తెలంగాణ జలవనరులపై మళ్లీ చర్చ మొదలైంది. కృష్ణా నదీ జలాల పంపిణీపై కర్ణాటక, మహారాష్ట్ర స్పష్టమైన నిర్ణయాలు తీసుకుంటున్న తరుణంలో, తెలంగాణ ప్రభుత్వం మాత్రం మౌనం వహించడం వివాదాస్పదంగా మారింది.
ఇటీవల కర్ణాటక ప్రభుత్వం “మేము 112 టీఎంసీల కృష్ణా నీటిని ఆపుకుంటాం” అని కేంద్రానికి లేఖ రాయగా, మహారాష్ట్ర ప్రభుత్వం కూడా “మాకు వరద జలాలపై ప్రాజెక్టులు కట్టుకునే హక్కు ఇవ్వాలి. నియమ నిబంధనలు వర్తిస్తే మేమూ కట్టుతాం” అని స్పష్టం చేసింది. దీనితో రెండు రాష్ట్రాలు కృష్ణా జలాలపై గట్టి పట్టుబడుతున్నాయి.
ఇంత జరుగుతున్నా తెలంగాణ ముఖ్యమంత్రి రేవంత్ రెడ్డి మాత్రం స్పందించకపోవడం పట్ల విమర్శలు వెల్లువెత్తుతున్నాయి. రేవంత్ రెడ్డి “రాష్ట్ర ప్రయోజనాల కోసం నోరు మూసుకున్నారు” అని ప్రతిపక్ష నేతలు ఆరోపిస్తున్నారు.
“కర్ణాటక 112 టీఎంసీలు, మహారాష్ట్ర 74 టీఎంసీలు ఆపుకుంటే తెలంగాణకు కృష్ణా నీళ్లు ఎక్కడి నుంచి వస్తాయి? ఈ పరిస్థితి రేవంత్ రెడ్డి నిర్లక్ష్యం వల్లే వచ్చింది,” అని విమర్శకులు అంటున్నారు.
ప్రతిపక్ష నేతలు ప్రశ్నిస్తున్నారు:
- రేవంత్ రెడ్డి ఎందుకు కేంద్రానికి కౌంటర్ లేఖ ఇవ్వలేదు?
- అపెక్స్ కమిటీ మీటింగ్లో రాష్ట్ర హక్కులను ఎందుకు గట్టిగా ప్రస్తావించలేదు?
- అవసరమైతే సుప్రీంకోర్టుకు ఎందుకు వెళ్లడం లేదు?
కృష్ణా జలాల పంపిణీపై 2009లో జరిగిన అంతర్రాష్ట్ర ఒప్పందం ప్రకారం, పోలవరం ప్రాజెక్ట్ అప్రూవల్ వచ్చాక 80 టీఎంసీల నీరు మళ్లింపు జరిగితే, నాగార్జునసాగర్ పైన కర్ణాటకకు 45 టీఎంసీలు, మహారాష్ట్రకు 35 టీఎంసీలు ఇచ్చే నిబంధన ఉంది. అదే రేషియో ఇప్పుడు కర్ణాటక (112 టీఎంసీలు) మరియు మహారాష్ట్ర (74 టీఎంసీలు) ఆధారంగా వాదన పెడుతున్నాయి.
ఇప్పుడు ఈ రెండు రాష్ట్రాలు కృష్ణా జలాలను నిలిపేస్తే, మధ్యలో ఉన్న తెలంగాణ మహబూబ్నగర్, నల్లమల ప్రాంతాలు తీవ్రమైన నీటి కొరత ఎదుర్కోవాల్సి ఉంటుంది.
ప్రజల్లో కూడా ప్రశ్నలు వినిపిస్తున్నాయి:
“రేవంత్ రెడ్డి నిజంగా నల్లమల బిడ్డ అయితే, కృష్ణా నదిపై జరుగుతున్న అన్యాయంపై ఎందుకు మౌనం వహిస్తున్నాడు?”
రాష్ట్ర ప్రజల అంచనాలు స్పష్టంగా ఉన్నాయి —
తెలంగాణ నీళ్ల హక్కు కోసం గట్టిగా నిలబడే నాయకత్వం కావాలి, కానీ మౌనం కాదు.
