తెలంగాణ పోలీస్ ఆఫీసర్స్ రీట్రీట్ 2026 కార్యక్రమంలో ముఖ్యమంత్రి Revanth Reddy చేసిన వ్యాఖ్యలు రాష్ట్ర రాజకీయాల్లో పెద్ద చర్చకు దారితీశాయి. ప్రజల ప్రవర్తనలో మార్పు రావాలని, నేరాల స్వరూపం మారుతున్న నేపథ్యంలో పోలీసు వ్యవస్థ కూడా అప్గ్రేడ్ కావాల్సిన అవసరం ఉందని సీఎం పేర్కొన్నారు.
అమెరికాకు వెళ్తే మనం ఒక విధంగా ప్రవర్తిస్తామని, కానీ భారతదేశంలో అదే క్రమశిక్షణ పాటించమని ఆయన ఉదాహరణ ఇచ్చారు. అక్కడ వాటర్ బాటిల్ను డస్ట్బిన్లో వేస్తామని, కానీ ఇక్కడ రోడ్ల మీద పడేస్తామని ప్రజలే ఆలోచించుకోవాల్సిన అవసరం ఉందని సీఎం అన్నారు.
అలాగే సంక్షేమ పథకాలు ఎక్కువగా ఉన్నాయని, ప్రభుత్వానికి లావిష్ లైఫ్ అనుభవించేందుకు నిధులు లేవని కూడా ఆయన వ్యాఖ్యానించారు. రాష్ట్ర అభివృద్ధి కోసం శాంతి భద్రతలు అత్యంత కీలకమని, పాలసీ పరాలసిస్ ఉండకూడదని తెలిపారు.
ఇక పెట్టుబడులను ఆకర్షించేందుకు ఔటర్ రింగ్ రోడ్ లోపల ఉన్న దాదాపు 2100 చదరపు కిలోమీటర్ల ప్రాంతాన్ని కోర్ అర్బన్ రీజియన్గా గుర్తించామని ఆయన వివరించారు. భవిష్యత్ అభివృద్ధిని దృష్టిలో ఉంచుకొని “తెలంగాణ రైజింగ్ 2047” పాలసీ డాక్యుమెంట్ను కూడా రూపొందించామని చెప్పారు.
అయితే సీఎం వ్యాఖ్యలపై ప్రతిపక్షాలు మరియు కొంతమంది సామాజిక వర్గాలు తీవ్రంగా స్పందిస్తున్నాయి. ప్రజలు మారాలని చెప్పే ముందు ప్రభుత్వ విధానాల్లో మార్పు రావాలని వారు అంటున్నారు. రాష్ట్రంలో నిరుద్యోగ సమస్య, అవుట్సోర్సింగ్ ఉద్యోగుల సమస్యలు, రిటైర్డ్ ఉద్యోగుల పెండింగ్ బకాయిలు వంటి అనేక అంశాలు ఇంకా పరిష్కారం కాలేదని విమర్శిస్తున్నారు.
ఇక నైట్ లైఫ్ పాలసీపై కూడా వివాదం కొనసాగుతోంది. నైట్ లైఫ్ వల్ల యువతపై ప్రతికూల ప్రభావం పడే అవకాశం ఉందని, నిజమైన ఉపాధి అవకాశాలు కల్పించాల్సింది పోయి ఇటువంటి విధానాలపై ప్రభుత్వం దృష్టి పెడుతోందని విమర్శలు వస్తున్నాయి.
మొత్తానికి సీఎం వ్యాఖ్యలు, ప్రభుత్వ విధానాలపై తెలంగాణ రాజకీయాల్లో మళ్లీ చర్చలు వేడెక్కాయి.
