నమస్తే.. వెల్కమ్ టు ఓకే టీవీ. తెలంగాణ రాజకీయాల్లో ఇప్పుడు “ఇంద్రమ్మ ఇళ్లు – డబుల్ బెడ్రూమ్ ఇళ్లు” అంశం మరోసారి హాట్ టాపిక్గా మారింది. మంత్రి పొంగులేటి శ్రీనివాస్ రెడ్డి చేసిన వ్యాఖ్యలకు బీఆర్ఎస్ వర్కింగ్ ప్రెసిడెంట్ కేటీఆర్ కౌంటర్ ఇవ్వడంతో ఈ చర్చ మరింత వేడెక్కింది.
గతంలో “20 లక్షల ఇంద్రమ్మ ఇళ్లు కట్టించి ఇచ్చాకే ఓట్లు అడుగుతాం” అని మంత్రి పొంగులేటి సవాల్ చేసిన సంగతి తెలిసిందే. ఇప్పుడు అదే మాట నిలబెట్టుకునే దమ్ము ఉందా అని కేటీఆర్ ప్రశ్నించారు. కాంగ్రెస్ నాయకులు సవాళ్లు విసరడం తప్ప చేతల్లో చూపించలేరని విమర్శించారు.
అయితే ఇప్పుడు అసలు చర్చ ఇంద్రమ్మ ఇళ్లు నిజంగా ఎవరికి చేరుతున్నాయన్నదానిపై నడుస్తోంది. ప్రభుత్వం వేల కోట్లతో ఇళ్లు కట్టిస్తున్నామని చెబుతున్నా.. నిజమైన లబ్ధిదారులకు అవి చేరుతున్నాయా లేదా అన్న సందేహాలు వ్యక్తమవుతున్నాయి.
కొంతమంది స్థానికులు చెబుతున్నదేమిటంటే.. ఇంద్రమ్మ ఇళ్ల కేటాయింపుల్లో మధ్యవర్తిత్వం పెరిగిందని, స్థానిక కాంగ్రెస్ నాయకులకు దగ్గరగా ఉన్నవారికే ఎక్కువగా ఇళ్లు వెళ్తున్నాయనే ఆరోపణలు వినిపిస్తున్నాయి. ఇప్పటికే ఇళ్లు ఉన్నవారికీ మళ్లీ ఇళ్లు శాంక్షన్ అవుతున్నాయనే విమర్శలు ఉన్నాయి.
“నిజంగా గుడిసెలో ఉన్న పేదవాడికి ఇల్లు చేరుతోందా? లేక రాజకీయ సిఫారసులున్నవారికేనా?” అనే ప్రశ్న ఇప్పుడు బలంగా వినిపిస్తోంది. దీనిపై ప్రభుత్వం పారదర్శక సర్వే నిర్వహించాలని కూడా డిమాండ్లు వస్తున్నాయి.
ఇక బీఆర్ఎస్ హయాంలో చేపట్టిన డబుల్ బెడ్రూమ్ ఇళ్లపైనా విమర్శలు మళ్లీ తెరపైకి వచ్చాయి. చాలా చోట్ల ఇళ్లు పూర్తికాకపోవడం, నిర్మాణాలు సగం దాకా ఆగిపోవడం, ఇప్పటికే నిర్మించిన కొన్ని భవనాలు దెబ్బతినడం వంటి ఆరోపణలు వినిపిస్తున్నాయి.
పల్లెల్లో అపార్ట్మెంట్ మోడల్ డబుల్ బెడ్రూమ్ ఇళ్లు ప్రజలకు సరిపోవని కూడా కొందరు అంటున్నారు. గ్రామాల్లో రైతులకు ట్రాక్టర్లు, పశువులు, వ్యవసాయ అవసరాల కోసం స్థలం అవసరం ఉంటుందని.. అలాంటి ప్రాంతాల్లో టవర్ మోడల్ ఇళ్లు ఉపయోగకరంగా ఉండవని విమర్శిస్తున్నారు.
ఇంకొందరు మాత్రం ఇప్పటికే నిర్మాణం పూర్తైన డబుల్ బెడ్రూమ్ ఇళ్లను కనీసం ఇప్పుడు అయినా పేదలకు కేటాయించాలని అంటున్నారు. ప్రజల డబ్బులతో కట్టిన ఇళ్లు ఖాళీగా ఉండకూడదని చెబుతున్నారు.
మొత్తంగా చూస్తే.. కాంగ్రెస్ ఇంద్రమ్మ ఇళ్లు, బీఆర్ఎస్ డబుల్ బెడ్రూమ్ పథకాలు రెండూ ఇప్పుడు రాజకీయ విమర్శల కేంద్రంగా మారాయి. ఒకరిపై ఒకరు సవాళ్లు విసురుకుంటున్నప్పటికీ.. నిజంగా పేదలకు ఎంత మేలు జరిగింది అన్నదే ఇప్పుడు ప్రధాన ప్రశ్నగా మారింది.
