తెలంగాణలో విద్యారంగాన్ని కొత్త దిశగా తీసుకెళ్లే లక్ష్యంతో ప్రభుత్వం తెలంగాణ పబ్లిక్ స్కూల్స్ వ్యవస్థకు శ్రీకారం చుట్టిందని విద్యాశాఖ మంత్రి తెలిపారు. ఆరుట్ల తెలంగాణ పబ్లిక్ స్కూల్ ప్రారంభోత్సవ కార్యక్రమంలో మాట్లాడిన ఆయన, ప్రభుత్వ పాఠశాలలు కూడా ప్రైవేట్ కార్పొరేట్ స్కూల్స్కు ఏమాత్రం తీసిపోకుండా అన్ని ఆధునిక సౌకర్యాలతో ఉండాలన్నదే ముఖ్యమంత్రి రేవంత్ రెడ్డి విజన్ అని పేర్కొన్నారు.
గతంలో ప్రభుత్వ పాఠశాలలు మౌలిక సదుపాయాల కొరతతో ఉండేవని, అయితే ఇప్పుడు పరిస్థితులు పూర్తిగా మారుతున్నాయని చెప్పారు. ఆరుట్లలో నిర్మించిన తెలంగాణ పబ్లిక్ స్కూల్లో కార్పొరేట్ పాఠశాలల్లో ఉండే దాదాపు అన్ని సౌకర్యాలు కల్పించామని తెలిపారు. విద్యార్థులకు ఉత్తమమైన విద్యా వాతావరణం అందించడమే ప్రభుత్వ ప్రధాన లక్ష్యమని అన్నారు.
అయితే కేవలం భవనాలు, మౌలిక సదుపాయాలు మాత్రమే కాకుండా విద్యా నాణ్యత పెంపుపై కూడా ప్రభుత్వం దృష్టి సారించిందని మంత్రి వెల్లడించారు. విద్యార్థుల లెర్నింగ్ అవుట్కమ్స్ మెరుగుపడేలా ప్రత్యేక చర్యలు తీసుకుంటున్నామని చెప్పారు. అర్హత కలిగిన ఉపాధ్యాయులతో పాటు పీఈటీలు, మ్యూజిక్ టీచర్లు, ఆర్ట్స్ అండ్ క్రాఫ్ట్స్ బోధకులను కూడా నియమించే అవకాశాన్ని తెలంగాణ పబ్లిక్ స్కూల్ వ్యవస్థ కల్పిస్తోందని వివరించారు.
ప్రతి మండలంలోనూ ఇలాంటి ఆధునిక పాఠశాలలను ఏర్పాటు చేయాలన్న ముఖ్యమంత్రి ఆదేశాల మేరకు విద్యాశాఖ ఇప్పటికే కార్యాచరణ ప్రారంభించిందని తెలిపారు. విద్యార్థులకు నాణ్యమైన విద్యతో పాటు సమగ్ర అభివృద్ధికి అవసరమైన అన్ని అవకాశాలు కల్పించేందుకు ప్రభుత్వం కట్టుబడి ఉందని స్పష్టం చేశారు.
