తెలంగాణ రాష్ట్ర విద్యా వ్యవస్థలో నెలకొన్న సమస్యలను పరిష్కరించాలని డిమాండ్ చేస్తూ అఖిల భారతీయ విద్యార్థి పరిషత్ (ఏబీవీపీ) ఆధ్వర్యంలో హైదరాబాద్లోని స్కూల్ ఎడ్యుకేషన్ డైరెక్టరేట్ కార్యాలయం వద్ద భారీ నిరసన కార్యక్రమం నిర్వహించారు. రాష్ట్రం నలుమూలల నుంచి వచ్చిన విద్యార్థులు, ఏబీవీపీ కార్యకర్తలు పెద్ద ఎత్తున పాల్గొని విద్యాశాఖ కార్యాలయాన్ని ముట్టడించేందుకు ప్రయత్నించారు.
ప్రభుత్వ పాఠశాలల సంఖ్యను తగ్గించే రేషనలైజేషన్ విధానాన్ని వెంటనే ఉపసంహరించుకోవాలని ఏబీవీపీ నాయకులు డిమాండ్ చేశారు. వేలాది ప్రభుత్వ పాఠశాలలను మూసివేసే ప్రయత్నం పేద, బడుగు, బలహీన వర్గాల విద్యార్థుల భవిష్యత్తును ప్రమాదంలోకి నెడుతుందని వారు ఆరోపించారు.
ప్రభుత్వ విద్యను బలోపేతం చేయాల్సిన ప్రభుత్వం ప్రైవేట్, కార్పొరేట్ విద్యా సంస్థలకు ప్రాధాన్యం ఇస్తోందని ఏబీవీపీ విమర్శించింది. ప్రైవేట్ విద్యాసంస్థల ఫీజుల దోపిడీని అరికట్టేందుకు ఫీజు నియంత్రణ చట్టాన్ని వెంటనే అమలు చేయాలని డిమాండ్ చేసింది.
అలాగే విద్యా హక్కు చట్టం (ఆర్టీఈ) ప్రకారం ప్రైవేట్ పాఠశాలల్లో పేద విద్యార్థులకు సీట్ల కేటాయింపును కచ్చితంగా అమలు చేయాలని, జాతీయ విద్యా విధానం (ఎన్ఈపీ-2020)ను తెలంగాణలో అమలు చేయాలని కోరింది. విద్యాశాఖలో ఖాళీగా ఉన్న ఎంఈవో, డీఈవో తదితర పోస్టులను భర్తీ చేయాలని కూడా డిమాండ్ చేసింది.
ప్రభుత్వ పాఠశాలల్లో మౌలిక వసతుల కొరత, ఉపాధ్యాయుల ఖాళీలు, గురుకుల పాఠశాలల భవన సమస్యలు, విద్యార్థులకు సమయానికి పాఠ్యపుస్తకాలు, యూనిఫాంలు, నాణ్యమైన మధ్యాహ్న భోజనం అందకపోవడం వంటి అంశాలను నిరసనకారులు ప్రస్తావించారు.
నిరసన నేపథ్యంలో స్కూల్ ఎడ్యుకేషన్ డైరెక్టరేట్ వద్ద భారీగా పోలీసులను మోహరించారు. కార్యాలయం వైపు దూసుకెళ్లేందుకు ప్రయత్నించిన విద్యార్థులను పోలీసులు అడ్డుకోవడంతో ఉద్రిక్త పరిస్థితులు నెలకొన్నాయి. కొంతమంది విద్యార్థులు, మహిళా కార్యకర్తల పట్ల పోలీసులు అనుచితంగా వ్యవహరించారని ఏబీవీపీ ఆరోపించింది.
విద్యార్థుల సమస్యలను ప్రభుత్వం వెంటనే పరిష్కరించకపోతే రాష్ట్రవ్యాప్తంగా ఉద్యమాన్ని మరింత ఉధృతం చేస్తామని ఏబీవీపీ నేతలు హెచ్చరించారు. ప్రభుత్వ విద్యా వ్యవస్థను కాపాడటం, విద్యార్థుల హక్కులను రక్షించడం కోసం తమ పోరాటం కొనసాగుతుందని స్పష్టం చేశారు.
