తెలంగాణలో బీసీ రాజకీయాలపై మరోసారి చర్చకు దారితీసేలా కాసాని జ్ఞానేశ్వర్ రెడ్డి చేసిన వ్యాఖ్యలు ప్రస్తుతం రాజకీయ వర్గాల్లో హాట్ టాపిక్గా మారాయి. ఒకప్పుడు 93 కులాలను ఏకం చేస్తూ భారీ సామాజిక ఉద్యమానికి శ్రీకారం చుట్టిన తాను, అప్పట్లో ఉద్యమం అదే వేగంతో కొనసాగి ఉంటే ఈరోజు తెలంగాణకు బీసీ ముఖ్యమంత్రి అయ్యే పరిస్థితి వచ్చేదని ఆయన పేర్కొన్నారు.
93 కులాల కాన్సెప్ట్ను తీసుకొచ్చి, ప్రతి కులానికి ప్రత్యేక గుర్తింపు కల్పించే ప్రయత్నం చేశామని, ప్రతి కులంపై పాటలు రాయించి, బ్యానర్లు కట్టి సామాజిక చైతన్యం తీసుకొచ్చామని కాసాని గుర్తు చేసుకున్నారు. “ప్రతి జిల్లాలో బస్సులు వేసి ప్రజలను మీటింగ్లకు తీసుకొచ్చాం. ఉదయం నుంచి రాత్రి వరకు వందలాది మంది నాయకులు మాట్లాడేలా సభలు నిర్వహించాం. ఆ రోజుల్లో అది ఒక ప్రభంజనం” అని అన్నారు.
తన ఉద్యమాన్ని అడ్డుకునేందుకు అప్పట్లో అనేక కుట్రలు జరిగాయని కూడా ఆయన ఆరోపించారు. “జ్ఞానేశ్వర్ మీటింగ్కు వెళ్లొద్దని ప్రచారం చేశారు. బీసీల్లోనే ఒకరితో ఒకరిని వ్యతిరేకింపజేశారు. అయినా ఉద్యమం ఆగలేదు” అని పేర్కొన్నారు.
రాజకీయ పార్టీలు బీసీ రిజర్వేషన్ల పేరుతో కేవలం రాజకీయ లబ్ధి కోసం మాత్రమే మాట్లాడుతున్నాయని, కానీ విద్య, ఉపాధి, ఉద్యోగ అవకాశాల వంటి అసలు సమస్యలను పట్టించుకోవడం లేదని ఆయన విమర్శించారు. “ఫీజు రీయింబర్స్మెంట్ రాక ఇబ్బంది పడేది ఎక్కువగా బీసీ విద్యార్థులే. కానీ దాని గురించి ఎవ్వరూ మాట్లాడరు” అని అన్నారు.
తన ఉద్యమం నుంచి తయారైన అనేక మంది కళాకారులు, నాయకులు తర్వాత ఇతర పార్టీల్లో ఎదిగారని కాసాని పేర్కొన్నారు. తెలంగాణ ఉద్యమ సమయంలో ప్రముఖంగా వినిపించిన కొన్ని పాటలు కూడా తమ వేదికల నుంచే వెలుగులోకి వచ్చాయని తెలిపారు.
బీసీ ఉద్యమం ఇంకా పూర్తికాలేదని, అవసరం అయితే మళ్లీ “మన పార్టీ” జెండాను ఎగురవేస్తామని ఆయన స్పష్టం చేశారు. “వ్యవస్థ బలంగా ఉంటే జనం ఆటోమేటిక్గా వస్తారు. మనం ఎవరిని వెంబడించాల్సిన అవసరం లేదు” అని అన్నారు.
2003లో నిర్వహించిన భారీ బీసీ సభను గుర్తు చేసుకుంటూ, “హైదరాబాద్ మొత్తం జామ్ అయిపోయింది. వేలాది మంది స్వచ్ఛందంగా వచ్చారు. ఒక్క రూపాయి కూడా ఎవరికీ ఇవ్వలేదు. తమ ఖర్చులతోనే వచ్చారు” అని తెలిపారు.
వైఎస్ రాజశేఖర్ రెడ్డి, కేసీఆర్లతో తనకు ఉన్న వ్యక్తిగత అనుబంధాల గురించి కూడా కాసాని మాట్లాడారు. “కేసీఆర్ నన్ను ‘జ్ఞాను’ అని పిలిచేవారు. బీసీలకు న్యాయం చేయాలని నేను ఎప్పుడూ నేరుగా చెప్పేవాడిని” అని పేర్కొన్నారు.
ప్రస్తుతం రాష్ట్రంలో బీసీ రాజకీయాలపై మళ్లీ చర్చ జరుగుతున్న సమయంలో కాసాని చేసిన ఈ వ్యాఖ్యలు రాజకీయంగా ప్రాధాన్యత సంతరించుకున్నాయి.
