శివాజీ వ్యాఖ్యలపై ఉమెన్ కమిషన్ నోటీసులు: మద్దతు–వ్యతిరేకతల మధ్య సోషల్ యాక్టివిస్ట్ ఆస్మా సంచలన వ్యాఖ్యలు
ఇటీవల నటుడు శివాజీ చేసిన వ్యాఖ్యలు తెలుగు రాష్ట్రాల్లో తీవ్ర చర్చకు దారి తీసిన సంగతి తెలిసిందే. ఈ వ్యాఖ్యలపై సినీ ప్రముఖులు, మహిళా సంఘాలు, సోషల్ యాక్టివిస్టులు భిన్నాభిప్రాయాలు వ్యక్తం చేస్తున్నారు. కొందరు శివాజీ మాటలను సమర్థిస్తుండగా, మరికొందరు తీవ్రంగా వ్యతిరేకిస్తున్నారు. ఈ మొత్తం వివాదం చివరకు ఉమెన్ కమిషన్ దాకా చేరింది. ఈ నెల 27వ తేదీన హాజరు కావాలంటూ శివాజీకి ఉమెన్ కమిషన్ నోటీసులు జారీ చేసిన పరిస్థితి ఏర్పడింది.
ఈ నేపథ్యంలో OK TV నిర్వహించిన చర్చలో సోషల్ యాక్టివిస్ట్ ఆస్మా పాల్గొని తన అభిప్రాయాలను వెల్లడించారు. శివాజీ వ్యాఖ్యలను పూర్తిగా తప్పు అనలేమని, అయితే చెప్పే విధానంలో కొన్ని పదాలు దొర్లడం వల్లే వివాదం పెద్దదైందని ఆమె అభిప్రాయపడ్డారు.
ఆస్మా మాట్లాడుతూ, “స్వేచ్ఛ అంటే కేవలం బట్టల వరకే పరిమితం కాదని, అవతలివాళ్ల చూపుల్లో కూడా గౌరవం ఉండేలా మన వస్త్రధారణ ఉండాలి” అని అన్నారు. సంప్రదాయాన్ని పూర్తిగా విస్మరించి స్వేచ్ఛ పేరుతో వ్యవహరించడం సరికాదని చెప్పారు. శివాజీ గారు మహిళలపై ద్వేషంతో మాట్లాడలేదని, జాగ్రత్తగా ఉండాలనే కోణంలో తన అభిప్రాయాన్ని వ్యక్తం చేశారని పేర్కొన్నారు.
సినిమా ఇండస్ట్రీ ప్రభావం సమాజంపై తప్పకుండా ఉంటుందని ఆస్మా స్పష్టం చేశారు. మూడు గంటల సినిమా ప్రభావం యువతపై చాలా బలంగా ఉంటుందని, అందులో చూపించే ఫ్యాషన్, వస్త్రధారణను అనుకరించే ధోరణి పెరిగిందని తెలిపారు. కాలేజ్కు వెళ్లే విద్యార్థినులు కూడా చదువుపై దృష్టి పెట్టాలా లేక చూపులపై దృష్టి పెట్టాలా అన్న పరిస్థితి ఏర్పడుతోందని ఆమె వ్యాఖ్యానించారు
మా శరీరం మా ఇష్టం” అనే నినాదం వినిపిస్తున్నప్పటికీ, సమాజంలో ఇతరుల భావోద్వేగాలను కూడా గౌరవించాల్సిన అవసరం ఉందని అన్నారు. కేవలం హీరోయిన్లే కాదు, గృహిణులు, ఉద్యోగినులు కూడా శివాజీ వ్యాఖ్యలను పెద్ద ఎత్తున సమర్థిస్తున్నారని చెప్పారు. సినీ పరిశ్రమలో కొద్దిమంది మాత్రమే వ్యతిరేకిస్తున్నారని, అందువల్ల మొత్తం వ్యాఖ్యలు తప్పు అని చెప్పలేమని ఆస్మా అభిప్రాయపడ్డారు.
అంతేకాకుండా, మహిళలపై జరుగుతున్న అత్యాచారాల విషయంలో ఉమెన్ కమిషన్ దృష్టి పెట్టాలని ఆమె డిమాండ్ చేశారు. శివాజీ వ్యాఖ్యలపై వేగంగా స్పందించిన కమిషన్, గ్రామీణ ప్రాంతాల్లో జరిగిన గ్యాంగ్రేప్ వంటి ఘోర ఘటనలపై మాత్రం తీవ్రంగా స్పందించడం లేదని విమర్శించారు. దిశ, ప్రియాంక కేసులప్పుడు మాత్రమే దేశం మొత్తం స్పందించిందని, అలాంటి ఘటనలు మరెన్నో జరుగుతున్నప్పటికీ వెలుగులోకి రావడం లేదని ఆవేదన వ్యక్తం చేశారు.
డ్రగ్స్, మద్యం వంటి మత్తు పదార్థాల ప్రభావం వల్ల నేరాలు పెరుగుతున్నాయని, వీటి మూలాలపై ప్రభుత్వాలు కఠిన చర్యలు తీసుకోవాలని సూచించారు. చట్టాలు ఉన్నప్పటికీ అవి అమలులో కనిపించడం లేదని, మహిళల భద్రత కోసం మరింత గట్టి చర్యలు అవసరమని ఆస్మా స్పష్టం చేశారు.
మొత్తంగా శివాజీ వ్యాఖ్యల చుట్టూ జరుగుతున్న ఈ చర్చ సమాజంలో మహిళల స్వేచ్ఛ, సంప్రదాయం, భద్రత, సినీ పరిశ్రమ ప్రభావం వంటి అంశాలపై కొత్త వాదనలకు తెరలేపింది.
