కేంద్ర మంత్రి కుమారుడికి సంబంధించిన సంచలన కేసులో రోజు రోజుకీ ఉచ్చు బిగుస్తున్న పరిస్థితులు కనిపిస్తున్నాయి. బాధిత బాలిక కుటుంబానికి న్యాయం చేయాలంటూ రాష్ట్రవ్యాప్తంగా తీవ్ర చర్చ కొనసాగుతున్న వేళ, తాజాగా కేసులో కీలక పరిణామాలు చోటు చేసుకున్నాయి. మొదట సరెండర్ చేశాడా లేక పోలీసులు అరెస్ట్ చేశారా అనే అంశంపై వివాదం నెలకొన్నా, చివరకు నిందితుడిని కోర్టు 14 రోజుల రిమాండ్కు పంపించింది.
ఇప్పటికే పలు తీవ్రమైన సెక్షన్లు నమోదు చేసిన పోలీసులు, తాజాగా మరికొన్ని కఠినమైన చట్టపరమైన సెక్షన్లను కూడా జోడించినట్లు సమాచారం. ముఖ్యంగా బాధిత బాలిక వాంగ్మూలం, ఆమె కుటుంబం ఇచ్చిన ఫిర్యాదుల ఆధారంగా కేసు మరింత బలపడుతున్నట్లు తెలుస్తోంది. బీఎన్ఎస్ సెక్షన్ 642(ఎం), సెక్షన్ 238 వంటి నిబంధనలను అమలు చేయడంతో కేసు తీవ్రత మరింత పెరిగింది.
పోలీసుల ప్రకారం, బాధిత బాలికపై పలుమార్లు అఘాయిత్యాలు జరిగినట్లు అనుమానాలు బలపడుతున్నాయి. ఈ నేపథ్యంలో కొత్తగా చేర్చిన సెక్షన్ల కింద జీవిత ఖైదు వరకు శిక్ష పడే అవకాశం ఉందని చట్ట నిపుణులు చెబుతున్నారు.
ఇక కేసులో అత్యంత కీలక అంశంగా మారింది డేటా తారుమారు వ్యవహారం. పోలీసులు స్వాధీనం చేసుకున్న ఫోన్లో ఎలాంటి డేటా లేకపోవడం సంచలనంగా మారింది. ఫోన్లో ఫోటోలు, వీడియోలు, కాంటాక్టులు మాత్రమే కాదు, సిమ్ కూడా లేకపోవడం అనుమానాలకు తావిస్తోంది. వారం రోజుల గ్యాప్లో ఆధారాలు పూర్తిగా డిలీట్ చేసినట్లు పోలీసులు అనుమానిస్తున్నారు. దీనిపై సెక్షన్ 238 కింద కేసు నమోదు చేశారు.
బాధిత బాలిక తల్లి ఇచ్చిన లేఖ కూడా కేసులో కీలకంగా మారింది. ఘటన జరిగిన సమయంలో నిందితుడి స్నేహితులు కూడా అక్కడే ఉన్నారని, వారి సహకారంతోనే మొత్తం ఘటన జరిగిందని ఆమె ఆరోపించారు. దీంతో పోలీసులు ఆ స్నేహితులను కూడా గంటల తరబడి విచారించి వారి వాంగ్మూలాలను నమోదు చేస్తున్నారు.
ఇక ఘటన జరిగిన ప్రాంతంలోని సీసీ కెమెరా ఫుటేజీలు, అక్కడి స్థానికుల వాంగ్మూలాలు కూడా సేకరిస్తున్నారు. కేసులో మరిన్ని ఆధారాలు సేకరించేందుకు నిందితుడిని రిమాండ్ నుంచి కస్టడీలోకి తీసుకోవాలని పోలీసులు కోర్టులో పిటిషన్ దాఖలు చేయనున్నట్లు సమాచారం.
ఈ కేసు విచారణ ఇకపై మల్కాజగిరి కోర్టులో కొనసాగనుంది. నిందితుడి కుటుంబ సభ్యులు కూడా జైలులో అతన్ని కలిసినట్లు సమాచారం. ఇదిలా ఉంటే, బాధిత కుటుంబానికి బెదిరింపులు వస్తున్నాయని, తమకు రక్షణ కల్పించాలని బాధితురాలి తల్లి లేఖలో ప్రస్తావించడం మరో కీలక అంశంగా మారింది.
రాజకీయంగా కూడా ఈ కేసు తీవ్ర చర్చకు దారితీసింది. కేంద్ర మంత్రి పదవిలో ఉన్న వ్యక్తి కుమారుడిపై కేసు ఉండడంతో విచారణపై ప్రభావం పడే అవకాశాలపై విమర్శలు వ్యక్తమవుతున్నాయి. అందుకే విచారణ పూర్తయ్యే వరకు సంబంధిత మంత్రి పదవి నుంచి తప్పుకోవాలని కొందరు డిమాండ్ చేస్తున్నారు.
ప్రస్తుతం పోలీసులు డిలీట్ చేసిన డేటాను రికవర్ చేసే ప్రక్రియలో ఉన్నారు. ఆ డేటాలో ఏముంది? ఎవరెవరితో సంబంధాలు ఉన్నాయి? ఘటనకు ముందు తర్వాత ఏం జరిగింది? అన్న దానిపై కీలక ఆధారాలు లభించే అవకాశం ఉందని తెలుస్తోంది.
ఇప్పటికే కేసు కీలక మలుపు తిరిగిన నేపథ్యంలో, కస్టడీ విచారణ తర్వాత మరిన్ని సంచలన విషయాలు బయటపడే అవకాశాలు కనిపిస్తున్నాయి.
