ప్రైవేట్ మెడికల్ కాలేజీల ఫీజు దోపిడీపై తీవ్ర ఆరోపణలు వినిపిస్తున్నాయి. ఎంబీబీఎస్ కోర్సు కాల పరిమితి నాలుగున్నర సంవత్సరాలు మాత్రమే ఉన్నప్పటికీ, కొన్ని ప్రైవేట్ మెడికల్ కాలేజీలు బి, సి కేటగిరీ విద్యార్థుల నుంచి ఐదేళ్లకు ఫీజు వసూలు చేస్తున్నాయనే విమర్శలు వెల్లువెత్తుతున్నాయి. నిబంధనలకు విరుద్ధంగా అదనంగా వసూలు చేసిన ఫీజును తిరిగి చెల్లించాలని తల్లిదండ్రులు డిమాండ్ చేస్తున్నారు.
విద్యార్థులు, తల్లిదండ్రుల ఆందోళనల నేపథ్యంలో తెలంగాణ అడ్మిషన్స్ అండ్ ఫీ రెగ్యులేటరీ కమిటీ నాలుగేళ్లకే ఫీజు వసూలు చేయాలని స్పష్టం చేసినట్లు చెబుతున్నారు. ఇప్పటికే అదనంగా వసూలు చేసిన మొత్తాన్ని విద్యార్థుల తల్లిదండ్రులకు తిరిగి చెల్లించాలని కూడా ఆదేశాలు ఇచ్చినట్లు సమాచారం.
అయితే కమిటీ ఆదేశాలు ఉన్నప్పటికీ కొన్ని కాలేజీలు ఐదేళ్ల ఫీజు కోసం విద్యార్థులపై ఒత్తిడి తెస్తున్నారనే ఆరోపణలు ఉన్నాయి. అదనపు ఫీజు చెల్లించకపోతే కాలేజీలోకి అనుమతించకపోవడం, హాజరు తగ్గించడం, ప్రాక్టికల్స్కు అనుమతించబోమని హెచ్చరించడం, ఇంటర్నల్స్లో ఇబ్బందులు పెడతామని బెదిరించడం వంటి ఆరోపణలు వినిపిస్తున్నాయి. కొన్ని సందర్భాల్లో హాల్టికెట్లు, ఒరిజినల్ సర్టిఫికెట్లను నిలిపివేస్తామని కూడా భయపెడుతున్నారని విద్యార్థుల తల్లిదండ్రులు చెబుతున్నారు.
బి, సి కేటగిరీ విద్యార్థుల నుంచి అదనంగా ఆరు నెలల నుంచి ఏడాది వరకు ఫీజు వసూలు చేస్తున్నారని, కేటగిరీని బట్టి ఈ మొత్తం సుమారు రూ.6 లక్షల నుంచి రూ.15 లక్షల వరకు ఉంటోందని తల్లిదండ్రులు ఆరోపిస్తున్నారు. ఇప్పటికే గత బ్యాచ్ల విద్యార్థులు ఈ మొత్తాలను చెల్లించారని, ఇప్పుడు నిబంధనల నేపథ్యంలో అదనంగా వసూలు చేసిన ఆరు నెలల ఫీజును తిరిగి ఇవ్వాలని డిమాండ్ చేస్తున్నారు.
మెడికో పేరెంట్స్ అసోసియేషన్ ప్రతినిధులు కొన్ని కాలేజీలను సందర్శించి యాజమాన్యాలను ప్రశ్నించినట్లు తెలుస్తోంది. అయితే ఫీజుల విషయంలో తమ చేతుల్లో ఏమీ లేదని, నిర్ణయం మొత్తం మేనేజ్మెంట్దేనని కొందరు ప్రిన్సిపాళ్లు చెబుతున్నారని తల్లిదండ్రులు ఆరోపిస్తున్నారు.
నిబంధనలు ఉల్లంఘించే కాలేజీలపై ప్రభుత్వం, సంబంధిత ఆరోగ్య విశ్వవిద్యాలయ అధికారులు కఠిన చర్యలు తీసుకోవాలని మెడికో పేరెంట్స్ అసోసియేషన్ డిమాండ్ చేస్తోంది. అదనపు ఫీజులు వసూలు చేస్తున్న కాలేజీలపై విచారణ జరిపి అవసరమైతే క్రిమినల్ కేసులు నమోదు చేయాలని, నిబంధనలు పాటించని కాలేజీల గుర్తింపును రద్దు చేయడంతో పాటు సీట్ల కోత విధించాలని కోరుతున్నారు.
విద్యార్థుల ఫిర్యాదుల స్వీకరణకు ప్రత్యేక గ్రీవెన్స్ సెల్ లేదా టోల్ఫ్రీ నంబర్ ఏర్పాటు చేయాలని కూడా తల్లిదండ్రులు ప్రభుత్వాన్ని కోరుతున్నారు. ఇప్పటికే అక్రమంగా వసూలు చేసిన అదనపు ఫీజును వెంటనే రిఫండ్ చేసేలా చర్యలు తీసుకోవాలని విజ్ఞప్తి చేస్తున్నారు.
నాలుగేళ్ల కోర్సుకు ఐదేళ్ల ఫీజు వసూలు చేస్తున్నారనే ఆరోపణలపై ప్రభుత్వం స్పష్టమైన చర్యలు తీసుకోవాల్సిన అవసరం ఉందనే డిమాండ్లు పెరుగుతున్నాయి. నిబంధనలు అమలు చేయాల్సిన అధికారులు ప్రేక్షక పాత్ర పోషించకుండా, విద్యార్థులు మరియు తల్లిదండ్రులకు న్యాయం చేయాలని పలువురు కోరుతున్నారు.
