హైదరాబాద్లోని కుత్బుల్లాపూర్ నియోజకవర్గం గాజులరామారంలో ఉన్న శ్రీ జై వైష్ణవి దేవి నవదుర్గా దేవాలయం భూముల వివాదం మరోసారి చర్చనీయాంశంగా మారింది. దాదాపు రెండు దశాబ్దాల క్రితం ఆలయ నిర్మాణం కోసం కేటాయించిన భూమిపై ఇప్పుడు యాజమాన్య వివాదం కొనసాగుతుండటంతో ట్రస్ట్ సభ్యులు, భక్తులు ఆందోళన వ్యక్తం చేస్తున్నారు.
ట్రస్ట్ ప్రతినిధుల వివరాల ప్రకారం, 1998-2000 కాలంలో అప్పటి రంగారెడ్డి జిల్లా కలెక్టర్ గాజులరామారంలో సుమారు 10 ఎకరాల భూమిని ఆలయ నిర్మాణం కోసం కేటాయించారు. అనంతరం ట్రస్ట్ వ్యవస్థాపకుడు పరమేశ్వర్ సింగ్ ఆధ్వర్యంలో వైష్ణవి మాత ఆలయం, లక్ష్మీనరసింహస్వామి ఆలయం, సత్యనారాయణస్వామి ఆలయం, గోశాల, ఆశ్రమం వంటి నిర్మాణాలు ఏర్పాటు చేశారు. భక్తుల సహకారంతో ఆలయ అభివృద్ధి కార్యక్రమాలు కూడా కొనసాగుతున్నాయని ట్రస్ట్ సభ్యులు చెబుతున్నారు.
అయితే 2009లో ఈ ప్రాంతం రాజీవ్ గృహకల్ప పథకం పరిధిలోకి వచ్చిన తర్వాత పరిస్థితులు మారిపోయాయని వారు ఆరోపిస్తున్నారు. రాజీవ్ గృహకల్ప కోసం భూమిని స్వాధీనం చేసుకునే ప్రయత్నాలు జరిగాయని, అప్పట్లో ప్రభుత్వ అధికారులు జోక్యం చేసుకుని సమస్యను తాత్కాలికంగా పరిష్కరించారని చెబుతున్నారు.
అయితే 2009లో ఈ ప్రాంతం రాజీవ్ గృహకల్ప పథకం పరిధిలోకి వచ్చిన తర్వాత పరిస్థితులు మారిపోయాయని వారు ఆరోపిస్తున్నారు. రాజీవ్ గృహకల్ప కోసం భూమిని స్వాధీనం చేసుకునే ప్రయత్నాలు జరిగాయని, అప్పట్లో ప్రభుత్వ అధికారులు జోక్యం చేసుకుని సమస్యను తాత్కాలికంగా పరిష్కరించారని చెబుతున్నారు.
తెలంగాణ రాష్ట్ర ఏర్పాటు తర్వాత కొంతకాలం వివాదం సద్దుమణిగినప్పటికీ, ఇటీవల మళ్లీ భూమిపై వివాదం తెరపైకి వచ్చిందని ట్రస్ట్ వర్గాలు పేర్కొంటున్నాయి. ముఖ్యంగా గత ఏడాది బుల్డోజర్లతో వచ్చి కొన్ని నిర్మాణాలను కూల్చివేశారని, ఆలయ పరిసరాల్లోని షాపులు, నివాస గృహాలు, ఇతర నిర్మాణాలు ధ్వంసమయ్యాయని ఆరోపిస్తున్నారు.
అలాగే ఆలయంలోని విగ్రహాలు, పూజా సామగ్రి ధ్వంసమయ్యాయని, గోశాల మరియు ఆశ్రమ కార్యకలాపాలకు ఆటంకం కలిగిందని ట్రస్ట్ సభ్యులు వాపోతున్నారు. ఈ చర్యలకు బాధ్యులు ఎవరో ఇప్పటికీ స్పష్టత లేదని వారు చెబుతున్నారు.
ఈ అంశంపై రాజకీయ పార్టీలు కూడా స్పందించాలని స్థానికులు కోరుతున్నారు. ముఖ్యంగా దేవాలయాల పరిరక్షణ గురించి మాట్లాడే రాజకీయ నాయకులు, ప్రజాప్రతినిధులు ఈ వివాదంపై ఎందుకు స్పందించడం లేదని ప్రశ్నిస్తున్నారు. ఆలయ భూములపై న్యాయపరమైన హక్కులు ట్రస్ట్కే ఉన్నాయని, సంబంధిత ప్రభుత్వ శాఖలు పూర్తి స్థాయిలో విచారణ జరిపి న్యాయం చేయాలని డిమాండ్ చేస్తున్నారు.
ప్రస్తుతం ఈ వ్యవహారం కోర్టు పరిధిలో ఉన్నట్లు సమాచారం. భూమి యాజమాన్యం, కేటాయింపు పత్రాలు, ప్రభుత్వ రికార్డుల ఆధారంగా తుది నిర్ణయం వెలువడాల్సి ఉంది. అప్పటి వరకు ఆలయ కార్యకలాపాలకు ఆటంకం కలగకుండా చర్యలు తీసుకోవాలని భక్తులు కోరుతున్నారు.
స్థానికంగా ప్రాధాన్యత పొందిన ఈ వివాదం రాజకీయ, సామాజిక, ఆధ్యాత్మిక వర్గాల్లో చర్చనీయాంశంగా మారింది. ఆలయ భూములపై నెలకొన్న సందిగ్ధతకు ప్రభుత్వం, సంబంధిత అధికారులు త్వరితగతిన పరిష్కారం చూపాలని భక్తులు ఆశిస్తున్నారు.
