ఇటీవల నిర్వహించిన పత్రికా సమావేశంలో తెలంగాణ జాగృతి నేత మున్సిపల్ ఎన్నికల ప్రచార తీరుపై తీవ్ర అసంతృప్తి వ్యక్తం చేశారు. నిన్న మొన్నటి వరకు సాగిన మున్సిపల్ ఎన్నికల “బూతుల వర్షం” ఆగిపోవడం సంతోషంగా ఉందని, వడగండ్ల వాన ఆగిన తర్వాత కలిగే ప్రశాంతత లాంటిదే ఇప్పుడని వ్యాఖ్యానించారు. పార్టీలు మారుమూల అసలు సమస్యలను పక్కనపెట్టి వ్యక్తిగత దూషణలకే పరిమితమయ్యాయని విమర్శించారు.
మున్సిపల్ ఎన్నికలు పార్టీ గుర్తు లేకుండా జరిగితే బాగుంటుందని అభిప్రాయపడ్డారు. ఎందుకంటే జాతీయ నేతలు ప్రచారానికి వచ్చినా ప్రజలకు సంబంధించిన ప్రాథమిక సమస్యలపై ఎవరూ మాట్లాడటం లేదని అన్నారు. మహబూబ్నగర్లో ఇప్పటికీ తాగునీటి సమస్య తీవ్రంగా ఉందని, పబ్లిక్ ట్రాన్స్పోర్ట్, బస్ స్టాండ్లు, ప్రభుత్వ పాఠశాలల దుస్థితి గురించి చర్చ జరగడం లేదని ఆవేదన వ్యక్తం చేశారు. పట్టణాల్లోని ప్రభుత్వ పాఠశాలలు ప్రైవేట్ స్కూళ్లకు విద్యార్థులను పంపించే కేంద్రాల్లా మారాయని వ్యాఖ్యానించారు.
బస్తీ దవాఖానాల పరిస్థితి దారుణంగా ఉందని, కనీస మందులు, డాక్టర్లు కూడా లేని స్థితి ఉందని అన్నారు. ముఖ్యమంత్రి, మున్సిపల్ మంత్రి ఇప్పటివరకు బస్తీ దవాఖానాలపై సమీక్ష చేయలేదని విమర్శించారు. డ్రైనేజీ, చెత్త గుట్టల సమస్య ప్రతి మున్సిపాలిటీలో పెద్ద సమస్యగా మారిందని, ముఖ్యమంత్రి సొంత జిల్లాలోని పట్టణాల్లో కూడా చెత్త తొలగింపుపై పట్టింపు లేదని ఆరోపించారు.
రిటైర్డ్ ఉద్యోగులకు ఇప్పటివరకు రిటైర్మెంట్ బెనిఫిట్లు రాకపోవడం కూడా పట్టణాల్లో ప్రధాన సమస్యగా ఉందన్నారు. కరీంనగర్లో ఓ రిటైర్డ్ ఉద్యోగి “మాకు బెనిఫిట్లు ఇవ్వని నాయకులు ఓట్లు అడగొద్దు” అంటూ బోర్డు పెట్టడం పరిస్థితి తీవ్రతకు నిదర్శనమని చెప్పారు. ఈ నేపథ్యంలో పట్టణాల బుద్ధిజీవులు, ఓటర్లు పార్టీలు కాకుండా మంచి అభ్యర్థులను ఎన్నుకోవాలని విజ్ఞప్తి చేశారు.
మున్సిపల్ ఎన్నికల్లో రాజకీయ పార్టీలు పరస్పర అవగాహనలతో ప్యానెల్లు వేస్తున్నాయని, హంగ్ వచ్చినా పరిపాలనకు ఇబ్బంది లేదని తెలిపారు. స్థానిక సమస్యలపై పని చేసే వారినే ఎన్నుకోవాలని, అవకాశం ఉన్న చోట సింహం గుర్తుపై పోటీ చేస్తున్న అభ్యర్థులకు మద్దతివ్వాలని పిలుపునిచ్చారు.
బడ్జెట్ విషయానికి వస్తే, కాంగ్రెస్ ప్రభుత్వం వచ్చిన తర్వాత 116 మున్సిపాలిటీలు, ఏడు కార్పొరేషన్లు ఉన్నా కేవలం ఒక్క మున్సిపాలిటీకి మాత్రమే అండర్గ్రౌండ్ డ్రైనేజీ నిధులు మంజూరయ్యాయని విమర్శించారు. అది కూడా సిద్దిపేటకే మంజూరు కావడం వెనుక రాజకీయ ఆంతర్యం ఏమిటో ముఖ్యమంత్రే చెప్పాలన్నారు.
ఫిబ్రవరి 26 నుంచి ప్రారంభమయ్యే బడ్జెట్ సమావేశాలు అత్యంత కీలకమని, ఇదే కాంగ్రెస్ ప్రభుత్వం ఇచ్చిన హామీలను నిలబెట్టుకునే అవకాశం ఉన్న చివరి బడ్జెట్లాంటిదని అన్నారు. గత బడ్జెట్లో తెలంగాణ భూములు అమ్మి 7 వేల కోట్ల రూపాయలు సమకూర్చుకున్నారని, సంపద సృష్టిపై దృష్టి లేకపోవడం వల్ల రెవెన్యూ లోటు మైనస్ 9 వేల కోట్లకు చేరిందని ప్రభుత్వ డాక్యుమెంట్ల ఆధారంగా వివరించారు.
పేదల సంక్షేమానికి కేటాయించిన 21 వేల కోట్లలో డిసెంబర్ వరకు కేవలం 5,500 కోట్లు మాత్రమే ఖర్చు చేశారని, అందుకే పెన్షన్లు, అభివృద్ధి పనులు ఆగిపోయాయని ఆరోపించారు. మరోవైపు కాంట్రాక్టర్లకు మాత్రం అంచనాలకు మించి 42 వేల కోట్లు చెల్లించారని, సంక్షేమం కంటే కమిషన్లకే ప్రాధాన్యం ఇస్తున్నారని విమర్శించారు.
రాబోయే బడ్జెట్లో తెలంగాణ జాగృతి తరఫున ప్రధానంగా మూడు డిమాండ్లు చేస్తున్నామని తెలిపారు.
- కామారెడ్డి డిక్లరేషన్ ప్రకారం బీసీలకు సంవత్సరానికి 20 వేల కోట్ల రూపాయలు బడ్జెట్లో కేటాయించాలి.
- వృద్ధులు, వికలాంగులు, మహిళలకు పెన్షన్లు డబుల్ చేస్తామని ఇచ్చిన హామీ మేరకు 35 వేల కోట్ల రూపాయలు కేటాయించాలి.
- ఇందిరమ్మ ఇళ్ల పథకం కింద ఈ ఏడాది 8 లక్షల ఇళ్ల నిర్మాణానికి 25 వేల కోట్ల రూపాయలు బడ్జెట్లో పొందుపరచాలి.
మున్సిపల్ ఎన్నికలు, బడ్జెట్ సమావేశాల నేపథ్యంలో చేసిన ఈ వ్యాఖ్యలు రాష్ట్ర రాజకీయాల్లో చర్చనీయాంశంగా మారాయి.
