జయశంకర్ భూపాలపల్లి జిల్లాలో జరిగిన భారీ బహిరంగ సభలో బీఆర్ఎస్ నేతలు కాంగ్రెస్ ప్రభుత్వం, ముఖ్యమంత్రి రేవంత్ రెడ్డిపై తీవ్ర స్థాయిలో విమర్శలు గుప్పించారు. ఎండ తీవ్రతను లెక్కచేయకుండా పెద్ద సంఖ్యలో హాజరైన ప్రజలకు పేరు పేరున కృతజ్ఞతలు తెలియజేస్తూ ప్రసంగాన్ని ప్రారంభించారు.
భూపాలపల్లి అభివృద్ధి ఎవరి హయాంలో జరిగిందో ప్రజలందరికీ తెలుసని నేతలు స్పష్టం చేశారు. మెడికల్ కాలేజ్, డిగ్రీ–జూనియర్ కాలేజీలు, బస్ డిపో, మున్సిపాలిటీ, గల్లీ గల్లీకి రోడ్లు, ఇంటింటికి నీరు, సింగరేణి క్వార్టర్లు, డబుల్ బెడ్రూం ఇళ్లు వంటి అభివృద్ధి పనులన్నీ బీఆర్ఎస్ ప్రభుత్వంలోనే జరిగాయని గుర్తుచేశారు.
కాంగ్రెస్ ఎన్నికల సమయంలో ఇచ్చిన హామీలు ఇప్పటివరకు అమలుకాలేదని తీవ్ర విమర్శలు చేశారు. మహిళలకు నెలకు రూ.2,500, వృద్ధులకు రూ.4,000 పెన్షన్, రైతు బంధు, విద్యా భరోసా కార్డు, ఐదు లక్షల ఆరోగ్య కార్డు, స్కూటీ, సింగరేణి కార్మికులకు వారసత్వ ఉద్యోగాలు—ఏ ఒక్కటి కూడా పూర్తిగా అమలుకాలేదని ప్రశ్నించారు. “ఈరోజు ఫిబ్రవరి 9… ఒక్క హామీ అయినా నిజంగా వచ్చిందా?” అంటూ ప్రజలను ప్రశ్నించారు.
కేసీఆర్ ఉన్నప్పుడు రైతు బంధు డిసెంబర్ నెలలోనే ఖాతాల్లో జమయ్యేదని, ఇప్పుడు ఫిబ్రవరి వచ్చేసినా చెల్లింపులు లేవని ఆరోపించారు. రాష్ట్ర పాలన పూర్తిగా దారి తప్పిందని, పరిపాలనా సామర్థ్యం లేకుండా పోయిందని మండిపడ్డారు. తెలంగాణ ఉద్యమ సమయంలో ఎక్కడ లేని వారు ఇప్పుడు కేసీఆర్ను విమర్శించడం సరికాదని హెచ్చరించారు.
భూపాలపల్లి జిల్లాను రద్దు చేస్తామని కాంగ్రెస్ నేతలు మాట్లాడుతున్నారని ఆరోపిస్తూ, జిల్లాను ఏర్పాటు చేసింది ఎవరు? మెడికల్ కాలేజ్, కలెక్టర్, ఎస్పీ కార్యాలయాలు తెచ్చింది ఎవరు? సింగరేణికి న్యాయం చేసింది ఎవరు? అని ప్రశ్నల వర్షం కురిపించారు. భూపాలపల్లి జిల్లా ప్రజల ఆత్మగౌరవంపై దాడి చేస్తే ఊరుకునేది లేదని స్పష్టం చేశారు.
ఎన్నికల వేళ ప్రజలను ప్రలోభాలకు గురి చేసే ప్రయత్నాలు జరుగుతున్నాయని ఆరోపిస్తూ, గ్యాస్ సిలిండర్లు, డబ్బులు, భావోద్వేగ మాటలతో మోసపోవద్దని ప్రజలకు పిలుపునిచ్చారు. “చెయ్యి గుర్తు అభయహస్తం కాదు… భస్మాసుర హస్తం” అంటూ కాంగ్రెస్ హామీలను తీవ్రంగా విమర్శించారు.
సింగరేణి కార్మికుల ప్రయోజనాలను దెబ్బతీసే ప్రయత్నాలు జరుగుతున్నాయని, నల్ల బంగారాన్ని ప్రైవేటు చేతుల్లో పెట్టే కుట్రలు జరుగుతున్నాయని ఆరోపించారు. సింగరేణి కార్మికులు అప్రమత్తంగా ఉండాలని సూచించారు.
చివరిగా, బీఆర్ఎస్ కార్యకర్తలు, మహిళలు, యువత చూపుతున్న ఉత్సాహమే రాబోయే గెలుపుకు నిదర్శనమని పేర్కొంటూ, చివరి ఓటు పడే వరకు పోరాటం కొనసాగించాలని పిలుపునిచ్చారు. సభ “జై తెలంగాణ”, “కారు గుర్తుకే ఓటు” నినాదాలతో మార్మోగింది
