ప్రభుత్వ పాఠశాలల నుంచే భవిష్యత్ నాయకులు.. తెలంగాణ పబ్లిక్ స్కూల్స్తో విద్యా విప్లవం: సీఎం రేవంత్ రెడ్డి
యాదాద్రి భువనగిరి జిల్లాలోని ఆరుట్ల గ్రామంలో తెలంగాణ పబ్లిక్ స్కూల్ను ముఖ్యమంత్రి రేవంత్ రెడ్డి ప్రారంభించారు. ఈ సందర్భంగా నిర్వహించిన కార్యక్రమంలో ఆయన మాట్లాడుతూ, రాష్ట్రంలోని 24 వేల ప్రభుత్వ పాఠశాలల్లో చదువుతున్న 27 లక్షల మంది విద్యార్థులకు ఆరుట్ల పాఠశాల స్ఫూర్తిదాయక నమూనాగా నిలుస్తుందని అన్నారు.
తెలంగాణ ప్రభుత్వం మూడు లక్షల కోట్లకు పైగా ఉన్న బడ్జెట్లో దాదాపు 8.5 శాతం నిధులను విద్యాశాఖ కోసం కేటాయిస్తోందని సీఎం తెలిపారు. ఏటా సుమారు రూ.26 వేల నుంచి రూ.27 వేల కోట్ల వరకు విద్య కోసం ఖర్చు చేస్తున్నప్పటికీ, ప్రభుత్వ పాఠశాలలపై పేద ప్రజల్లో ఇంకా కొంత అపనమ్మకం ఉందని పేర్కొన్నారు. ప్రభుత్వ పాఠశాలల్లో చదివితే తమ పిల్లలకు నాణ్యమైన విద్య, ఉద్యోగ అవకాశాలు లభించవనే సందేహాలను తొలగించాల్సిన అవసరం ఉందన్నారు.
పేదల పిల్లల నుంచే డాక్టర్లు, ఇంజనీర్లు, లాయర్లు, ఐఏఎస్లు, ఐపీఎస్లు, దేశాన్ని నడిపించే నాయకులు రావాలంటే ప్రభుత్వ పాఠశాలలను బలోపేతం చేయాలని సీఎం స్పష్టం చేశారు. ఈ లక్ష్యంతోనే రాష్ట్రంలో తొలిసారిగా విద్యా కమిషన్ను ఏర్పాటు చేసి, అక్నూరి మురళిని చైర్పర్సన్గా నియమించామని తెలిపారు. కమిషన్ సభ్యులు దేశ, విదేశాల్లోని విద్యా వ్యవస్థలను అధ్యయనం చేసి సమగ్ర నివేదికను ప్రభుత్వానికి అందించారని చెప్పారు.
తెలంగాణ భవిష్యత్తు అద్దాల భవనాల్లో లేదని, తరగతి గదుల్లోనే ఉందని సీఎం పేర్కొన్నారు. విద్యపై ప్రభుత్వం చేస్తున్న ఖర్చు వ్యయం కాదని, భవిష్యత్తుపై పెట్టుబడి అని అన్నారు. డాక్టర్ బాబాసాహెబ్ అంబేద్కర్ చెప్పినట్లుగా విద్యే ఆత్మగౌరవం, విద్యే ఆయుధమని పేర్కొంటూ, విద్య ద్వారానే సమాజంలో మార్పు తీసుకురావచ్చని చెప్పారు.
ఆరుట్ల గ్రామంలో తెలంగాణ పబ్లిక్ స్కూల్ను ప్రయోగాత్మకంగా అభివృద్ధి చేసిన విధానాన్ని సీఎం ప్రత్యేకంగా ప్రశంసించారు. స్కూల్ మేనేజ్మెంట్ కమిటీ, ఉపాధ్యాయులు, గ్రామ ప్రజల కృషితో ఒకప్పుడు విద్యార్థుల చేరిక కోసం ఎదురుచూసిన పాఠశాలలో ఇప్పుడు 1,814 మంది విద్యార్థులు చేరారని తెలిపారు. ప్రస్తుతం ఖాళీలు లేక అడ్మిషన్లు నిలిపివేయాల్సిన పరిస్థితి రావడం ఉపాధ్యాయుల నిబద్ధతకు నిదర్శనమని కొనియాడారు.
