తెలంగాణలో బీసీ రిజర్వేషన్లపై హైకోర్టు ఇచ్చిన తాజా తీర్పుతో రాష్ట్ర ఎన్నికల సంఘం ఇరుక్కున్న పరిస్థితి నెలకొంది. ప్రభుత్వం జారీ చేసిన జీవో నంబర్ 9 ద్వారా బీసీలకు 42% రిజర్వేషన్ కల్పించడాన్ని హైకోర్టు తాత్కాలికంగా నిలిపివేసింది.
హైకోర్టు తన ఆదేశాల్లో రిజర్వేషన్లు 50% మించకూడదని స్పష్టం చేస్తూ, ఇప్పటికే ప్రారంభమైన ఎన్నికల ప్రక్రియను ఆపే ఉద్దేశం లేదని పేర్కొంది. బీసీలకు అదనంగా ఇచ్చిన 17% రిజర్వేషన్లు తగ్గించి, పాత పద్ధతిలోనే ఎన్నికలు నిర్వహించవచ్చని సూచించింది.
ఈ తీర్పుతో రాష్ట్ర ఎన్నికల సంఘం పెద్ద సవాలును ఎదుర్కొంటోంది. హైకోర్టు తీర్పు రాకముందే ఎన్నికల నోటిఫికేషన్ జారీ చేయడం వల్ల ఇప్పుడు ఎటూ తేల్చుకోలేని పరిస్థితి ఏర్పడింది. ప్రభుత్వం సుప్రీం కోర్టుకు వెళ్తామని ప్రకటించగా, ఎన్నికల సంఘం మాత్రం న్యాయ నిపుణులతో చర్చలు జరుపుతోంది.
ఇదిలా ఉండగా, బీసీ సంఘాలు, కుల సంఘాలు తీవ్ర ఆగ్రహం వ్యక్తం చేస్తూ ఈ నెల 14న బంద్కు పిలుపునిచ్చాయి. ఆర్.కృష్ణయ్య నేతృత్వంలో బీసీ సంఘాలు రాష్ట్రవ్యాప్తంగా ఆందోళనలు చేపట్టాలని నిర్ణయించాయి.
రాజకీయ పార్టీలు, బీసీ నేతలు అఖిల పక్ష బేటీ నిర్వహించి కేంద్ర ప్రభుత్వాన్ని కలవాలని డిమాండ్ చేస్తున్నారు.
ఇప్పటి పరిస్థితుల్లో ఎన్నికల కమిషన్ ప్రభుత్వం అనుమతి లేకుండా ఎన్నికలు నిర్వహించడం రాజ్యాంగ విరుద్ధమని న్యాయ నిపుణులు అభిప్రాయపడుతున్నారు. హైకోర్టు సూచనల ప్రకారం 50% రిజర్వేషన్ల పరిమితిని పాటించి ఎన్నికలు నిర్వహించాలా లేదా సుప్రీం కోర్టు తీర్పు వచ్చే వరకు వేచి చూడాలా అనే నిర్ణయం ఎస్సీ ముందు నిలిచింది.
మొత్తంగా, బీసీ రిజర్వేషన్లపై హైకోర్టు తీర్పు రాష్ట్ర రాజకీయాలపై ప్రభావం చూపుతుండగా, ఎన్నికల షెడ్యూల్ భవితవ్యంపై అనిశ్చితి నెలకొంది.
