మధు హత్య కేసుపై బీఆర్ఎస్ నేతలు తీవ్ర ఆగ్రహం వ్యక్తం చేశారు. ఈ కేసులో ఎటువంటి రాజకీయ ఒత్తిళ్లకు లోనుకాకుండా నిజమైన నిందితులను పట్టుకొని కఠినంగా శిక్షించాలని పోలీసు అధికారులకు హెచ్చరికలు జారీ చేశారు. విచారణలో ఎక్కడైనా నిర్లక్ష్యం లేదా నిందితులకు అనుకూలంగా వ్యవహరించిన అధికారులపై కూడా భవిష్యత్తులో చట్టపరమైన చర్యలు తప్పవని స్పష్టం చేశారు.
“ఇటువంటి క్రిమినల్ కేసులు 10 ఏళ్ల తర్వాత అయినా మళ్లీ రీఓపెన్ చేసి బాధ్యులపై కేసులు పెట్టిన సందర్భాలు ఉన్నాయి. ఐజీ, డీజీ స్థాయి అధికారులపైనా చర్యలు తీసుకున్న ఉదాహరణలు మనం చూశాం. కాబట్టి ఈ కేసులో కూడా పోలీసులు ఎలాంటి అనుమానాలకు తావివ్వకుండా విచారణ జరపాలి” అని బీఆర్ఎస్ నేతలు పేర్కొన్నారు.
విచారణలో ఎక్కడైనా నిందితులను కాపాడే ప్రయత్నం జరిగితే సంబంధిత అధికారులే భవిష్యత్తులో జైలుకు వెళ్లే పరిస్థితి వస్తుందని హెచ్చరించారు. కొంతమంది అధికారులు రాజకీయ మద్దతుతో అవినీతికి పాల్పడుతున్నారని, ఇలాంటి వ్యవహారాలపై ఉన్నతాధికారులు కూడా స్పందించాలని డిమాండ్ చేశారు.
అలాగే బీఆర్ఎస్ శ్రేణులకు కూడా ఆవేశానికి లోనుకాకుండా చట్టబద్ధంగా పోరాడాలని సూచించారు. “నిజమైన నిందితులకు శిక్ష పడేలా చట్టపరమైన పోరాటం కొనసాగిద్దాం. మధు కుటుంబాన్ని మన కుటుంబంలా ఆదుకుంటాం” అని హామీ ఇచ్చారు.
మృతుడు మధు కుటుంబానికి పార్టీ అండగా ఉంటుందని, ఆయన పిల్లల చదువు, కుటుంబ పోషణ బాధ్యతలను బీఆర్ఎస్ తీసుకుంటుందని ప్రకటించారు. గతంలో హత్యకు గురైన పార్టీ నాయకుల కుటుంబాలను ఎలా ఆదుకున్నామో ఇదే విధంగా మధు కుటుంబానికి కూడా పూర్తి సహాయం అందిస్తామని తెలిపారు.
చివరిగా మధు మృతికి సంతాపం ప్రకటిస్తూ, పార్టీ కార్యకర్తలు శాంతియుతంగా వ్యవహరించాలని బీఆర్ఎస్ నేతలు విజ్ఞప్తి చేశారు.