రాష్ట్రంలోని ప్రతి అసెంబ్లీ నియోజకవర్గంలో ఒక తెలంగాణ పబ్లిక్ స్కూల్ను ప్రారంభించాలని ప్రభుత్వం నిర్ణయించిందని సీఎం వెల్లడించారు. ఈ విద్యా సంవత్సరంలో ఈ పాఠశాలల అనుభవాలను అధ్యయనం చేసి భవిష్యత్తులో మరింత మెరుగైన విద్యా విధానాన్ని అమలు చేస్తామని తెలిపారు.
ఆరుట్ల గ్రామానికి చారిత్రక ప్రాధాన్యత ఉందని, తెలంగాణ సాయుధ రైతాంగ పోరాట యోధులు ఆరుట్ల రామచంద్రారెడ్డి, ఆరుట్ల కమలాదేవి వంటి మహనీయుల స్ఫూర్తి ఈ ప్రాంతానికి ప్రత్యేక గుర్తింపును తెచ్చిందన్నారు. అదే స్ఫూర్తి ఇక్కడ చదువుతున్న విద్యార్థుల్లోనూ కనిపించాలని ఆకాంక్షించారు.
ప్రభుత్వ పాఠశాలలు పేదలకోసం మాత్రమే అన్న భావనను మార్చాలని సీఎం పిలుపునిచ్చారు. ప్రభుత్వ పాఠశాలలను అద్భుతమైన విద్యా ప్రయోగశాలలుగా తీర్చిదిద్దుతున్నామని, ఇక్కడ చదివే విద్యార్థులే రేపటి భవిష్యత్తుకు నాయకత్వం వహిస్తారని విశ్వాసం వ్యక్తం చేశారు.
తాను కూడా ప్రభుత్వ పాఠశాలలోనే చదువుకున్నానని గుర్తుచేసుకున్న సీఎం, చిన్న గ్రామంలో విద్యాభ్యాసం చేసి నేడు రాష్ట్ర ముఖ్యమంత్రిగా ఎదిగానని చెప్పారు. మాజీ ప్రధాని పీవీ నరసింహారావు, మర్రి చెన్నారెడ్డి, జైపాల్ రెడ్డి వంటి ప్రముఖులు కూడా ప్రభుత్వ పాఠశాలల్లోనే చదివారని గుర్తు చేశారు.
ప్రభుత్వ పాఠశాలలో చదవడం చిన్న విషయం కాదని, అక్కడి నుంచే దేశ ప్రధానమంత్రి, రాష్ట్ర ముఖ్యమంత్రి స్థాయికి ఎదగవచ్చని విద్యార్థులకు సూచించారు. భూములు, ఆస్తులు లేదా సంక్షేమ పథకాలు మాత్రమే భవిష్యత్తును మార్చలేవని, విద్య ద్వారానే జీవితాన్ని మార్చుకోవచ్చని చెప్పారు.
విద్యతో పాటు క్రీడలకు కూడా సమాన ప్రాధాన్యత ఇస్తున్నామని సీఎం తెలిపారు. నర్సరీ నుంచి 12వ తరగతి వరకు సమగ్ర విద్య అందించేలా తెలంగాణ పబ్లిక్ స్కూల్స్ను అభివృద్ధి చేస్తున్నామని పేర్కొన్నారు.
అదే విధంగా కులాల వారీగా హాస్టళ్లు నిర్వహించే పద్ధతికి బదులుగా సామాజిక సమానత్వాన్ని పెంపొందించే లక్ష్యంతో యంగ్ ఇండియా ఇంటిగ్రేటెడ్ రెసిడెన్షియల్ స్కూల్స్ను ఏర్పాటు చేస్తున్నామని తెలిపారు. ఎస్సీ, ఎస్టీ, బీసీ, మైనారిటీలు, ఇతర వర్గాల విద్యార్థులు కలిసి చదివేలా ఈ పాఠశాలలను నిర్మిస్తున్నామని చెప్పారు. 25 ఎకరాల్లో అత్యాధునిక సౌకర్యాలతో ఈ పాఠశాలలు నిర్మాణ దశలో ఉన్నాయని, త్వరలో అందుబాటులోకి వస్తాయని వెల్లడించారు.
ప్రస్తుత కాలంలో విద్యతో పాటు నైపుణ్యాలు కూడా అవసరమని, విద్యార్థులు భవిష్యత్తు పోటీ ప్రపంచాన్ని ఎదుర్కొనేలా విద్యా వ్యవస్థను రూపొందిస్తున్నామని సీఎం రేవంత్ రెడ్డి స్పష్టం చేశారు.
