తరాలు మారినా వినోదాన్ని పంచే సినిమాలు కొన్ని మాత్రమే ఉంటాయి. అలాంటి క్లాసిక్ చిత్రాల్లో ఎన్టీఆర్–ఏఎన్నార్ కాంబినేషన్లో వచ్చిన ‘గుండమ్మ కథ’కు తెలుగు సినిమా చరిత్రలో ప్రత్యేక స్థానం ఉంది. ఆరు దశాబ్దాలు గడిచినా ఆ సినిమా ఇప్పటికీ ప్రేక్షకుల మనసుల్లో నిలిచిపోయిందంటే దాని గొప్పతనం ప్రత్యేకంగా చెప్పనక్కర్లేదు. ఇప్పటి జనరేషన్ యువతకు కూడా ‘గుండమ్మ కథ’ పేరు తల్లిదండ్రుల ద్వారా పరిచయమవుతూనే ఉంది.
ఇలాంటి అరుదైన క్లాసిక్ సినిమాల సరసన ఇప్పుడు ‘నువ్వు నాకు నచ్చావ్’ చిత్రాన్ని పోల్చడం విశేషంగా మారింది. విక్టరీ వెంకటేష్ హీరోగా నటించిన ఈ సినిమా ఇటీవల రీ రిలీజ్ అయింది. ఈ సందర్భంగా జరిగిన ప్రమోషన్లలో నిర్మాత స్రవంతి రవికిషోర్, మాటల మాంత్రికుడు త్రివిక్రమ్ శ్రీనివాస్ పాల్గొని ఆసక్తికర విషయాన్ని వెల్లడించారు.
సినిమా విడుదలకు ముందు రామానాయుడు ఫ్యామిలీ కోసం స్టూడియోలో ప్రత్యేక ప్రివ్యూ నిర్వహించగా, ఆ సమయంలో వెంకటేష్ సతీమణి నీరజ చేసిన వ్యాఖ్య ఇప్పుడు చర్చనీయాంశంగా మారింది. సినిమా చూసిన అనంతరం ఆమె మాట్లాడుతూ, “ఇప్పుడు మనం మనసు బాగోలేనప్పుడు ఎలా ‘గుండమ్మ కథ’ చూస్తామో, రాబోయే తరాలు కూడా అలాగే ‘నువ్వు నాకు నచ్చావ్’ సినిమాను చూస్తాయి” అని అన్నారట. ఆ మాటలు తనకు ఇప్పటికీ గుర్తున్నాయని, అవి అక్షరాల నిజమని త్రివిక్రమ్ తెలిపారు.
సాధారణంగా సినిమా ఈవెంట్స్కు, మీడియాకు దూరంగా ఉండే నీరజ నుంచి ఇలాంటి లోతైన జడ్జ్మెంట్ రావడం విశేషమని సినీ వర్గాలు అభిప్రాయపడుతున్నాయి. కుటుంబానికే ఎక్కువ ప్రాధాన్యం ఇచ్చే ఆమె మాటలు త్రివిక్రమ్ను కూడా ఆకట్టుకున్నాయని తెలిపారు.
2001లో కేవలం 7 కోట్ల బడ్జెట్తో రూపొందిన ‘నువ్వు నాకు నచ్చావ్’ సినిమా బాక్సాఫీస్ వద్ద సుమారు 18 కోట్ల రూపాయల వసూళ్లు సాధించింది. స్వచ్ఛమైన వినోదం, కుటుంబ విలువలు, సహజమైన హాస్యంతో ఈ సినిమా కాలాతీత క్లాసిక్గా మారింది. అందుకే నేటికీ ప్రేక్షకులు ఈ సినిమాను మళ్లీ మళ్లీ చూడాలనుకుంటున్నారని, ‘గుండమ్మ కథ’లా తరతరాలకు నచ్చే చిత్రంగా నిలుస్తోందని సినీ విశ్లేషకులు చెబుతున్నారు.
