జూబ్లీహిల్స్ ఉపఎన్నికను దృష్టిలో పెట్టుకొని తెలంగాణ రాజకీయాల్లో వేడి చెలరేగింది. ఈసారి కాంగ్రెస్ పార్టీ ప్రధానంగా మైనారిటీ ఓట్లను ఆకర్షించేందుకు వ్యూహాత్మకంగా పనిచేస్తోంది. ఈ క్రమంలో మాజీ క్రికెటర్, కాంగ్రెస్ సీనియర్ నేత మొహమ్మద్ అజారుద్దీన్ కి మంత్రి పదవి ఇవ్వబోతున్నారనే వార్తలు వేగంగా వ్యాప్తి చెందుతున్నాయి.
విశ్వసనీయ వర్గాల సమాచారం ప్రకారం, ముందుగా అజారుద్దీన్ ను ఎమ్మెల్సీగా నియమించి, అనంతరం మంత్రివర్గంలో చేర్చే అవకాశం ఉందని చెబుతున్నారు. ఈ నిర్ణయం ద్వారా జూబ్లీహిల్స్ నియోజకవర్గంలోని మైనారిటీ ఓట్లను కాంగ్రెస్ వైపు తిప్పుకునే ప్రయత్నం చేస్తోందని తెలుస్తోంది.
జూబ్లీహిల్స్ నియోజకవర్గంలో లక్షకు పైగా మైనారిటీ ఓటర్లు ఉన్నారు. గత ఎన్నికల్లో వీరిలో ఎక్కువశాతం ఓట్లు బిఆర్ఎస్ వైపుకే మళ్లిన సంగతి తెలిసిందే. ఈసారి ఆ ఓట్లు కాంగ్రెస్ వైపుకి తిప్పే ప్రయత్నంలో అజారుద్దీన్ కి మంత్రిపదవి ప్రాధాన్యమైన పాత్ర పోషిస్తుందా అన్నది కీలకంగా మారింది.
అయితే, రాజకీయ విశ్లేషకులు మాత్రం దీనిని అనుమానాస్పదంగా చూస్తున్నారు. గత ఎన్నికల్లో అజారుద్దీన్ స్వయంగా పోటీ చేసినా పెద్దగా మైనారిటీ ఓట్లు ఆయనకు మళ్లలేదని, కేవలం మంత్రి పదవితో ఆ సమీకరణం పూర్తిగా మారదని భావిస్తున్నారు.
ఇక బిజెపి తరఫున కిషన్ రెడ్డి కూడా ఇదే నియోజకవర్గానికి చెందిన కీలక నేత. ఆయన మూడు సార్లు ఎంపీగా గెలిచినా అభివృద్ధి లోపం ఉందని ప్రజలు అసంతృప్తిగా ఉన్నారని చెబుతున్నారు. దీంతో బిజెపి ఓటు బ్యాంక్ ఎంత ప్రభావం చూపుతుందో చూడాలి.
ఇక టిడిపి ఓటు బ్యాంక్ కూడా కీలకం అవుతోంది. నారా లోకేష్, కేటీఆర్ల మధ్య జరిగిన భేటీతో టిడిపి ఓట్లు బిఆర్ఎస్ వైపు వెళ్లే అవకాశాలున్నాయనే టాక్ వినిపిస్తోంది. అదే సమయంలో టిడిపి, కాంగ్రెస్ కలిసే అవకాశం కూడా చర్చనీయాంశం అవుతోంది.
ఇక అజారుద్దీన్ కి మంత్రి పదవి ఇచ్చే ఆలోచన నిజమైతే, స్పోర్ట్స్ శాఖ ఇవ్వవచ్చని పార్టీ వర్గాలు భావిస్తున్నాయి. మాజీ క్రికెటర్ గా ఆయనకు ఆ శాఖ సరిపోతుందని అంచనా. కానీ ఈ నిర్ణయం కోమటరెడ్డి రాజగోపాల్ రెడ్డి వంటి సీనియర్ నేతల్లో అసంతృప్తి పెంచే ప్రమాదం కూడా ఉందని అంటున్నారు.
మొత్తంగా, జూబ్లీహిల్స్ ఉపఎన్నికలో మైనారిటీ ఓట్లపైనే ప్రధాన యుద్ధం నడుస్తోంది. అజారుద్దీన్ కి మంత్రి పదవి నిజమైతే, అది కాంగ్రెస్ కి బూస్ట్ అవుతుందా లేక అంతర్గత కలహాలకు దారితీస్తుందా అన్నది రాబోయే రోజుల్లో తేలనుంది.
