నమస్తే వెల్కమ్ టు ఓకే టీవీ. తెలంగాణ రాష్ట్రంలో రైతుల పరిస్థితి రోజురోజుకూ ఆందోళనకరంగా మారుతున్న వేళ రాజకీయ పార్టీలు మాత్రం పరస్పర విమర్శలతో కాలం గడుపుతున్నాయనే విమర్శలు తీవ్రంగా వినిపిస్తున్నాయి. ముఖ్యంగా ధాన్యం కొనుగోళ్ల వ్యవహారంపై అధికార కాంగ్రెస్ ప్రభుత్వం, ప్రతిపక్ష బిఆర్ఎస్ మధ్య మాటల యుద్ధం మరింత వేడెక్కింది.
బిఆర్ఎస్ వర్కింగ్ ప్రెసిడెంట్ కేటీఆర్ తాజాగా ముఖ్యమంత్రి రేవంత్ రెడ్డిపై తీవ్రస్థాయిలో విమర్శలు చేశారు. రైతులు ప్రాణాలు కోల్పోతుంటే సీఎం “మొద్దు నిద్ర”లో ఉన్నారని ఆరోపించారు. పంట కొనుగోలు చేయడం చేతకాకపోతే రైతులకు క్షమాపణలు చెప్పి ముక్కు నేలకు రాయాలని డిమాండ్ చేశారు. ఈ మేరకు సీఎం కు లేఖ కూడా రాసినట్టు తెలుస్తోంది.
అయితే ఈ విమర్శల మధ్య ప్రజల్లో మరో ప్రశ్న కూడా వినిపిస్తోంది. రైతుల సమస్యలు ఈరోజు కొత్తగా మొదలైనవేనా? గత ప్రభుత్వాల సమయంలో రైతుల పరిస్థితి పూర్తిగా బాగుందా? అన్న చర్చ కూడా ఇప్పుడు తెరపైకి వస్తోంది. ఎందుకంటే రైతు బంధు వంటి పథకాలు తీసుకొచ్చినా, నిజంగా అవసరమైన చిన్న రైతుకి ఎంత ప్రయోజనం జరిగిందనే ప్రశ్న అప్పట్లో కూడా వచ్చింది. పెద్ద ఎత్తున భూములు ఉన్నవారికీ అదే స్థాయిలో సాయం వెళ్లిందనే విమర్శలు అప్పుడే వచ్చాయి.
అలాగే సన్న బియ్యం, దొడ్డి బియ్యం వివాదాలు, పంటల కొనుగోళ్లలో అయోమయం, కేంద్రం-రాష్ట్రం మధ్య ఆరోపణలు రైతులను తీవ్ర ఇబ్బందులకు గురిచేశాయి. ఇప్పుడు ప్రభుత్వం మారినా రైతు సమస్యలు మాత్రం అలాగే కొనసాగుతున్నాయనే భావన గ్రామీణ ప్రాంతాల్లో బలంగా కనిపిస్తోంది.
ప్రస్తుతం రాష్ట్రంలోని అనేక కొనుగోలు కేంద్రాల వద్ద వడ్లు పేరుకుపోయిన పరిస్థితులు కనిపిస్తున్నాయి. రైతులే స్వయంగా బస్తాల్లో ధాన్యం నింపుకొని రోజుల తరబడి ఎదురుచూస్తున్న పరిస్థితి నెలకొంది. ప్రభుత్వ యంత్రాంగం నుంచి సరైన స్పందన లేదని రైతులు ఆవేదన వ్యక్తం చేస్తున్నారు. కొన్నిచోట్ల తూకం వేసే సిబ్బంది లేకపోవడం, మరికొన్ని చోట్ల లారీల కొరత, ఇంకొన్ని ప్రాంతాల్లో కొనుగోలు ప్రక్రియ ఆలస్యం కావడం రైతులను తీవ్ర ఆర్థిక ఒత్తిడిలోకి నెట్టింది.
ఇక సీఎం రేవంత్ రెడ్డి మాత్రం రాష్ట్రంలో 80 శాతం ధాన్యం కొనుగోలు పూర్తయ్యిందని ప్రకటిస్తున్నారు. కానీ రైతు సంఘాలు మాత్రం భిన్నమైన వాదనలు వినిపిస్తున్నాయి. “80 శాతం పూర్తయితే ఇంకా కళాల వద్ద వేలాది బస్తాలు ఎందుకు ఉన్నాయి?” అని ప్రశ్నిస్తున్నారు. ఇప్పటికే పలువురు రైతులు అప్పుల బాధతో ఆత్మహత్యలు చేసుకున్న ఘటనలు రాష్ట్రవ్యాప్తంగా కలవరపెడుతున్నాయి.
ఈ మొత్తం వ్యవహారంలో అధికార పార్టీ ఒకవైపు, ప్రతిపక్షాలు మరోవైపు రైతులను రాజకీయ కోణంలో మాత్రమే చూస్తున్నాయనే విమర్శలు కూడా బలపడుతున్నాయి. ప్రతిపక్ష నేతలు కొనుగోలు కేంద్రాలకు వెళ్లి వీడియోలు తీసి సోషల్ మీడియాలో పోస్ట్ చేస్తున్నారే తప్ప, రైతు సమస్యకు శాశ్వత పరిష్కారం చూపించే ప్రయత్నం కనిపించడం లేదని పలువురు అభిప్రాయపడుతున్నారు.
రైతు రాష్ట్రానికి వెన్నెముక అని ప్రతి ఎన్నికల సమయంలో రాజకీయ పార్టీలు చెబుతుంటాయి. మహిళలు, రైతులు, యువత పేరుతో హామీలు ఇస్తుంటాయి. కానీ అధికారంలోకి వచ్చిన తర్వాత అదే రైతు సమస్యలు మళ్లీ మళ్లీ పునరావృతం అవుతున్నాయని ప్రజలు ఆవేదన వ్యక్తం చేస్తున్నారు. బోనస్ ఇస్తామని చెప్పి అమలు చేయకపోవడం, కొనుగోళ్లు ఆలస్యం కావడం, కనీస మద్దతు ధరపై స్పష్టత లేకపోవడం వంటి అంశాలు రైతుల్లో అసంతృప్తిని పెంచుతున్నాయి.
ప్రస్తుతం రైతు కష్టాన్ని రాజకీయ ప్రయోజనాలకు వాడుకుంటున్నారనే భావన గ్రామాల్లో బలంగా కనిపిస్తోంది. రైతు సమస్యలపై నిజమైన చర్చ కంటే రాజకీయ విమర్శలకే ఎక్కువ ప్రాధాన్యం దక్కుతోందని విమర్శలు వినిపిస్తున్నాయి. రైతు బతికితేనే రాష్ట్ర ఆర్థిక వ్యవస్థ బలపడుతుందనే విషయాన్ని గుర్తించి ప్రభుత్వం, ప్రతిపక్షాలు కలిసి పని చేయాల్సిన అవసరం ఉందని వ్యవసాయ వర్గాలు సూచిస్తున్నాయి.
మరిన్ని అప్డేట్స్ కోసం చూస్తూనే ఉండండి ఓకే టీవీ.
