తెలంగాణలో 42 శాతం బీసీ రిజర్వేషన్ అంశం మళ్లీ హాట్ టాపిక్గా మారుతోంది. అసెంబ్లీలో మూడు రోజుల పాటు చర్చలు జరిగినప్పటికీ, బీసీ రిజర్వేషన్పై కనీసం ఐదు నిమిషాలు కూడా చర్చ జరగకపోవడం వెనుక కుట్ర ఉందని బీసీ పొలిటికల్ ఫ్రంట్ నాయకుడు ఐలీ వెంకన్న తీవ్ర ఆరోపణలు చేశారు. కాంగ్రెస్, బీఆర్ఎస్, బీజేపీ మూడు పార్టీలు కుమ్మక్కయ్యే బీసీ అంశాన్ని డైవర్ట్ చేశాయని ఆయన విమర్శించారు.
శీతాకాల సమావేశాల్లో బీసీలకు జరిగిన అన్యాయంపై ప్రత్యేక చర్చ జరుగుతుందని ఆశించినా, అది పూర్తిగా విఫలమైందన్నారు. ప్రతిపక్ష నేతగా ఉన్న కేసీఆర్ అయినా, అధికార పార్టీ అయినా బీసీ రిజర్వేషన్ అంశాన్ని లేవనెత్తకపోవడం దురదృష్టకరమని చెప్పారు. రాష్ట్రవ్యాప్తంగా బీసీలకు ఇప్పటికీ 17 శాతం రిజర్వేషన్ మాత్రమే ఉండగా, గ్రామస్థాయిలో మాత్రం 51 శాతానికి పైగా బీసీలు గెలిచారని గుర్తు చేశారు. ఇది బీసీ చైతన్యం ఎంత బలంగా ఉందో చూపిస్తోందన్నారు.
కాళేశ్వరం, మూసి వంటి ప్రాజెక్టులపై చర్చలు జరుగుతున్నా, భూమిలేని బీసీల సమస్యలు మాత్రం అసెంబ్లీలో వినిపించకపోవడం బాధాకరమని వెంకన్న ఆవేదన వ్యక్తం చేశారు. బీసీలకు విద్య, ఉద్యోగాల్లో న్యాయం చేయాల్సిన అవసరం ఉన్నా, ఆ అంశాన్ని పక్కన పెట్టి రాజకీయ లాభాల కోసం దారి మళ్లిస్తున్నారని మండిపడ్డారు.
కాంగ్రెస్ పార్టీ 42 శాతం రిజర్వేషన్ హామీ ఇచ్చి అధికారంలోకి వచ్చిందని గుర్తు చేసిన ఆయన, ఆ వాగ్దానాన్ని అమలు చేయాల్సిన బాధ్యత రాహుల్ గాంధీ నుంచి ముఖ్యమంత్రి రేవంత్ రెడ్డి వరకు అందరిదేనన్నారు. హామీ అమలు కాకపోతే బీసీలు రాజకీయంగా మరింత గట్టిగా పోరాడతారని హెచ్చరించారు.
బీసీ ఉద్యమం ఇప్పుడు గ్రామ గ్రామాన విస్తరిస్తోందని, ఆదిలాబాద్ నుంచి ఖమ్మం వరకు అన్ని జిల్లాల్లో క్యాడర్ నిర్మాణం జరుగుతోందన్నారు. జీహెచ్ఎంసీ ఎన్నికల్లో కూడా బీసీలకు జనాభా ప్రాతిపదికన 60–65 శాతం రిజర్వేషన్ ఇవ్వాల్సిన అవసరం ఉందని స్పష్టం చేశారు. పట్టణాల్లో బీసీ జనాభా ఎక్కువగా ఉన్నందున, వారికి తగిన ప్రాతినిధ్యం కల్పించాల్సిందేనన్నారు.
కేసీఆర్ పాలనలో బీసీలకు జరిగిన అన్యాయాన్ని గుర్తు చేస్తూ, 10 ఏళ్ల పాలనలో బీసీ రిజర్వేషన్ను 34 శాతం నుంచి 17 శాతానికి తగ్గించిన చరిత్ర ఉందని వెంకన్న ఆరోపించారు. బీసీల ఓట్లతో గెలిచి, బీసీల గురించి మాట్లాడకపోవడం రాజకీయ మోసమేనన్నారు.
చివరగా, బీసీ ఉద్యమం ఎక్కడా ఆగదని, అన్ని సంఘాలను కలుపుకొని బలమైన బహుజన ఉద్యమంగా మార్చుతామని ఆయన స్పష్టం చేశారు. బీసీలకు అన్ని రంగాల్లో న్యాయమైన వాటా దక్కే వరకు పోరాటం కొనసాగుతుందని, అవసరమైతే కొత్త రాజకీయ ప్రత్యామ్నాయాన్ని కూడా నిర్మిస్తామని ఐలీ వెంకన్న తేల్చిచెప్పారు.
