2025 సంవత్సరం తెలంగాణ రాజకీయాల్లో బిఆర్ఎస్, బిజెపీలకు తీవ్రంగా కలిసి రాని ఏడాదిగా మారిందని రాజకీయ వర్గాలు విశ్లేషిస్తున్నాయి. ముఖ్యంగా బిఆర్ఎస్ విషయంలో కల్వకుంట్ల కవిత చేసిన వ్యాఖ్యలు, తీసుకున్న స్టాండ్ పార్టీకి పెద్ద షాక్గా మారాయి. ఈ పరిణామాన్ని చాలామంది “కవిత బాంబు”గా అభివర్ణిస్తున్నారు. కల్వకుంట్ల కుటుంబంలో అంతర్గత విభేదాలు బయటపడటం, కుటుంబ సభ్యురాలే బహిరంగంగా మాట్లాడటం పార్టీకి నష్టం చేసిందనే అభిప్రాయం వ్యక్తమవుతోంది. 2025లో బిఆర్ఎస్కు వరుసగా ఎదురైన ప్రతికూల పరిణామాలు, జూబ్లీ హిల్స్ వంటి కీలక నియోజకవర్గాల్లో పోలింగ్ మేనేజ్మెంట్ ఫెయిల్ అవడం పార్టీ గ్రాఫ్ను తగ్గించాయని విశ్లేషకులు చెబుతున్నారు.
ఇక బిజెపి విషయానికి వస్తే, ఒకప్పుడు కాంగ్రెస్లోనే అంతర్గత కలహాలు ఎక్కువగా కనిపించేవి. కానీ 2025లో అదే పరిస్థితి తెలంగాణ బిజెపీలో కనిపించిందన్న విమర్శలు వినిపించాయి. నాయకుల మధ్య ఆధిపత్య పోరు, వర్గపోరాటాలు కార్యకర్తలను గందరగోళంలోకి నెట్టేశాయి. ఒక నాయకుడిని పొగిడితే మరో నాయకుడు అసహనం వ్యక్తం చేసే పరిస్థితి వచ్చిందని పార్టీ వర్గాల్లోనే చర్చ సాగింది. కేంద్ర మంత్రిగా ఉన్న కిషన్ రెడ్డి స్థానికంగా ప్రభావం చూపలేకపోయారన్న టాక్, బండి సంజయ్ కేంద్ర బాధ్యతల కారణంగా తెలంగాణపై ఫోకస్ తగ్గిందన్న విమర్శలు బలంగా వినిపించాయి.
ఈ అంతర్గత కలహాల మధ్య బిజెపి ప్రతిపక్ష పాత్రను సరిగా పోషించలేకపోయిందని ప్రజల్లో అభిప్రాయం ఏర్పడింది. ఫలితంగా 2025లో బిజెపి పార్టీ తెలంగాణలో తన రాజకీయ గ్రాఫ్ను కోల్పోయిందని, మూడో స్థానం నుంచి నాలుగో స్థానానికి పడిపోయే స్థాయికి పరిస్థితి చేరిందని రాజకీయ విశ్లేషకులు అంటున్నారు. మొత్తం మీద 2025 సంవత్సరం బిఆర్ఎస్, బిజెపీలకు చేదు అనుభవాలను మిగిల్చిందనే చెప్పాలి.
