ఒక ప్రముఖ మోసం కేసుకు సంబంధించి కొనసాగుతున్న వివాదంలో మరోసారి సంచలన వ్యాఖ్యలు వెలువడ్డాయి. బాధితుల తరఫున పోరాడుతున్నామని చెబుతున్న సంపత్ నాయక్ మీడియా సమావేశంలో మాట్లాడుతూ “నిజం వైపు మాత్రమే నిలబడతాం” అంటూ తీవ్ర ఆరోపణలు చేశారు.
గత 20 రోజులుగా బాధితుల తరఫున పోరాటం చేస్తున్నామని, తమ వద్ద ఉన్న ఫోటోలు, వీడియోలు, ఆధారాలను మీడియా ముందు ఉంచుతున్నామని చెప్పారు. “నిజానికి అవమానాలు ఎక్కువైనా చివరకు నిజమే బయటపడుతుంది” అని పేర్కొన్నారు.
ఈ సందర్భంగా గాయని మంగ్లీ పై మరోసారి ప్రశ్నలు లేవనెత్తారు. “ఒక్కసారి మాత్రమే కలిశామని చెబుతున్నారు. అయితే బయటకు వస్తున్న ఫోటోలు, వీడియోలు ఏమిటి?” అని ప్రశ్నించారు. బాధితుల నుంచి వస్తున్న సమాచారం ఆధారంగానే తాము మాట్లాడుతున్నామని తెలిపారు.
సంపత్ నాయక్ మాట్లాడుతూ అనేక గిరిజన, బంజారా, బీసీ, మాల, మాదిగ సంఘాలు తమ పోరాటానికి మద్దతుగా నిలుస్తున్నాయని చెప్పారు. బాధితుల్లో ఎక్కువమంది గిరిజన సమాజానికి చెందినవారేనని, మహారాష్ట్ర, కర్ణాటక ప్రాంతాల నుంచి కూడా బాధితుల కుటుంబాలు సంప్రదిస్తున్నాయని తెలిపారు.
ఈ కేసులో ఇప్పటివరకు పలువురు ఆత్మహత్యలకు పాల్పడినట్టు పేర్కొంటూ మరెవ్వరూ అటువంటి నిర్ణయాలు తీసుకోకూడదని విజ్ఞప్తి చేశారు. “ప్రాణాలు తీసుకోవద్దు.. బయటకు వచ్చి ఫిర్యాదు చేయండి.. మేము మీ కోసం పోరాడతాం” అని బాధితులకు పిలుపునిచ్చారు.
అలాగే రాష్ట్ర ప్రభుత్వానికి, పోలీసు శాఖకు కూడా ధన్యవాదాలు తెలిపారు. రేవంత్ రెడ్డి ప్రభుత్వం ఈ కేసును సీరియస్గా తీసుకుని దర్యాప్తు వేగవంతం చేస్తోందని అన్నారు. ఈఓడబ్ల్యూ అధికారులు డబ్బుల లావాదేవీలపై ఇప్పటికే కీలక వివరాలు గుర్తించారని పేర్కొన్నారు.
ఇంకా తమ వద్ద అనేక ఆధారాలు ఉన్నాయని, అవసరమైతే దశలవారీగా బయటపెడతామని హెచ్చరించారు. త్వరలో రాష్ట్ర గవర్నర్ను కలిసి వినతిపత్రం అందజేస్తామని, ఇకపై ప్రజా పోరాటాల ద్వారా ముందుకు వెళ్తామని వెల్లడించారు.
ఇదే సమావేశంలో పలువురు గిరిజన సంఘాల నాయకులు కూడా పాల్గొన్నారు. బాధితులకు న్యాయం జరిగే వరకు పోరాటం కొనసాగుతుందని, దోషులను కఠినంగా శిక్షించాలని డిమాండ్ చేశారు. గిరిజన సమాజానికి చెందిన ప్రజలు ఆత్మహత్యలకు పాల్పడకుండా ధైర్యంగా ముందుకు రావాలని పిలుపునిచ్చారు.
