ఆదివారం పార్లమెంట్లో కేంద్ర ఆర్థిక మంత్రి నిర్మల సీతారామన్ ప్రవేశపెట్టనున్న కేంద్ర బడ్జెట్పై తెలంగాణ రాష్ట్రం భారీ ఆశలు పెట్టుకుంది. మెట్రో విస్తరణ, టీపులర్ ప్రాజెక్టులు, మూసీ–గోదావరి నదుల అనుసంధానం వంటి కీలక మౌలిక వసతుల ప్రాజెక్టులకు నిధులు కేటాయిస్తారా లేదా అన్నది రాష్ట్ర రాజకీయాల్లో ప్రధాన చర్చగా మారింది.h
ప్రత్యేకంగా మూసీ–గోదావరి అనుసంధాన ప్రాజెక్టుకు సుమారు ₹6,000 కోట్ల నిధులు అవసరంగా రాష్ట్ర ప్రభుత్వం ఇప్పటికే కేంద్రానికి నివేదించింది. అలాగే కేంద్ర పన్నుల వాటాలో తెలంగాణకు 41 శాతం వాటా ఇవ్వాలని రాష్ట్రం డిమాండ్ చేస్తోంది. కొత్త రైల్వే లైన్లు, ఎయిర్పోర్టుల అనుమతులు ఇంకా పెండింగ్లోనే ఉన్న నేపథ్యంలో ఈ బడ్జెట్ రాష్ట్రానికి కీలకమైంది.
తెలంగాణ విభజన చట్టంలో ఇచ్చిన హామీల అమలుకు రాష్ట్రం దాదాపు 12 ఏళ్లుగా నిరీక్షిస్తోంది. అయినప్పటికీ, ఇప్పటికీ పూర్తి స్థాయిలో నిధులు విడుదల కాలేదన్న అసంతృప్తి రాష్ట్రంలో నెలకొంది. గత కొన్ని సంవత్సరాలుగా సీఎం రేవంత్ రెడ్డి, రాష్ట్ర మంత్రులు, ఉన్నతాధికారులు కలిసి 50 సార్లకు పైగా ఢిల్లీకి వెళ్లి ప్రధాని మోదీ, కేంద్ర మంత్రులను కలిసి వినతిపత్రాలు సమర్పించారు.
ఈ క్రమంలో రాష్ట్రానికి సంబంధించిన కొన్ని అనుమతులు సాధించడంలో ప్రభుత్వం కొంతవరకు విజయం సాధించింది. అప్పులను తక్కువ వడ్డీతో దీర్ఘకాలికంగా మార్పు చేయడం వంటి అంశాల్లో కేంద్రం నుంచి సానుకూల స్పందన లభించింది. అదే సమయంలో, వివిధ శాఖలకు సంబంధించిన 11 ప్రధాన ప్రతిపాదనలను సీఎం రేవంత్ రెడ్డి కేంద్రానికి సమర్పించారు.
అయితే అసలు ప్రశ్న ఏమిటంటే — కేంద్రం ఈసారి ఫెడరల్ స్ఫూర్తితో రాష్ట్రానికి నిధులు కేటాయిస్తుందా? లేక రాష్ట్రంలో కాంగ్రెస్ ప్రభుత్వం అధికారంలో ఉండటం వల్ల రాజకీయ కారణాలతో మొండి చేయి చూపుతుందా? అన్నది ఆదివారం బడ్జెట్ తర్వాతే స్పష్టత రానుంది.
మెట్రో విస్తరణ, టీపులర్ ప్రాజెక్టులు, మూసీ పునరుజ్జీవనం వంటి అంశాలకు నిధులు లభిస్తే తెలంగాణ అభివృద్ధికి కీలక మలుపు అవుతుందని ప్రభుత్వ వర్గాలు భావిస్తున్నాయి. అదే సమయంలో విభజన హామీల అమలులో కేంద్రం మరోసారి నిర్లక్ష్యం చేస్తే రాష్ట్రంలో రాజకీయ వేడి మరింత పెరిగే అవకాశాలు కనిపిస్తున్నాయి.
