తెలంగాణలో నిరుద్యోగ సమస్యపై మూడోసారి నిర్వహించిన మహాధర్నా భారీ స్పందనను రాబట్టింది. గతంలో రెండు సార్లు ఐదువేల మందితో నిర్వహించిన ధర్నాల మాదిరిగానే ఈసారి కూడా సుమారు ఐదువేల మంది నిరుద్యోగ యువత పాల్గొని తమ ఆవేదనను గళమెత్తారు. ఈ మహాధర్నా కోసం నిరుద్యోగ మిత్రులు అహోరాత్రులు కష్టపడి ఏర్పాట్లు చేశారు. ముఖ్యంగా అనుమతులు, ఏర్పాట్ల విషయంలో ఇంద్ర కీలక పాత్ర పోషించగా, కొడంగల్ రవి, కుమార్, బిల్సునగర్ ప్రాంతాల్లో యువతను సమీకరించారు. కయ్య వెంకటేష్తో పాటు రవి గురుష, శంభు శంకర్, బాలకోటి ప్రత్యూష, దామోదర్, సోమేష్ తదితరులు ఈ ఉద్యమాన్ని నిర్మించడంలో భాగస్వాములయ్యారు.
వేదికపై మాట్లాడిన వక్తలు స్పష్టంగా ఒక విషయం చెప్పారు – ఇది కేవలం ఒక సభ కాదు, ఇది రాబోయే తరం భవిష్యత్తుకు సంబంధించిన ఉద్యమం. చుట్టం చూపులా వచ్చి వెళ్లే రాజకీయ నాయకత్వం కాదు, నిరుద్యోగులకు నిజమైన నాయకత్వం కావాలని వారు డిమాండ్ చేశారు. రెండు లక్షల ఉద్యోగాలు వచ్చే వరకు ఉద్యమానికి నాయకత్వం వహించాలని వేదికపై ఉన్న పెద్దలను కోరారు.
విద్యార్థుల మధ్య, విద్యార్థి నాయకుల మధ్య అప్పుడప్పుడు అభిప్రాయ భేదాలు రావడం సహజమే అయినా, అందరి చేతులు కలిస్తేనే ప్రభుత్వంపై ఒత్తిడి తీసుకురాగలమని వక్తలు పిలుపునిచ్చారు. తెలంగాణ ఉద్యమం మాదిరిగానే ఇప్పుడు నిరుద్యోగ ఉద్యమం ఉధృతంగా సాగితేనే ఉద్యోగాలు సాధ్యమని అభిప్రాయపడ్డారు.
ప్రతి సంవత్సరం దేశవ్యాప్తంగా 80 లక్షల మంది డిగ్రీ గ్రాడ్యుయేట్లు బయటకు వస్తే, అందులో కేవలం 10 లక్షల మందికే ఉద్యోగాలు లభిస్తున్నాయని, మిగిలిన 70 లక్షల మంది నిరుద్యోగులుగా మారుతున్నారని వక్తలు పేర్కొన్నారు. తెలంగాణలో ఏ ప్రభుత్వం వచ్చినా నిరుద్యోగ సమస్యపై సరైన అవగాహన లేదని, రాజకీయాలు మాత్రమే నడుస్తున్నాయని విమర్శించారు.
ప్రస్తుత కాంగ్రెస్ ప్రభుత్వంపై తీవ్ర స్థాయిలో విమర్శలు గుప్పించారు. నిరుద్యోగులకు ప్రధాన విలన్ రేవంత్ రెడ్డేనని, ఆయన కింద ఉన్న మంత్రులు లెక్కలు చెప్పలేని స్థితిలో ఉన్నారని ఆరోపించారు. ఎవరు 50 వేల ఉద్యోగాలు అంటారు, ఎవరు 60 వేలంటారు, ఇంకొంతమంది లక్ష ఉద్యోగాలు అంటారని, కానీ ఇప్పటివరకు ఒక్క నోటిఫికేషన్ కూడా రాలేదని ప్రశ్నించారు. ఐదేళ్లలో ఉద్యోగాలు ఇస్తామన్న హామీలో ఇప్పటికే రెండేళ్లు గడిచిపోయాయని గుర్తు చేశారు.
పోలీసుల పాత్రపైనా వక్తలు అసంతృప్తి వ్యక్తం చేశారు. నిరుద్యోగుల ఉద్యమాలను అణచివేయకుండా, సహకరించాలని కోరారు. ఈ ఉద్యమాల్లో పాల్గొనే విద్యార్థుల్లోనే రేపటి పోలీసులు, ఎస్ఐలు, సిఐలు ఉన్నారని గుర్తు చేశారు. పేపర్ లీకుల వల్ల ఎంతో మంది అవకాశాలు కోల్పోయారని, ఆ అన్యాయంపై కూడా పోరాటం చేస్తున్నామని తెలిపారు.
ఈ సభ మొత్తం బాధ్యతను ప్రసన్న హరికృష్ణ భుజాన వేసుకున్నారని, ఆయన కనబడకపోయినా వ్యవస్థ మొత్తాన్ని నడిపిస్తున్నారని వక్తలు ప్రశంసించారు. రాబోయే తరానికి నాయకత్వం వహించాలని వేదికపై ఉన్న వారందరికీ పిలుపునిచ్చారు.
చివరగా, నిరుద్యోగ సమస్యపై మనమే నిలబడకపోతే మనల్ని ఆదుకునేవాడు ఎవరూ ఉండరని స్పష్టం చేశారు. ఎంతకాలమైనా పోరాటానికి సిద్ధంగా ఉండాలని, ఉద్యమాన్ని విజయవంతం చేసి ముందుకు సాగాలని పిలుపునిస్తూ మహాధర్నా కొనసాగింది.
