తెలంగాణ కాంగ్రెస్లో అంతర్గత విభేదాలు మరింత ముదురుతున్నాయనే చర్చ రాజకీయ వర్గాల్లో జోరుగా సాగుతోంది. నైనీ బొగ్గు గని వివాదం ఇప్పుడు ఢిల్లీ స్థాయికి చేరిందన్న వార్తలు హాట్ టాపిక్గా మారాయి. ముఖ్యమంత్రి రేవంత్ రెడ్డి ఇటీవల ఢిల్లీ పర్యటనలో కాంగ్రెస్ జాతీయ అధ్యక్షుడు మల్లికార్జున ఖర్గేతో భేటీ కావడం ఈ పరిణామాలకు మరింత ప్రాధాన్యం తీసుకొచ్చింది.
సమాచారం ప్రకారం నైనీ బొగ్గు బ్లాక్ వ్యవహారంలో తలెత్తిన వివాదానికి డిప్యూటీ సీఎం భట్టి విక్రమార్కే ప్రధాన కారణమని రేవంత్ రెడ్డి అధిష్టానానికి ఫిర్యాదు చేసినట్టు విశ్వసనీయ వర్గాలు చెబుతున్నాయి. దీనికి సంబంధించిన పలు ఆధారాలు, ఫిర్యాదుల వివరాలను కూడా ఖర్గే ముందు ఉంచినట్టు తెలుస్తోంది.
ఇటీవల మీడియా కథనాలు, ముఖ్యంగా నైనీ బొగ్గు గని టెండర్లో భారీ అవినీతి జరిగిందన్న ఆరోపణలు రాజకీయంగా పెద్ద దుమారం రేపాయి. ఈ పరిణామాలన్నింటినీ రేవంత్ రెడ్డి ఖర్గేకు వివరించినట్టు పార్టీ వర్గాలు చెబుతున్నాయి. భట్టి విక్రమార్కకు మీడియా సంస్థలతో ఉన్న సంబంధాలపై కూడా కొన్ని ఆధారాలు సమర్పించారనే ప్రచారం సాగుతోంది.
గతంలో వచ్చిన ఆరోపణల సమయంలో భట్టిని తానే కాపాడానని, కానీ ఇప్పుడు పరిస్థితి తన చేతుల్లో లేదని రేవంత్ రెడ్డి స్పష్టం చేసినట్టు సమాచారం. నైనీ వివాదం పార్టీకి, ప్రభుత్వానికి ఇబ్బందికరంగా మారిందని, ఇకపై రక్షించడం కష్టమని ఆయన పేర్కొన్నట్టు చెబుతున్నారు.
ఇదే సమయంలో ఇతర మంత్రులు ఉత్తమ్ కుమార్ రెడ్డి, పొంగులేటి శ్రీనివాస్ రెడ్డి, కొండా సురేఖలపై కూడా ఫిర్యాదులు చేసినట్టు ఢిల్లీ వర్గాల్లో చర్చ జరుగుతోంది. వారి శాఖల్లో అవినీతి ఆరోపణలకు సంబంధించిన వివరాలు కూడా సమర్పించారనే ప్రచారం ఉంది.
తెలంగాణ కాంగ్రెస్లో మంత్రుల మధ్య సమన్వయం లేకపోవడం, అంతర్గత అసంతృప్తి పెరుగుతుండడం పార్టీకి నష్టం కలిగించే ప్రమాదం ఉందని రాజకీయ విశ్లేషకులు భావిస్తున్నారు. మున్సిపల్ ఎన్నికల సమయంలో కూడా నేతల మధ్య ఐక్యత కనిపించలేదన్న అభిప్రాయాలు వ్యక్తమవుతున్నాయి.
ఇలా కాంగ్రెస్లో అంతర్గత విభేదాలు మరింత బహిర్గతమవుతున్న నేపథ్యంలో అధిష్టానం ఎలా స్పందిస్తుందన్నది ఆసక్తికరంగా మారింది. ఈ వివాదం ఎటు దారితీస్తుందో, పార్టీ నాయకత్వం ఎలాంటి నిర్ణయం తీసుకుంటుందో రాజకీయ వర్గాల్లో ఉత్కంఠ నెలకొంది.
