నమస్తే వెల్కమ్ టు ఓకే టీవీ. తెలంగాణ రాజకీయాల్లో ఇప్పుడు సింగరేణి సంస్థ మరోసారి హాట్ టాపిక్ గా మారింది. రాష్ట్ర ప్రభుత్వం సింగరేణికి భారీగా బకాయిలు పెట్టిందని, సంస్థ ఆర్థిక పరిస్థితి రోజురోజుకీ దెబ్బతింటోందని బీఆర్ఎస్ నేతలు తీవ్ర ఆరోపణలు చేస్తున్నారు. ముఖ్యంగా రెండున్నరేళ్ల కాంగ్రెస్ పాలనలోనే సింగరేణికి రూ.14 వేల కోట్ల బకాయిలు పెరిగాయని చేసిన వ్యాఖ్యలు ఇప్పుడు రాజకీయ చర్చకు దారితీస్తున్నాయి.
బీఆర్ఎస్ నేతల వాదన ప్రకారం, తమ ప్రభుత్వం 10 ఏళ్ల పాలనలో సింగరేణికి సుమారు రూ.4 వేల కోట్ల మేర మాత్రమే బకాయిలు ఉండేవని, అందులో కూడా కరోనా కాలం వల్ల ఆర్థిక ఇబ్బందులు తలెత్తాయని చెప్తున్నారు. కానీ ప్రస్తుతం కాంగ్రెస్ ప్రభుత్వం ఒక్క రూపాయి కూడా సకాలంలో చెల్లించడం లేదని, కేవలం రెండున్నరేళ్లలోనే రూ.14 వేల కోట్ల బకాయిలు పెరిగాయని ఆరోపిస్తున్నారు.
అంతేకాదు, సింగరేణి సంస్థ ఒకప్పుడు వేల కోట్ల ఫిక్స్డ్ డిపాజిట్లతో బలంగా ఉండేదని, ఇప్పుడు మాత్రం ఓవర్డ్రాఫ్ట్లపై నడిచే పరిస్థితికి చేరిందని విమర్శలు చేస్తున్నారు. గతంలో సింగరేణి వద్ద రూ.3 వేల కోట్ల నుంచి రూ.4 వేల కోట్ల వరకు ఫిక్స్డ్ డిపాజిట్లు ఉండేవని, ప్రస్తుతం అవన్నీ ఖాళీ అయి రూ.4 వేల కోట్ల ఓడీ పరిస్థితికి చేరుకుందని చెబుతున్నారు.
ఇక్కడ మరో కీలక అంశాన్ని కూడా ప్రస్తావిస్తున్నారు. తెలంగాణ ప్రభుత్వానికి రిజర్వ్ బ్యాంక్ ఇచ్చిన ఓవర్డ్రాఫ్ట్ పరిమితి సుమారు రూ.3,200 కోట్లు ఉండగా, సింగరేణి సంస్థ ఒక్కటే దాదాపు రూ.4 వేల కోట్ల ఓడీలో ఉందని ఆరోపిస్తున్నారు. ఉద్యోగుల జీతాలు కూడా బ్యాంకుల నుంచి అప్పులు తెచ్చి చెల్లించే పరిస్థితి వచ్చిందని అంటున్నారు.
ఇదిలా ఉండగా సింగరేణి బొగ్గు నిల్వలపై కూడా కొత్త ఆరోపణలు వచ్చాయి. సింగరేణి అధికారిక వెబ్సైట్ ప్రకారం దాదాపు 40 లక్షల మెట్రిక్ టన్నుల బొగ్గు వివిధ గనుల వద్ద స్టాక్గా ఉన్నట్లు చూపిస్తున్నారని చెబుతున్నారు. మందమర్రి, శ్రీరాంపూర్, రామగుండం, భూపాలపల్లి, ఇల్లెందు, సత్తుపల్లి ప్రాంతాల్లో లక్షల టన్నుల బొగ్గు నిల్వలు ఉన్నట్లు రికార్డుల్లో చూపిస్తున్నారని అంటున్నారు.
ఈ 40 లక్షల మెట్రిక్ టన్నుల బొగ్గు విలువ సుమారు రూ.1600 కోట్లకు పైగానే ఉంటుందని, టన్నుకు సగటున రూ.4,200 చొప్పున లెక్కలు చూపించి ఆదాయం వచ్చినట్టు పేర్కొన్నారని ఆరోపిస్తున్నారు. అంతేకాదు, ఈ బొగ్గుపై ఇన్కమ్ ట్యాక్స్, కోల్ సెస్, డీఎంఎఫ్టీ చార్జీలు, కేంద్ర-రాష్ట్ర ప్రభుత్వాలకు డివిడెండ్లు కూడా చెల్లించారని చెబుతున్నారు.
ఇప్పుడు అసలు ప్రశ్న ఏంటంటే… ఆ 40 లక్షల మెట్రిక్ టన్నుల బొగ్గు నిజంగా ఉందా? ఉంటే ఎక్కడ ఉంది? లేకపోతే ఆ బొగ్గు ఏమైంది? తీయకుండానే తీసినట్టు చూపించారా? లేక ప్రైవేట్గా ఎక్కడైనా అమ్మేశారా? అనే అనుమానాలు వ్యక్తం చేస్తున్నారు.
సింగరేణి అధికారిక రికార్డుల్లో బొగ్గు స్టాక్ చూపించి, దాని ఆధారంగా లాభాలు చూపించి పన్నులు కూడా చెల్లిస్తే, ఆ బొగ్గు భౌతికంగా కనిపించాల్సిందేనని ప్రశ్నిస్తున్నారు. రూ.1600 కోట్ల విలువైన బొగ్గు ఎక్కడికి వెళ్లిందో స్పష్టత ఇవ్వాలని డిమాండ్ చేస్తున్నారు.
ఈ వ్యవహారంపై పూర్తి స్థాయి విచారణ జరపాలని, సింగరేణి ఆర్థిక పరిస్థితి, బొగ్గు నిల్వలు, ప్రభుత్వ బకాయిలపై వైట్ పేపర్ విడుదల చేయాలని ప్రతిపక్షాలు డిమాండ్ చేస్తున్నాయి. మరోవైపు ప్రభుత్వం మాత్రం ఈ ఆరోపణలను రాజకీయ విమర్శలుగానే కొట్టిపారేస్తోంది.
ఇప్పుడు ఈ అంశం తెలంగాణ రాజకీయాల్లో మరింత వేడెక్కే అవకాశం కనిపిస్తోంది. ముఖ్యంగా సింగరేణి కార్మికులు, ఉద్యోగుల్లో కూడా ఈ చర్చ పెద్ద ఎత్తున జరుగుతోంది. అసలు నిజం ఏంటి? బొగ్గు స్టాక్ ఎక్కడుంది? సింగరేణి ఆర్థిక పరిస్థితి ఎంతవరకు ప్రమాదంలో ఉంది? అనే విషయాలపై ప్రభుత్వం స్పష్టత ఇవ్వాల్సిన అవసరం ఉందని పలువురు అభిప్రాయపడుతున్నారు.
