తెలంగాణలో మళ్లీ రాజకీయ వేడి చెలరేగింది. ముఖ్యమంత్రి రేవంత్ రెడ్డి నేతృత్వంలోని కాంగ్రెస్ ప్రభుత్వంపై బిఆర్ఎస్ తీవ్ర విమర్శలు గుప్పించింది. ఎన్నికల సమయంలో ఆటో డ్రైవర్స్కు ఇచ్చిన హామీలను కాంగ్రెస్ ప్రభుత్వం పూర్తిగా మోసం చేసిందని బిఆర్ఎస్ ఆరోపించింది.
2023 ఎన్నికల్లో కాంగ్రెస్ పార్టీ ప్రతి ఆటో డ్రైవర్కు సంవత్సరానికి ₹12,000 ఆర్థిక సాయం, ప్రమాద బీమా ₹10 లక్షల వరకు, ఆటో నగర్ నిర్మాణం, మరియు ఆటో డ్రైవర్స్ వెల్ఫేర్ బోర్డు ఏర్పాటు చేస్తామని హామీ ఇచ్చిన సంగతి తెలిసిందే. కానీ రెండు సంవత్సరాలు గడిచినా ఒక్క హామీ కూడా అమలు కాలేదని బిఆర్ఎస్ నేతలు ఆగ్రహం వ్యక్తం చేశారు
తెలంగాణ రాష్ట్రంలో దాదాపు ఆరు లక్షల ఆటో డ్రైవర్స్ ఉన్నారని, ప్రతి ఒక్కరికి ₹24,000 చొప్పున బకాయిలు చెల్లించాల్సి ఉందని — అంటే మొత్తం ₹1,500 కోట్ల రూపాయలు ఆటో డ్రైవర్స్కు ఇవ్వాల్సి ఉందని బిఆర్ఎస్ పేర్కొంది.
బస్సు ఛార్జీలు ఐదుసార్లు పెంచి మహిళలకు మాత్రమే ఉచిత ప్రయాణం ఇవ్వడం అన్యాయం అని బిఆర్ఎస్ నాయకులు విమర్శించారు. “మహిళలకు ఫ్రీ రైడ్ ఇస్తున్నారు కానీ పురుషులపై రెట్టింపు బారం వేస్తున్నారు. ఆటో డ్రైవర్స్ జీవితం నరకం అయిపోయింది,” అని పార్టీ ప్రతినిధి మండిపడ్డారు.
రాహుల్ గాంధీ హైదరాబాద్లో ఆటోలో ప్రయాణించి హామీలు ఇచ్చి వెళ్లిపోయారని, ఎన్నికల తర్వాత తిరిగి వెనక్కి చూడలేదని బిఆర్ఎస్ నాయకులు ఎద్దేవా చేశారు. “వోట్ల కోసం డ్రామా చేసి మాయమయ్యారు,” అని వ్యాఖ్యానించారు.
హైదరాబాద్లోని ఆటో డ్రైవర్స్ తమ సమస్యలను తెలియజేస్తూ — పెరుగుతున్న పెట్రోల్ ధరలు, చెడు రోడ్లు, తక్కువ ఆదాయం, మరియు రద్దయిన బీమా పథకాలు తమను తీవ్రంగా ఇబ్బంది పెడుతున్నాయని తెలిపారు. “కేసీఆర్ హయాంలో రోజుకు ₹1500-₹2000 సంపాదించేవాళ్లం. ఇప్పుడు ₹500 కూడా రావడం లేదు. ఆటోలు రోడ్లలో పాడైపోతున్నాయి, ప్రభుత్వం కనీసం అడుగడుగునా పట్టించుకోవడం లేదు,” అని ఒక ఆటో డ్రైవర్ వాపోయాడు.
బిఆర్ఎస్ పార్టీ వెంటనే ప్రతి ఆటో డ్రైవర్కు ₹24,000 చెల్లించాలని, ప్రమాదాల్లో ప్రాణాలు కోల్పోయిన 161 మంది కుటుంబాలకు ₹10 లక్షల పరిహారం ఇవ్వాలని, అలాగే రద్దయిన వెల్ఫేర్ పథకాలను తిరిగి ప్రారంభించాలని డిమాండ్ చేసింది.
“రేవంత్ రెడ్డి ‘ఫ్యూచర్ సిటీ’ పేరుతో వేల కోట్ల రూపాయలు ఖర్చు పెడతారు. కానీ పేద ఆటో డ్రైవర్స్ కోసం ఒక్క రూపాయి కూడా ఖర్చు పెట్టరా? రాబోయే జూబ్లీహిల్స్ ఉపఎన్నికలో ఆటో డ్రైవర్స్ ఈ ప్రభుత్వానికి గుణపాఠం చెబుతారు,” అని బిఆర్ఎస్ నేతలు హెచ్చరించారు.
