తెలంగాణ రాష్ట్రంలో ఇటీవల ముగిసిన సర్పంచ్ ఎన్నికల అనంతరం, ఇప్పుడు తదుపరి ఎన్నికలపై రాజకీయ వర్గాల్లో తీవ్ర చర్చ కొనసాగుతోంది. ముఖ్యంగా ఎంపీటీసీ, జెడ్పీటీసీ, మున్సిపల్ మరియు కార్పొరేషన్ ఎన్నికలు ఏవి ముందుగా నిర్వహిస్తారన్నదే ప్రధాన అంశంగా మారింది.
ఇటీవల కార్పొరేషన్లలో వార్డుల సంఖ్యను 150 నుంచి 300కు పెంచుతూ ప్రవేశపెట్టిన కొత్త మ్యాప్పై తీవ్ర వ్యతిరేకత వ్యక్తమవుతోంది. ఈ పునర్విభజన వెనుక రాజకీయ కుట్ర ఉందని బీజేపీ, బీఆర్ఎస్ నేతలు ఆరోపిస్తున్నారు. ముఖ్యంగా ఎంఐఎం ప్రభావం ఉన్న ప్రాంతాల్లోనే ఎక్కువగా వార్డుల విభజన జరిగిందని, హైదరాబాద్ శివార్లలో ఎక్కువ ఓటర్లు ఉన్న ప్రాంతాలను విభజించలేదని విమర్శిస్తున్నారు.
ఈ మ్యాప్ ఆధారంగానే కార్పొరేషన్ ఎన్నికలకు వెళ్లే ప్రయత్నం జరుగుతుందా? లేక వివాదాల కారణంగా మళ్లీ వాయిదా పడతాయా? అనే అనుమానాలు వ్యక్తమవుతున్నాయి.
ఇదే సమయంలో ఎంపీటీసీ–జెడ్పీటీసీ ఎన్నికలు ఎప్పుడైనా రావచ్చని భావిస్తూ గ్రామీణ రాజకీయ నాయకులు ఇప్పటికే సిద్ధమవుతున్నారు. అయితే సీఎం రేవంత్ రెడ్డి, బీసీ రిజర్వేషన్లపై అసెంబ్లీలో చర్చించిన తర్వాతే ఈ ఎన్నికలపై నిర్ణయం తీసుకుంటామని ప్రకటించడంతో, ఇప్పట్లో ఎన్నికలు జరగవన్న అభిప్రాయం బలపడుతోంది.
42 శాతం బీసీ రిజర్వేషన్ల అంశం మళ్లీ కీలకంగా మారింది. గతంలో సర్పంచ్ ఎన్నికల సమయంలో జీవో ద్వారా సమస్యను అధిగమించినప్పటికీ, ఇప్పుడు ఎంపీటీసీ–జెడ్పీటీసీ ఎన్నికల విషయంలోనూ ఇదే అంశం అడ్డంకిగా మారుతుందనే ఆందోళన బీసీ వర్గాల్లో కనిపిస్తోంది.
మొత్తానికి, తెలంగాణలో తదుపరి ఎన్నికలపై స్పష్టత రావాలంటే అసెంబ్లీ సమావేశాల తర్వాతే నిర్ణయం వెలువడే అవకాశం ఉందని రాజకీయ వర్గాలు అంచనా వేస్తున్నాయి.
