తెలంగాణ రాజకీయాల్లో మాటల యుద్ధం మరింత దిగజారుతోంది. బీఆర్ఎస్ వర్కింగ్ ప్రెసిడెంట్ కేటీఆర్ చేసిన తీవ్ర వ్యాఖ్యలు ఇప్పుడు రాష్ట్ర రాజకీయ వర్గాల్లో పెద్ద చర్చకు దారి తీస్తున్నాయి. కాంగ్రెస్ అగ్రనేత రాహుల్ గాంధీతో పాటు సీఎం రేవంత్ రెడ్డిని ఉద్దేశించి కేటీఆర్ చేసిన వ్యాఖ్యలు తీవ్ర వివాదాస్పదంగా మారాయి.
రాహుల్ గాంధీ రేవంత్ రెడ్డిని తెలంగాణపైకి “వదిలాడ”ని వ్యాఖ్యానించిన కేటీఆర్.. అసెంబ్లీ ఎన్నికల సమయంలో వరంగల్ అశోక్ నగర్ సభల్లో ఇచ్చిన హామీలను అమలు చేయకపోవడాన్ని తీవ్రంగా తప్పుబట్టారు. రైతులు, మహిళలు, యువతకు ఇచ్చిన హామీలన్నీ మోసమేనని విమర్శించారు.
రైతు భరోసా, రైతు కూలీలకు ఆర్థిక సహాయం, మహిళలకు ఆర్థిక సాయం, యువతకు ఉద్యోగాలు వంటి అంశాలపై కాంగ్రెస్ ప్రభుత్వం విఫలమైందని ఆరోపించారు. అశోక్ నగర్ సభలో రెండు లక్షల ఉద్యోగాలు ఇస్తామన్న హామీ ఏమైందని ప్రశ్నించారు. కళ్యాణలక్ష్మి, షాదీ ముబారక్ పథకాల కింద తులం బంగారం ఇస్తామని చెప్పి మోసం చేశారంటూ మండిపడ్డారు.
కేటీఆర్ వ్యాఖ్యల్లో ప్రధానంగా రాజకీయ భాషపై కూడా చర్చ మొదలైంది. సీఎం హోదాలో ఉన్న వ్యక్తి రోజూ అసెంబ్లీలో, బయట కూడా అనుచిత వ్యాఖ్యలు చేస్తున్నారని విమర్శించారు. ఈ స్థాయి మాటలు రాజకీయాల పట్ల ప్రజల్లో విరక్తి పెంచుతున్నాయన్న అభిప్రాయం వ్యక్తమవుతోంది. ముఖ్యంగా యువత, విద్యార్థులు రాజకీయ ప్రసంగాలు వినలేని స్థితి వచ్చిందన్న విమర్శలు వినిపిస్తున్నాయి.
ఇక కేసీఆర్ అసెంబ్లీకి రావాలన్న అంశంపైనా కేటీఆర్ స్పందించారు. నదీజలాల అంశంలో తెలంగాణకు అన్యాయం జరుగుతోందని కేసీఆర్ ప్రెస్ మీట్ ద్వారా వివరించారని, అదే విషయాన్ని అసెంబ్లీలో మాట్లాడితే సరిపోతుందని కాంగ్రెస్ విమర్శిస్తోందన్నారు. అయితే ప్రతిపక్ష నాయకుడిగా కేసీఆర్ అసెంబ్లీకి రావాల్సిన అవసరం ఉందన్న వాదన కూడా బలంగా వినిపిస్తోంది.
రాజకీయంగా చూస్తే.. అధికార కాంగ్రెస్, ప్రతిపక్ష బీఆర్ఎస్ మధ్య వ్యక్తిగత విమర్శలు హద్దులు దాటుతున్నాయన్న అభిప్రాయం రాజకీయ విశ్లేషకుల్లో ఉంది. సమస్యలపై చర్చ తగ్గి, వ్యక్తిగత దూషణలే ప్రధానంగా మారాయని అంటున్నారు. ఇది ప్రజాస్వామ్యానికి ప్రమాదకర సంకేతమని పలువురు అభిప్రాయపడుతున్నారు.
ప్రజలు ఎన్నుకున్న ప్రతినిధులు వ్యక్తిగత ఆగ్రహాన్ని కాకుండా ప్రజా సమస్యలను అసెంబ్లీలో చర్చించాల్సిన అవసరం ఉందని, లేదంటే రాజకీయ వ్యవస్థపై ప్రజల నమ్మకం మరింత దెబ్బతింటుందని విశ్లేషకులు హెచ్చరిస్తున్నారు.
