నమస్తే… వెల్కమ్ టు ఓకే టీవీ.
టెక్నాలజీ రోజురోజుకూ కొత్త పుంతలు తొక్కుతోంది. రోబోలు వచ్చేస్తున్నాయి… మన ఉద్యోగాలు పోతాయంటూ ఇప్పటికే చాలామంది ఆందోళన వ్యక్తం చేస్తున్నారు. ఐటీ ఉద్యోగాల నుంచి హోటల్ సర్వీస్, డ్రైవింగ్ వరకు ఎన్నో రంగాల్లో రోబోలు మనుషుల స్థానాన్ని ఆక్రమిస్తాయనే చర్చ నడుస్తోంది. అయితే ఇప్పుడు మరో ఆశ్చర్యకరమైన ఘటన సోషల్ మీడియాలో వైరల్ అవుతోంది.
మనిషికి ఏ దారి లేకపోయినప్పుడు పొట్టకూటి కోసం ఎంచుకునే చివరి మార్గంగా భావించే భిక్షాటనలో కూడా ఇప్పుడు రోబోలు పోటీకి దిగుతున్నాయా? అన్న సందేహం కలిగించే వీడియో ఇది.
“ధర్మం చేయండి బాబు…” అన్నట్లుగా రోడ్డు పక్కన కూర్చొని భిక్షాటన చేస్తున్న హ్యూమనాయిడ్ రోబో వీడియో ఇప్పుడు నెటిజన్లను ఆశ్చర్యపరుస్తోంది.
ఈ విచిత్ర ఘటన చైనాలో చోటుచేసుకుంది. ఓ వీధిలో హ్యూమనాయిడ్ రోబో ఒకటి నేలపై మోకాళ్లపై కూర్చొని, మనుషులు ఎలాగైతే చేతులు జోడించి దీనంగా సహాయం కోరుతారో సరిగ్గా అలాగే రెండు చేతులు జోడించి తలవంచి భిక్షాటన చేస్తున్నట్లు కనిపించింది.
రోడ్డు మీద వెళ్తున్నవారు ఈ దృశ్యాన్ని చూసి ఒక్కసారిగా షాక్కు గురయ్యారు. “రోబోలు కూడా ఇంత భావోద్వేగంగా అడగగలవా?” అంటూ చాలామంది ఆగి వీడియోలు తీశారు. కొందరు నవ్వుకుంటూ సెల్ఫీలు దిగితే, మరికొందరు దీనిని టెక్నాలజీ అద్భుతంగా అభివర్ణించారు.
ఈ రోబో ప్రత్యేకత మరో విషయంలోనూ కనిపించింది. సాధారణంగా భిక్షాటన చేసేవారు ముందు గిన్నె పెట్టుకుంటారు. ఈ రోబో కూడా తన ముందు ఒక ప్లేట్ పెట్టుకుంది. అయితే ఇప్పుడు చాలామంది “క్యాష్ లేదు బాబు… అంతా ఆన్లైన్ పేమెంట్స్” అంటూ తప్పించుకుంటున్న నేపథ్యంలో, ఈ రోబో ఆ అవకాశాన్ని కూడా ఇవ్వలేదు.
తన ముందే పెద్ద క్యూఆర్ కోడ్ బోర్డును ఉంచి, “క్యాష్ లేకపోతే స్కాన్ చేసి డిజిటల్ పేమెంట్ చేయండి” అన్నట్లుగా ఏర్పాట్లు చేసింది. దీంతో ఈ వీడియో మరింత వైరల్గా మారింది.
ఈ వీడియోపై నెటిజన్లు కూడా ఆసక్తికరంగా స్పందిస్తున్నారు. “భవిష్యత్తులో రోబోల వల్ల ఉద్యోగాలు కోల్పోయిన మనుషుల పరిస్థితి కూడా ఇలాగే ఉంటుందేమో” అంటూ కొందరు వ్యంగ్య వ్యాఖ్యలు చేస్తున్నారు.
మరికొందరేమో ఇది ఏదైనా రోబోటిక్స్ కంపెనీ నిర్వహిస్తున్న టెక్నాలజీ ప్రయోగం కావచ్చని భావిస్తున్నారు. రోబో బ్యాలెన్సింగ్ సామర్థ్యం, మానవులతో పరస్పర చర్యలు ఎలా ఉంటాయో పరీక్షించేందుకు ఇలా ప్రజల మధ్యకు తీసుకొచ్చి ఉండొచ్చని అంచనా వేస్తున్నారు.
ఇంకొందరు మాత్రం ఇది ఏదైనా బ్రాండ్ ప్రమోషన్ కోసం రూపొందించిన ప్రచార కార్యక్రమమని అభిప్రాయపడుతున్నారు. ఏది ఏమైనా… ఈ రోబో భిక్షాటన వీడియో మాత్రం ప్రపంచవ్యాప్తంగా సోషల్ మీడియా యూజర్లను ఆకట్టుకుంటూ నవ్వులు పూయిస్తోంది.
టెక్నాలజీ ఎంత వేగంగా మారుతోందో చెప్పడానికి ఇదొక ఉదాహరణగా నిలుస్తోంది. రేపు మన ఊర్లో కూడా రోబోలు క్యూఆర్ కోడ్ పట్టుకుని “ధర్మం చేయండి బాబు” అంటూ నిలబడితే… మీరు స్కాన్ చేసి డబ్బులు వేస్తారా?
మీ అభిప్రాయాన్ని కామెంట్ సెక్షన్లో తెలియజేయండి.
మరిన్ని ఆసక్తికరమైన అప్డేట్స్ కోసం చూస్తూనే ఉండండి… ఓకే టీవీ.
