Supreme Court of India రిజర్వేషన్ వ్యవస్థపై చేసిన తాజా వ్యాఖ్యలు దేశవ్యాప్తంగా చర్చనీయాంశంగా మారాయి. ఒకసారి రిజర్వేషన్ల ద్వారా సామాజిక, ఆర్థిక మార్పు వచ్చిన తర్వాత అదే కుటుంబానికి తరతరాలుగా రిజర్వేషన్లు కొనసాగించాలా అనే అంశంపై సుప్రీంకోర్టు కీలక ప్రశ్నలు లేవనెత్తింది.
కర్ణాటక హైకోర్టు తీర్పును సవాల్ చేస్తూ దాఖలైన పిటిషన్ విచారణ సందర్భంగా న్యాయస్థానం వ్యాఖ్యానిస్తూ, “ఒక కుటుంబంలో తల్లిదండ్రులు ఐఏఎస్, ఐపీఎస్ వంటి ఉన్నత స్థానాలకు చేరిన తర్వాత ఆ కుటుంబ పరిస్థితులు పూర్తిగా మారిపోతాయి. అలాంటి కుటుంబాలను క్రమంగా రిజర్వేషన్ వ్యవస్థ నుంచి బయటకు తీసుకురావాల్సిన అవసరం ఉందా అనే అంశంపై ఆలోచించాలి” అని అభిప్రాయపడినట్టు సమాచారం.
అలాగే “ఇలాగే తరతరాలకు రిజర్వేషన్లు కొనసాగితే ఎప్పటికీ రిజర్వేషన్ వ్యవస్థ నుంచి బయటపడలేం” అని కూడా కోర్టు వ్యాఖ్యానించినట్టు తెలుస్తోంది. ఈడబ్ల్యూఎస్ కోటా, క్రీమీ లేయర్ భావనలు వేర్వేరని, రిజర్వేషన్ల అమలులో సమతుల్యత అవసరమని న్యాయస్థానం అభిప్రాయపడింది.
రిజర్వేషన్ల ప్రయోజనాలు అన్ని వర్గాలకు సమానంగా చేరడం లేదనే వాదనలు చాలా కాలంగా వినిపిస్తున్నాయి. ముఖ్యంగా బీసీ, ఎస్సీ, ఎస్టీ వర్గాల్లోనే కొంతమంది కుటుంబాలు వరుసగా అవకాశాలు పొందుతుండగా, ఇంకా వెనుకబడిన ఉపవర్గాలకు ఆశించిన స్థాయిలో ప్రయోజనాలు అందడం లేదని పలువురు సామాజికవేత్తలు చెబుతున్నారు.
ఈ నేపథ్యంలోనే క్రీమీ లేయర్ విధానాన్ని మరింత కఠినంగా అమలు చేయాలనే డిమాండ్లు కూడా పెరుగుతున్నాయి. ఇప్పటికే ఉన్నత ఉద్యోగాలు, మంచి ఆర్థిక స్థితి కలిగిన కుటుంబాలకు మళ్లీ అదే రిజర్వేషన్ ప్రయోజనాలు అవసరమా అనే ప్రశ్న ముందుకు వస్తోంది.
అయితే ఈ వ్యాఖ్యలపై భిన్నాభిప్రాయాలు వ్యక్తమవుతున్నాయి. ఒక వర్గం దీన్ని సమాజంలో నిజంగా వెనుకబడిన వారికి అవకాశాలు చేరే దిశగా మంచి అడుగుగా చూస్తుండగా, మరో వర్గం మాత్రం రాజ్యాంగ హక్కులపై ప్రభావం పడే అవకాశం ఉందని ఆందోళన వ్యక్తం చేస్తోంది.
రిజర్వేషన్ వ్యవస్థలో సంస్కరణలు అవసరమా? అవసరమైతే ఎలా అమలు చేయాలి? అనే చర్చ ఇప్పుడు మరింత వేడెక్కే అవకాశాలు కనిపిస్తున్నాయి.
