తెలంగాణ పబ్లిక్ స్కూల్స్ మంచి ఆరంభమే.. కానీ ఉద్యోగాలపై స్పష్టత ఇస్తేనే విద్యార్థుల్లో నమ్మకం పెరుగుతుంది
తెలంగాణ ప్రభుత్వం ప్రారంభించిన తెలంగాణ పబ్లిక్ స్కూల్స్ విద్యారంగంలో ఒక కీలకమైన అడుగుగా కనిపిస్తున్నాయి. కార్పొరేట్ పాఠశాలలకు దీటుగా అత్యాధునిక సౌకర్యాలతో ఏర్పాటు చేసిన ఈ పాఠశాలలు ప్రభుత్వ విద్యా వ్యవస్థపై ప్రజల్లో విశ్వాసాన్ని పెంచే అవకాశముంది. అయితే విద్యా సంస్కరణలతో పాటు ఉద్యోగాల కల్పనపై కూడా ప్రభుత్వం స్పష్టత ఇవ్వాల్సిన అవసరం ఉందనే అభిప్రాయాలు వ్యక్తమవుతున్నాయి.
ఇటీవల ఆరుట్ల గ్రామంలో తెలంగాణ పబ్లిక్ స్కూల్ను ప్రారంభించిన ముఖ్యమంత్రి రేవంత్ రెడ్డి, ప్రభుత్వ పాఠశాలల్లో చదివే విద్యార్థులకు కూడా ప్రైవేట్, కార్పొరేట్ స్కూల్స్ స్థాయి విద్య అందించాలన్నదే ప్రభుత్వ లక్ష్యమని ప్రకటించారు. రాష్ట్రంలోని 24 వేల ప్రభుత్వ పాఠశాలల్లో చదువుతున్న 27 లక్షల మంది విద్యార్థులకు ఈ కార్యక్రమాన్ని అంకితం చేశారు.
తెలంగాణ పబ్లిక్ స్కూల్స్లో ఇంగ్లీష్ మీడియం విద్యతో పాటు క్రీడలు, రవాణా సౌకర్యం, ఆధునిక తరగతి గదులు, ప్రయోగశాలలు, ఇతర సదుపాయాలను కల్పిస్తున్నట్లు ప్రభుత్వం వెల్లడించింది. ప్రభుత్వ పాఠశాలల్లో చదవడం నామోషీ అనే భావనను తొలగించి, నాణ్యమైన విద్య అందించాలనే ఉద్దేశంతో ఈ కార్యక్రమాన్ని చేపట్టినట్లు సీఎం పేర్కొన్నారు.
అయితే ఈ పథకం విజయవంతం కావాలంటే కేవలం భవనాలు నిర్మించడం మాత్రమే కాకుండా వాటి నిర్వహణపై కూడా ప్రభుత్వం నిరంతర దృష్టి పెట్టాల్సిన అవసరం ఉందని విద్యావేత్తలు, పరిశీలకులు అభిప్రాయపడుతున్నారు. ప్రారంభంలో మంచి వసతులు కల్పించినా, భవిష్యత్తులో అదే నాణ్యత కొనసాగించగలగడమే అసలు సవాలుగా మారనుంది.
ప్రభుత్వ పాఠశాలలపై ఉన్న అపనమ్మకాలను తొలగించాలంటే విద్యతో పాటు ఉద్యోగ అవకాశాలపై కూడా ప్రభుత్వం స్పష్టత ఇవ్వాలని యువత కోరుతోంది. ప్రభుత్వ పాఠశాలల్లో, ప్రభుత్వ కళాశాలల్లో చదివిన తర్వాత ఉద్యోగాలు లభిస్తాయనే నమ్మకం కలిగితేనే తల్లిదండ్రులు, విద్యార్థులు పూర్తిగా ప్రభుత్వ విద్యా వ్యవస్థపై ఆధారపడతారని అభిప్రాయాలు వ్యక్తమవుతున్నాయి.
ప్రస్తుతం రాష్ట్రంలో ఉద్యోగాల భర్తీ, నోటిఫికేషన్లు, జాబ్ క్యాలెండర్ అంశాలు చర్చనీయాంశంగా మారాయి. నిరుద్యోగ యువత ప్రభుత్వాన్ని తరచూ ఉద్యోగాల ప్రకటనలపై ప్రశ్నిస్తున్న పరిస్థితి ఉంది. ఏ నెలలో ఎన్ని ఉద్యోగ నోటిఫికేషన్లు విడుదల అవుతాయి, నియామక ప్రక్రియ ఎప్పుడు పూర్తవుతుంది అనే అంశాలపై స్పష్టమైన ప్రణాళికను ప్రకటించాలని యువత కోరుతోంది.
విద్యార్థులు పాఠశాల స్థాయి నుంచి ఉన్నత విద్య వరకు ప్రయాణించిన తర్వాత ఉద్యోగ అవకాశాలు కనిపిస్తేనే ప్రభుత్వ విద్యపై పూర్తి స్థాయి విశ్వాసం పెరుగుతుందని విశ్లేషకులు భావిస్తున్నారు. విద్యా వ్యవస్థలో సంస్కరణలు ఎంత ముఖ్యమో, ఉపాధి అవకాశాల కల్పన కూడా అంతే ముఖ్యమని వారు సూచిస్తున్నారు.
తెలంగాణ పబ్లిక్ స్కూల్స్ ద్వారా ప్రభుత్వం విద్యారంగంలో ఒక కొత్త ప్రయోగానికి శ్రీకారం చుట్టింది. అయితే విద్య, నైపుణ్యాభివృద్ధి, ఉద్యోగాల కల్పన అనే మూడు అంశాలు సమన్వయంతో ముందుకు సాగినప్పుడే ఈ కార్యక్రమం పూర్తి స్థాయిలో విజయవంతమవుతుందనే అభిప్రాయం వ్యక్తమవుతోంది.
