాయి. మిగిలిన డబ్బుతో పిల్లను పోషించడం, ఇంటిని నడపడం చాలా కష్టంగా మారింది” అని అన్నారు.

తన భర్త మరణించడంతో చిన్న కుమార్తె బాధ్యత మొత్తం తనపై పడిందని, సొంత ఇల్లు లేక అద్దె ఇళ్లలో తిరుగుతూ జీవించాల్సి వస్తోందని తెలిపారు. “ఎన్ని రోజులు ఈ కిరాయి బతుకులు బతకాలి? మాకు కూడా ఒక సొంత ఇల్లు కావాలి” అని విజ్ఞప్తి చేశారు.

ప్రభుత్వ పాఠశాలల పరిస్థితిపై కూడా ఆమె అసంతృప్తి వ్యక్తం చేశారు. ప్రైవేట్ పాఠశాలల ఫీజులు భరించే స్థోమత లేదని, ప్రభుత్వ పాఠశాలల్లో సరైన సౌకర్యాలు, నాణ్యమైన బోధన లేకపోవడంతో పిల్లల భవిష్యత్తుపై ఆందోళనగా ఉందన్నారు. “పిల్లలను నేలపై కూర్చోబెడుతున్నారు. సరైన బోధన, పర్యవేక్షణ ఉండడం లేదు” అని పేర్కొన్నారు.

రేషన్ కార్డుల పంపిణీపై కూడా ఆమె అసంతృప్తి వ్యక్తం చేశారు. అర్హులైన చాలామందికి ఇంకా రేషన్ కార్డులు అందలేదని, కార్యాలయాల చుట్టూ ఎన్నిసార్లు తిరిగినా అధికారులు స్పందించడం లేదని ఆరోపించారు. “ఒక ఆఫీస్ నుంచి మరో ఆఫీస్‌కు తిప్పుతున్నారు. కానీ సమస్య మాత్రం పరిష్కారం కావడం లేదు” అని అన్నారు.

బోరబండలో రోడ్లు, విద్యుత్ పరంగా పెద్దగా ఇబ్బందులు లేకపోయినా, తాగునీటి సరఫరా సరిగా లేదని ఆమె తెలిపారు. కొన్ని ప్రాంతాల్లో డ్రైనేజీ సమస్యలు కూడా ఉన్నాయని, స్థానిక సమస్యలను పరిష్కరించడంలో ప్రజాప్రతినిధులు చొరవ చూపడం లేదని విమర్శించారు.

ప్రస్తుత స్థానిక కార్పొరేటర్ బస్తీకి వచ్చి ప్రజల సమస్యలు తెలుసుకున్న సందర్భాలు తనకు తెలియవని ఆమె చెప్పారు. “ఎవరూ వచ్చి మా సమస్యలు అడగరు. సమస్య వస్తే మేమే భరించాలి” అని అన్నారు.

రాబోయే స్థానిక సంస్థల ఎన్నికల సందర్భంగా నాయకులు ఓట్ల కోసం వస్తే, మొదట బస్తీల్లో తిరిగి ప్రజల జీవన పరిస్థితులు చూడాలని ఆమె సూచించారు. “ముందు మా గల్లీల్లో తిరిగి మా కష్టాలు తెలుసుకోండి. తర్వాత ఓట్లు అడగండి” అని వ్యాఖ్యానించారు.

ప్రభుత్వ సంక్షేమ పథకాల అమలులో పారదర్శకత అవసరమని పేర్కొంటూ, “అందాల్సిన వారికి పథకాలు అందడం లేదు. వచ్చిన వారికి మాత్రమే వస్తున్నాయి” అని ఆరోపించారు.

చివరగా ముఖ్యమంత్రికి విజ్ఞప్తి చేస్తూ, “ఒంటరి మహిళలకు ముందుగా సొంత ఇళ్లు ఇవ్వండి. మాలాంటి వాళ్లు అద్దె భారం మోయలేక తీవ్ర ఇబ్బందులు పడుతున్నారు. మా పరిస్థితిని అర్థం చేసుకుని సహాయం చేయండి” అని కోరారు.