టాలీవుడ్లో ప్రభాస్ – సుకుమార్ కాంబినేషన్లో ఒక సినిమా వస్తే చూడాలని ఫ్యాన్స్ చాలా కాలంగా ఎదురుచూస్తున్నారు. లెక్కల మాస్టర్ సుకుమార్ రాసే ఇంటెన్సివ్ క్యారెక్టరైజేషన్లో ప్రభాస్ లాంటి పాన్ ఇండియా స్టార్ కనిపిస్తే బాక్సాఫీస్ వద్ద రికార్డులు తిరగరాయడం ఖాయం అనే నమ్మకం అభిమానుల్లో ఉంది. కానీ ప్రస్తుతం అందుతున్న సమాచారం ప్రకారం, ఈ క్రేజీ ప్రాజెక్ట్ ఇప్పుడప్పుడే పట్టాలెక్కేలా కనిపించడం లేదు.
దీనికి ప్రధాన కారణం ఇద్దరి మధ్య ఉన్న బిజీ షెడ్యూల్స్. ఈ కాంబో మెటీరియలైజ్ అవ్వాలంటే మరికొంత కాలం వేచి చూడాల్సిందే. దర్శకుడు సుకుమార్ ప్రస్తుతం తన తదుపరి ప్రాజెక్టులతో పూర్తిగా బిజీగా ఉన్నారు. పుష్ప 2 సక్సెస్ తర్వాత ఆయన రామ్ చరణ్తో తన తర్వాతి సినిమా RC17 పనుల్లో నిమగ్నమైపోయారు. దీని తర్వాత వెంటనే అల్లు అర్జున్తో పుష్ప 3 కూడా లైన్లో ఉంది. పుష్ప 3కి సంబంధించిన స్టోరీ లైన్ ఇప్పటికే లాక్ అయ్యిందని సుకుమార్ సన్నిహిత వర్గాల సమాచారం.
ఈ రెండు భారీ ప్రాజెక్టులను పూర్తి చేయడానికి సుకుమార్కు కనీసం మరో మూడేళ్ల సమయం పట్టే అవకాశం ఉందని ఇండస్ట్రీ వర్గాలు చెబుతున్నాయి. మరోవైపు రెబల్ స్టార్ ప్రభాస్ కూడా తన చేతినిండా ప్రాజెక్టులతో బిజీగా ఉన్నారు. ప్రస్తుతం ఆయన హను రాఘవపూడి దర్శకత్వంలో ‘ఫౌజీ’, సందీప్ రెడ్డి వంగా దర్శకత్వంలో ‘స్పిరిట్’ సినిమాలతో ఫుల్ బిజీగా గడుపుతున్నారు.
అలాగే లైన్లో ఉన్న కల్కి 2, సలార్ 2 చిత్రాలకు కూడా ఫినిషింగ్ టచ్ ఇవ్వాల్సి ఉంది. ఈ సినిమాలు పూర్తయ్యేలోపు సుకుమార్ వెయిట్ చేసే అవకాశం కనిపించడం లేదు. దీంతో ఈ ఇద్దరు దిగ్గజాలు కలవడానికి సరైన గ్యాప్ ఎక్కడా దొరకడం లేదు.
ఇక వీరిద్దరి మధ్య చర్చల గురించి వస్తున్న వార్తల్లో కూడా పెద్దగా క్లారిటీ లేదు. లేటెస్ట్ సమాచారం ప్రకారం, ప్రభాస్ – సుకుమార్ ప్రాజెక్ట్పై ఇప్పటివరకు ఎలాంటి అఫీషియల్ మీటింగ్ జరగలేదు. అప్పుడప్పుడు ఎక్కడైనా కలిస్తే ఒకరితో ఒకరు పని చేయాలనే ఆసక్తిని మాత్రమే వ్యక్తం చేసుకున్నారట. కానీ అఫీషియల్గా కథా చర్చలు, అగ్రిమెంట్లు ఏవీ జరగలేదని తెలుస్తోంది.
ఒకవేళ ఈ సినిమా ఓకే అయినా, సుకుమార్ ప్రొడక్షన్ ప్లానింగ్కు అనుగుణంగా ప్రభాస్ డేట్స్ అడ్జస్ట్ అవ్వడానికి చాలా టైమ్ పడుతుంది. సుకుమార్ తన సినిమాలను చాలా డీటెయిల్డ్గా, పక్కాగా ప్లాన్ చేస్తారు. ఈ గ్యాప్లో ప్రభాస్ మరిన్ని పాన్ ఇండియా ప్రాజెక్టులను పూర్తి చేసే అవకాశం ఉంది.
అందుకే ఈ ఇద్దరి కాంబోలో సినిమా చూడాలనే ఫ్యాన్స్ కోరిక తీరాలంటే కనీసం 2029 లేదా 2030 వరకు ఎదురుచూడాల్సిందేనని టాలీవుడ్ వర్గాలు అంచనా వేస్తున్నాయి. బజ్ అయితే గట్టిగానే ఉన్నా, ప్రాక్టికల్గా చూస్తే మాత్రం ప్రభాస్ – సుకుమార్ సినిమా ప్రస్తుతానికి ఒక బ్యూటిఫుల్ ఐడియాగానే మిగిలిపోయే అవకాశాలు ఎక్కువగా కనిపిస్తున్నాయి.
