తెలంగాణలో రిటైర్డ్ ఉద్యోగుల బకాయిల సమస్య మరోసారి రాజకీయ దుమారానికి కారణమైంది. తమకు రావాల్సిన రిటైర్మెంట్ బెనిఫిట్స్ ఇప్పటికీ విడుదల చేయకపోవడంపై ఆగ్రహంతో రిటైర్డ్ ఉద్యోగులు, ఉద్యోగ సంఘాల నేతలు రాజ్యసభ సభ్యురాలు రేణుక చౌదరి నివాసాన్ని ముట్టడించారు.
రిటైర్ అయిన ఉద్యోగులకు రావాల్సిన గ్రాట్యుటీ, జీపీఎఫ్, టీజీఎల్ఐ, డీఏలు, పీఆర్సీ వంటి బెనిఫిట్స్ రెండేళ్లుగా పెండింగ్లో ఉన్నాయని వారు ఆవేదన వ్యక్తం చేశారు. ఒక్కొక్కరికి 45 లక్షల నుంచి 60 లక్షల రూపాయల వరకు బకాయిలు ఉన్నప్పటికీ ప్రభుత్వం వాటిని విడుదల చేయడంలో నిర్లక్ష్యం చూపుతోందని ఆరోపించారు.
గతంలో అసెంబ్లీ ముట్టడి, చలో అసెంబ్లీ, చలో ఏజీ ఆఫీస్ వంటి ఉద్యమాలు చేసినా ప్రభుత్వ వైఖరిలో మార్పు లేదని ఉద్యోగ సంఘాల నేతలు తెలిపారు. ఈ సమస్యపై మాట్లాడినందుకు అరెస్టులు కూడా ఎదుర్కొన్నామని పేర్కొన్నారు. ఇప్పటివరకు దాదాపు 43 నుంచి 50 మంది రిటైర్డ్ ఉద్యోగులు బకాయిలు అందక మరణించారని, మరికొందరు తీవ్ర అనారోగ్యంతో ఆసుపత్రుల్లో ఉన్నారని ఆందోళన వ్యక్తం చేశారు.
ప్రభుత్వం వద్ద డబ్బులు లేవని చెప్పడం సరికాదని, కాగ్ రిపోర్ట్ ప్రకారం రిటైర్డ్ ఉద్యోగుల బెనిఫిట్స్ కోసం బడ్జెట్ కేటాయింపులు ఉన్నాయని వారు తెలిపారు. ఆ నిధులను ఇతర పథకాలకు డైవర్ట్ చేసి తమ డబ్బులను ఉపయోగించుకుంటున్నారని ఆరోపించారు.
ఈ నేపథ్యంలో రాష్ట్ర ప్రభుత్వం స్పందించకపోవడంతో, కేంద్ర స్థాయిలో విషయం లేవనెత్తాలనే ఉద్దేశంతో రాజ్యసభ సభ్యురాలైన రేణుక చౌదరిని కలవడానికి వచ్చినట్లు ఉద్యోగ సంఘాల నేతలు తెలిపారు. కాంగ్రెస్ పార్టీకి చెందిన సీనియర్ నాయకురాలిగా, పార్లమెంట్లో ఈ అంశాన్ని ప్రస్తావించి న్యాయం చేయాలని ఆమెను కోరారు.
“మేము దాచుకున్న మా సొంత డబ్బులే ఇవి. వృద్ధాప్యంలో ఉన్న మాకు చనిపోకముందే మా డబ్బులు ఇవ్వండి” అంటూ రిటైర్డ్ ఉద్యోగులు భావోద్వేగంగా విజ్ఞప్తి చేశారు. ఉచిత పథకాలు, ఇతర కార్యక్రమాలకంటే ముందు రిటైర్డ్ ఉద్యోగుల బకాయిలు చెల్లించాలని డిమాండ్ చేశారు.
పరిస్థితి ఉద్రిక్తంగా మారడంతో భద్రతా సిబ్బంది రంగంలోకి దిగారు. చివరకు రిటైర్డ్ ఉద్యోగులను లోపలికి అనుమతించగా, రేణుక చౌదరి వారితో మాట్లాడేందుకు సిద్ధమైనట్లు సమాచారం. ఆమె స్పందన ఎలా ఉండబోతుందన్నది ఇప్పుడు రాజకీయ వర్గాల్లో ఆసక్తిగా మారింది.
