దేశంలో మరోసారి పెట్రోల్, డీజిల్ ధరలు పెరగడంతో సామాన్యుడిపై భారం మరింత పెరిగింది. కేవలం రెండు వారాల వ్యవధిలోనే మూడోసారి ఇంధన ధరలు పెరగడం ప్రజల్లో ఆందోళన కలిగిస్తోంది. తాజా పెంపులో పెట్రోల్పై 87 పైసలు, డీజిల్పై 91 పైసలు పెంచినట్లు తెలుస్తోంది.
ఇప్పటికే గత రెండు సార్లు కూడా భారీగా ధరలు పెరిగాయి. మొదటిసారి లీటర్కు దాదాపు మూడు రూపాయలు పెంచగా, రెండోసారి కూడా పైసల స్థాయిలో పెంపు జరిగింది. ఇప్పుడు మూడోసారి మరోసారి ధరలు పెరగడంతో పెట్రోల్ ధరలు రూ.112 దాటే పరిస్థితి ఏర్పడింది.
ప్రస్తుతం పెట్రోల్ ధరలు రూ.111.87 వద్ద ఉండగా తాజా పెంపుతో రూ.112.80 దాటే అవకాశం ఉందని ప్రజలు ఆందోళన వ్యక్తం చేస్తున్నారు. ఇదే పరిస్థితి కొనసాగితే త్వరలోనే పెట్రోల్ ధరలు రూ.120కు చేరుకోవడం ఖాయమనే అభిప్రాయాలు వ్యక్తమవుతున్నాయి.
ఇంధన ధరలు పెరగడం వల్ల కేవలం వాహనదారులకే కాకుండా అన్ని రంగాలపై ప్రభావం పడనుంది. రవాణా ఖర్చులు పెరగడంతో నిత్యావసర వస్తువుల ధరలు కూడా పెరిగే అవకాశం ఉందని ఆర్థిక నిపుణులు చెబుతున్నారు. కూరగాయల నుంచి గృహ అవసరాల వస్తువుల వరకు ప్రతిదానిపై ధరల భారం పడనుంది.
ప్రభుత్వాలు ఎలక్ట్రిక్ వాహనాలు, మెట్రో రైళ్లు, పబ్లిక్ ట్రాన్స్పోర్ట్ వినియోగాన్ని ప్రోత్సహిస్తున్నప్పటికీ ప్రతి ప్రాంతానికి ఆ సదుపాయాలు అందుబాటులో లేవని ప్రజలు చెబుతున్నారు. అన్ని ఉద్యోగ ప్రాంతాలకు మెట్రో లేదా బస్సు సౌకర్యం లేకపోవడంతో చాలామంది వ్యక్తిగత వాహనాలపైనే ఆధారపడాల్సి వస్తోంది.
ఇప్పటికే పెరుగుతున్న జీవన వ్యయాలతో ఇబ్బందులు పడుతున్న మధ్యతరగతి, సామాన్య కుటుంబాలకు ఈ పెట్రోల్, డీజిల్ ధరల పెంపు మరింత భారంగా మారింది. కేంద్ర, రాష్ట్ర ప్రభుత్వాలు ధరల నియంత్రణపై చర్యలు తీసుకోవాలని ప్రజలు డిమాండ్ చేస్తున్నారు.
