తెలంగాణ వ్యాప్తంగా మెడికల్ షాపుల బంద్ ప్రజలను తీవ్ర ఇబ్బందులకు గురి చేసింది. మే 20న డ్రగ్గిస్ట్ అండ్ కెమిస్ట్ అసోసియేషన్ పిలుపుతో అనేక చిన్న పెద్ద మెడికల్ షాపులు మూతపడ్డాయి. ఆన్లైన్ మెడిసిన్ సర్వీసులు, భారీ డిస్కౌంట్లు ఇస్తున్న పెద్ద ఫార్మసీ చైన్ సంస్థల కారణంగా తమ వ్యాపారాలు దెబ్బతింటున్నాయని ఆరోపిస్తూ ఈ బంద్ చేపట్టినట్లు అసోసియేషన్ నాయకులు చెబుతున్నారు.
ప్రధానంగా మెడిప్లస్, అపోలో వంటి పెద్ద ఫార్మసీ సంస్థలు భారీ డిస్కౌంట్లతో మందులు విక్రయించడం వల్ల చిన్న స్థాయి మెడికల్ షాపులకు నష్టం జరుగుతోందని వాదిస్తున్నారు. ఆన్లైన్ ద్వారా మందుల సరఫరా పెరగడంతో స్థానిక ఫార్మసీల అమ్మకాలు పడిపోతున్నాయని వారు ఆవేదన వ్యక్తం చేస్తున్నారు.
అయితే ఈ బంద్పై సామాన్య ప్రజల నుంచి తీవ్ర విమర్శలు వ్యక్తమవుతున్నాయి. ఎందుకంటే మెడికల్ షాపులు అనేవి నిత్యావసర సేవలలో ఒకటి. వృద్ధులు, చిన్న పిల్లలు, దీర్ఘకాలిక వ్యాధులతో బాధపడేవారు ప్రతిరోజూ మందులపై ఆధారపడుతుంటారు. అలాంటి పరిస్థితిలో ఒకరోజు పాటు మెడికల్ షాపులు పూర్తిగా మూసివేయడం ప్రజల ఆరోగ్యంపై ప్రభావం చూపుతుందని పలువురు అభిప్రాయపడుతున్నారు.
ప్రస్తుతం చాలా ప్రాంతాల్లో చిన్న ఫార్మసీలు పూర్తిగా బంద్ కాగా, కొంతమంది పెద్ద సంస్థలకు చెందిన మెడికల్ షాపులు మాత్రమే పరిమితంగా సేవలు అందిస్తున్నాయి. అయితే కొన్ని చోట్ల ఆ షాపులను కూడా బలవంతంగా మూసివేయిస్తున్నారనే ఆరోపణలు వినిపిస్తున్నాయి. కొన్ని మెడికల్ షాప్ నిర్వాహకులు తమకు ప్రభుత్వ అనుమతులు ఉన్నప్పటికీ అసోసియేషన్ ఒత్తిడితో షాపులు మూసివేయాల్సి వచ్చిందని చెబుతున్నారు.
ఇక మరోవైపు ఇండియన్ ఫార్మాస్యూటికల్ అసోసియేషన్ ఈ బంద్ను వ్యతిరేకిస్తోంది. అసలు సమస్య ఫేక్ ఫార్మసిస్టులు, నకిలీ సర్టిఫికెట్లతో నడుస్తున్న షాపులపై చర్యలు తీసుకోవాలని, ప్రజలను ఇబ్బంది పెట్టే బంద్లు సరైన పరిష్కారం కాదని IPA అభిప్రాయపడుతోంది.
ప్రస్తుతం ఈ అంశం రాష్ట్రవ్యాప్తంగా చర్చనీయాంశంగా మారింది. ఒకవైపు చిన్న మెడికల్ షాపుల జీవనోపాధి సమస్య ఉంటే, మరోవైపు ప్రజలకు మందుల అందుబాటు సమస్యగా మారింది. ఈ వివాదంలో ప్రభుత్వం ఎలా స్పందిస్తుందో, డ్రగ్గిస్ట్ అండ్ కెమిస్ట్ అసోసియేషన్ మరియు ఫార్మసీ సంస్థల మధ్య చర్చలు ఎటువైపు వెళ్తాయో చూడాలి.
