తమిళనాడు అసెంబ్లీ ఎన్నికల్లో సంచలన పరిణామాలు చోటుచేసుకుంటున్నాయి. ఎవరూ ఊహించని విధంగా నటుడు విజయ్ స్థాపించిన టీవీకే పార్టీ భారీ ఆధిక్యంలో కొనసాగుతోంది. రాజకీయాల్లోకి చాలా తక్కువ సమయంలోనే అడుగుపెట్టిన విజయ్, ప్రజల్లో ప్రత్యేకమైన క్రేజ్ సంపాదించుకొని ఇప్పుడు ప్రధాన రాజకీయ శక్తిగా మారిన పరిస్థితి కనిపిస్తోంది. ముఖ్యంగా యువత, సినిమా అభిమానులు, మార్పు కోరుకుంటున్న ఓటర్లు పెద్ద ఎత్తున టీవీకే వైపు మొగ్గుచూపినట్లు ఫలితాల ధోరణి స్పష్టంగా చూపిస్తోంది.
234 అసెంబ్లీ స్థానాలున్న తమిళనాడులో తాజా లెక్కింపుల ప్రకారం టీవీకే పార్టీ 100 స్థానాలకు పైగా ఆధిక్యంలో కొనసాగుతోంది. అధికార డీఎంకే మాత్రం 60కి పైగా స్థానాల్లో మాత్రమే ఆధిక్యంలో ఉండగా, అన్నాడీఎంకే 70కి సమీప స్థానాల్లో పోటీ ఇస్తోంది. దీంతో తమిళనాడులో ఈసారి త్రిముఖ పోటీ తీవ్ర ఉత్కంఠ రేపుతోంది.
విజయ్ రాజకీయ అరంగేట్రం తర్వాత ఇదే తొలి ప్రధాన ఎన్నిక కావడం విశేషం. 2024లో పార్టీని స్థాపించిన ఆయన చాలా తక్కువ సమయంలోనే రాష్ట్రవ్యాప్తంగా భారీ పాపులారిటీ సంపాదించారు. సినిమాల నుంచి పూర్తిగా రిటైర్మెంట్ తీసుకొని రాజకీయాలకే అంకితమయ్యానని ప్రకటించిన విజయ్, ప్రజల్లోకి నేరుగా వెళ్లి ప్రచారం నిర్వహించారు. అభివృద్ధి, పారదర్శక పాలన, యువతకు అవకాశాలు కల్పిస్తానని హామీ ఇచ్చారు.
ప్రస్తుతం చెన్నైలోని విజయ్ నివాసం వద్ద భారీ భద్రత ఏర్పాటు చేశారు పోలీసులు. అభిమానులు, పార్టీ కార్యకర్తలు పెద్ద ఎత్తున అక్కడికి చేరుకునే అవకాశం ఉండటంతో ప్రత్యేక భద్రత చర్యలు చేపట్టారు. విజయ్ ఇంటి వద్దకు ఇతర వాహనాలు వెళ్లకుండా ట్రాఫిక్ నియంత్రణ కూడా అమలు చేస్తున్నారు.
ఇక డీఎంకే కార్యాలయాల్లో మాత్రం నిశ్శబ్ద వాతావరణం నెలకొంది. ఎన్నికల ఫలితాలు ఆశించిన స్థాయిలో లేకపోవడంతో కార్యకర్తల్లో నిరాశ కనిపిస్తోంది. సంబరాల కోసం ఏర్పాటు చేసిన టెంట్లను కూడా తొలగిస్తున్న దృశ్యాలు వెలుగులోకి వచ్చాయి. ముఖ్యమంత్రి స్టాలిన్తో పాటు పలువురు మంత్రులు వెనుకంజలో ఉన్నారనే వార్తలు రాజకీయ వర్గాల్లో చర్చనీయాంశంగా మారాయి.
విజయ్కు సినీ అభిమానుల మద్దతు భారీగా లభించినట్లు రాజకీయ విశ్లేషకులు భావిస్తున్నారు. తమిళనాడులో సినిమా నటులను రాజకీయ నాయకులుగా ఆదరించే సంప్రదాయం చాలా కాలంగా ఉంది. ఎంజీఆర్, జయలలిత, కరుణానిధి, విజయకాంత్ వంటి నాయకుల తర్వాత ఇప్పుడు విజయ్ కూడా అదే మార్గంలో ముందుకు వస్తున్నట్లు కనిపిస్తోంది. ఎన్టీఆర్ లాగా సినిమాల నుంచి రాజకీయాల్లోకి వచ్చి ప్రజాదరణతో ఎదిగిన నాయకుడిగా విజయ్ను కొందరు పోలుస్తున్నారు.
ఇక మరోవైపు పశ్చిమ బెంగాల్లో తృణమూల్ కాంగ్రెస్, బీజేపీ మధ్య హోరాహోరీ పోటీ కొనసాగుతోంది. కేరళలో యూడీఎఫ్ ఆధిక్యంలో ఉండగా, అస్సాంలో బీజేపీ భారీ ఆధిక్యం సాధిస్తున్నట్లు ధోరణులు సూచిస్తున్నాయి. పుదుచ్చేరిలో ఎన్ఆర్ కాంగ్రెస్ కూటమి ముందంజలో ఉంది.
అయితే తమిళనాడులో చివరి ఫలితాలు వెలువడే వరకు స్పష్టత రానప్పటికీ, ప్రస్తుతం ఉన్న ధోరణులు మాత్రం టీవీకే పార్టీకి చారిత్రాత్మక ఫలితం వచ్చే సూచనలు ఇస్తున్నాయి. మ్యాజిక్ ఫిగర్కు దగ్గరగా ఉన్న విజయ్ పార్టీ, చివరికి ప్రభుత్వం ఏర్పాటు చేసే స్థాయికి చేరుకుంటుందా లేదా అన్నది ఇప్పుడు తమిళనాడు రాజకీయాల్లో హాట్ టాపిక్గా మారింది.
