తెలంగాణలో ఒక దశలో ఉద్ధృతంగా సాగిన నిరుద్యోగుల ఉద్యమం ఇప్పుడు ఎందుకు బలహీనమైంది? అసలు నిరుద్యోగ సమస్యకు పరిష్కారం ప్రభుత్వ ఉద్యోగాలేనా? లేక రాజకీయ అధికారమేనా? అనే ప్రశ్నలు మరోసారి తెరపైకి వచ్చాయి.
నిరుద్యోగుల ఉద్యమాల్లో మొదట పెద్ద ఎత్తున పాల్గొన్న నాయకులు ఇప్పుడు వెనక్కి తగ్గడానికి కారణమేంటన్న ప్రశ్నకు, ఒక రాజకీయ నేత సంచలన వ్యాఖ్యలు చేశారు. “మొత్తం కలిపి ప్రభుత్వ ఉద్యోగాలు లక్షకు మించవు. కేసీఆర్ 19 ఏళ్లలో సుమారు 38 వేల ఉద్యోగాలు భర్తీ చేశారు. రేవంత్ రెడ్డి ప్రభుత్వం 50 వేల ఉద్యోగాలు ఇచ్చామని చెబుతోంది కానీ అవి గతంలో ఇచ్చిన నోటిఫికేషన్లే” అని అన్నారు.
నిరుద్యోగులకు తాను స్పష్టంగా చెప్పిన మాట ఒక్కటేనని తెలిపారు. “ఉద్యోగాల కోసం ఉద్యమాలు చేస్తూ జీవితాన్ని వృథా చేసుకోవద్దు. రాజకీయాల్లోకి రండి. స్థానిక సంస్థల ఎన్నికల్లో 50 శాతం సీట్లకు నిరుద్యోగులు పోటీ చేయాలి. సర్పంచులు, ఎంపీటీసీలు, జెడ్పీటీసీలుగా గెలిస్తే రేపు ఎమ్మెల్యేలు, ఎంపీలుగా ఎదగొచ్చు. అప్పుడే రాజ్యం మన చేతుల్లోకి వస్తుంది” అని వ్యాఖ్యానించారు.
అయితే ఈ పిలుపుకు నిరుద్యోగ యువత స్పందించలేదని, రాజకీయాలకు అతీతంగా ఉన్నామని చెప్పినా వాస్తవానికి వివిధ పార్టీల మద్దతుతోనే ఉద్యమాలు నడుస్తున్నాయని ఆరోపించారు. “ఇంతకుముందు కాంగ్రెస్, ఇప్పుడు బీఆర్ఎస్ మద్దతుతోనే చాలా ఉద్యమాలు జరిగాయి. నిజంగా స్వచ్ఛందంగా, స్వతంత్రంగా వచ్చిన ఉద్యమాలు కావు” అని అన్నారు.
ఇక ఉద్యోగాల విషయానికి వస్తే, ప్రభుత్వ రంగంలో 95 శాతం, ప్రైవేట్ రంగంలో కనీసం 80 శాతం ఉద్యోగాలు తెలంగాణ వారికే ఇవ్వాలని డిమాండ్ చేశారు. “హైటెక్ సిటీ ఎవరి కోసం? సినిమా ఇండస్ట్రీ, ఫార్మా, రియల్ ఎస్టేట్ – ఏ రంగంలో తెలంగాణ వారికి వాటా ఉంది? బయట రాష్ట్రాల వాళ్లే అన్నీ కబ్జా చేస్తున్నారు” అని ఆవేదన వ్యక్తం చేశారు.
రెండు లక్షల ప్రభుత్వ ఉద్యోగాల హామీపై కూడా ప్రశ్నలు లేవనెత్తారు. “ఐదేళ్లలో రెండు లక్షలు అన్న మాటను సంవత్సరానికి రెండు లక్షలుగా ప్రచారం చేయడం మోసం. విశ్వవిద్యాలయాల్లో ఇప్పటికీ 70 శాతం పోస్టులు ఖాళీగా ఉన్నాయి” అని చెప్పారు.
అసలు నిరుద్యోగుల్లో కూడా రాజకీయ నిరుద్యోగులు ఉన్నారని, డబ్బుల కోసం ఉద్యమాలు చేస్తున్నవారూ ఉన్నారని విమర్శించారు. అయితే నిజమైన నిరుద్యోగులు సుమారు 30 లక్షల మంది ఉన్నారని అంగీకరించారు. “వాళ్లందరూ ప్రభుత్వ ఉద్యోగాల కోసం ఎదురు చూస్తే సాధ్యం కాదు. ప్రైవేట్ రంగంలో వాటా పెరగాలి” అని సూచించారు.
